ព័ត៌មានអន្ដរជាតិ

ក្រុមតវ៉ាគាំទ្រប្រធានាធិបតី Yoon ប្រែក្លាយទៅហិង្សា ក្រោយតុលាការចេញដីកាចាប់ខ្លួន

បានផុស

១ year មុន

នៅ

ថ្ងៃអាទិត្យ ១៩ មករា ២០២៥

ដោយ

ប្រជាជនកូរ៉េខាងត្បូងចូលម៉ឺននាក់ យោងទីភ្នាក់ងារព័ត៌មានបារាំង AFP បានចេញទៅតវ៉ាតាមដងផ្លូវ និងមានប្រើអំពើហិង្សាដោយបំផ្លាញអគារតុលាការទៀតផង ដើម្បីបង្ហាញការគាំទ្រលោក Yoon Suk Yeol ដែលតុលាការក្រុងសេអ៊ូលសម្រេចចេញដីកាចាប់ខ្លួននៅថ្ងៃទី១៨ ដើម្បីបន្ថែមនីតិវធីឃុំខ្លួនរហូតដល់២០ថ្ងៃបន្ថែមទៀតក្នុងបំណងសួរចម្លើយ។

ក្រុមអ្នកតវ៉ាគាំទ្រលោក Yoon ប៉ះទង្គិចជាមួយកម្លាំងសន្តិសុខ។ Reuter

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីដែលព្យួរអំណាចដោយសភាជាតិបោះឆ្នោតទម្លាក់កាលថ្ងៃទី១៤ខែធ្នូឆ្នាំ២០២៤ និងដែលកំពុងឡោមព័ទ្ធដោយរឿងក្តីក្តាំងតុលាការនិងការស៊ើបអង្កេតផ្សេងៗដ៏ចាក់ស្រេះ ធ្លាប់បានបង្ហាញជំហរប្រយុទ្ធដល់ទីបញ្ចប់តាមរយៈវេទិកានយោបាយចុងក្រោយ គឺតុលាការធម្មនុញ្ញដែលចាប់ផ្តើមបើកសវនាការលើបណ្តឹងរបស់សភាដែលបានចោទប្រកាន់ព្យួរអំណាចរបស់លោក។

ការចាប់ខ្លួនរបស់លោក Yoon នាពេលនេះ ធ្វើឡើងបន្ទាប់ពីលោកបដិសេធមិនសហការឆ្លើយបំភ្លឺតាមការសួរចម្លើយដោយការិយាល័យស៊ើបអង្កេតពុករលួយសម្រាប់មន្ត្រីជាន់ខ្ពស់ (CIO) ក្នុងពេលកន្លងមក ហើយCIO ក៏សហការជាមួយតុលាការក្នុងក្រុងសេអ៊ូលដើម្បីចេញដីកាចាប់ខ្លួនតែម្តង ដែលលោក Yoon និងមេធាវីរបស់លោក យល់ថា«ខុសច្បាប់» ព្រោះពួកគេគ្មានអំណាចអនុវត្តការស៊ីចម្លើយនិងចាប់ខ្លួនលោកឡើយ ដោយសារលោកស្ថិតនៅក្នុងតំណែងប្រធានាធិបតី។

តាមសេចក្តីរាយការណ៍របស់ AFP មានអ្នកគាំទ្ររបស់លោក Yoon រាប់ម៉ឺននាក់ចេញទៅតវ៉ាតាមដងផ្លូវ ហើយក៏មានការសកម្មភាពវាយបង្អួចរបស់តុលាការក្រុងសេអ៊ូលផងដែរ។ ជាមួយគ្នានោះ កងកម្លាំងប៉ូលិសរាប់រយនាក់ក៏ត្រូវបានដាក់ពង្រាយ និងមានការចាប់ខ្លួនដោយបង្ខំចំពោះអ្នកប្រើប្រាស់អំពើហិង្សាផងដែរ។

អំឡុងពេលឃុំខ្លួននៅការិយាល័យ CIO លោក Seok Dong-hyeon មេធាវីនិងជាមិត្តចាស់របស់លោក Yoon ត្រូវបានទីភ្នាក់ងារព័ត៌មាន Yonhap ដកស្រង់សម្តីដោយនិយាយថា៖«លោកប្រធានាធិបតីបានបញ្ជាក់ជំហរមូលដ្ឋានរបស់គាត់អស់ហើយ អំឡុងពេលការសាកសួររបស់ CIO នៅថ្ងៃដំបូង និងមិនឃើញនូវហេតុផលផ្សេង ឬក៏សេចក្តីត្រូវការដើម្បីឆ្លើយតបទៅនឹងប្រភេទសំណួរនិងចម្លើយនៃការចោទសួរនោះទេ»។

ប្រធានាធិបតី Yoon បានទាញទម្លាក់ស្ថានការណ៍ប្រទេសកូរ៉េខាងត្បូងចូលទៅក្នុងវិបត្តិ បន្ទាប់ពីការប្រកាសច្បាប់អាជ្ញាសឹកកាលថ្ងៃទី៣ខែធ្នូ ដោយប៉ងចាប់មេដឹកនាំបក្សប្រឆាំង ប្រធានសភា និងបុគ្គលសំខាន់ៗ ក្រោមបទចោទដែលលោកលើកឡើងពាក់ព័ន្ធ «កម្លាំងប្រឆាំងរដ្ឋ» និង «ការគាំទ្រកូរ៉េខាងជើង»។

ប៉ុន្តែការប្រកាសរបស់លោក បានប្រហែល៦ម៉ោងក្រោយមក សភាជាតិក៏បានបោះឆ្នោតច្រានចោលការប្រកាសដាក់ច្បាប់អាជ្ញាសឹកនោះវិញ ដោយមានការគាំទ្រពីសមាជិកសភានៃគណបក្សអំណាចប្រជាជន (People Power Party) របស់លោកផង ធ្វើឲ្យលោកសម្រេចចិត្តប្រកាសដាក់ច្បាប់អាជ្ញាសឹកនោះវិញ។

ទោះបីលោកប្រកាសដក ប៉ុន្តែលោកក៏នោះប្រឈមការចោទប្រកាន់ជាច្រើន ដូចជា ការប៉ះបោរប្រឆាំងរដ្ឋធម្មនុញ្ញ ការរំលោភអំណាច និងអំពើក្បត់ជាដើម។

តាមអ្នកជំនាញផ្លូវច្បាប់នៅប្រទេសកូរ៉េខាងត្បូង ក្នុងករណីលោក Yoon ត្រូវបានចេញដីកាចាប់ខ្លួនជាផ្លូវការ នោះការស៊ើបអង្កេតលើនីតិវិធីព្រហ្មទណ្ឌនឹងត្រូវធ្វើឡើយ ហើយ បើរកឃើញពិរុទ្ធភាព ប្រធានាធិបតី Yoon Suk Yeol អាចមានទោសធ្ងន់រហូតដល់ប្រហារជីវិតឬក៏ត្រូវជាប់ពន្ធនាគារពេញ១ជីវិត៕

ដោយ រ៉ាន់ រើយ