កីឡា

ម៉ោង៦ល្ងាចនេះ ព្រះខ័នរាជស្វាយរៀង ប៉ះ Thanh Hoa ជាក្រុមកំពុងខ្លាំងរដូវកាលនេះ

បានផុស

១ year មុន

នៅ

ថ្ងៃពុធ ២២ មករា ២០២៥

ដោយ

ក្រុម Dong A Thanh Hoa FC នឹងត្រូវបើកទ្វារកីឡដ្ឋាន Thanh Hoa ទទួលក្រុមភ្ញៀវ ព្រះខ័នរាជស្វាយរៀង ក្នុងវគ្គសន្សំពិន្ទុ ពានរង្វាន់ ASEAN Club Championship ឆ្នាំ២០២៤-២៥ វេលាម៉ោង៦ល្ងាចនេះ។

ក្រុមម្ចាស់ផ្ទះវៀតណាម Dong A Thanh Hoa FC កំពុងឡើងជើងខ្លាំងក្នុងរដូវកាលនេះ ក្រោយធ្វើបានយ៉ាងល្អ ទាំងការប្រកួតពានរង្វាន់ក្នុងស្រុក និងពានរង្វាន់អន្ដរជាតិ។ ការប្រកួតលីគកំពូលប្រទេសវៀតណាម V. League 1 ពួកគេកំពុងឈរនៅលេខ១ បន្ទាប់ពីប្រកួត១១លើក ឈ្នះ៦ ស្មើ៤ និងចាញ់១ មាន២២ពិន្ទុ។ សម្រាប់ពានរង្វាន់ ASEAN Club Championship ក្រុមមួយនេះមិនទាន់ស្គាល់បរាជ័យឡើយ ហើយកំពុងឈរលេខ២ ក្រោយប្រកួត៣លើក បន្ទាប់ពីឈ្នះឈ្នះ១ និងស្មើ២ មាន៥ពិន្ទុ ហើយក៏ជាក្រុមដែលមានភាគច្រើនឡើងទៅជុំបន្ទាប់។

ក្រុម Dong A Thanh Hoa FC មានកីឡាករបរទេស៦នាក់ ក្នុងនោះមានកីឡាករកូរ៉េខាងត្បូង១នាក់ និងកីឡាករប្រេសុីល៥នាក់។ កីឡាករដ៏គ្រោះថ្នាក់របស់ពួកគេគឺកីឡាករខ្សែបម្រើប្រេសុីល Luiz Antônio ដែលតែងរកគ្រាប់បាល់ គិតមកទល់ពេលនេះរូបគេរកបាន៤គ្រាប់ ក្នុងការប្រកួតលីគកំពូលប្រទេសវៀតណាម និងរកបាន២គ្រាប់ ក្នុងការប្រកួតពានរង្វាន់ ASEAN Club Championship។

ក្រុមភ្ញៀវព្រះខ័នរាជស្វាយរៀង ក៏មិនធម្មតាដែរក្នុងរដូវកាលនេះ។ ពួកគេបន្ដធ្វើបានយ៉ាងល្អ ដោយកំពុងឈរនៅលេខ២ ក្នុងការប្រកួតលីគកំពូលកម្ពុជា បន្ទាប់ពីប្រកួត១៦លើក ឈ្នះ១៣ ស្មើ១ និងចាញ់២ មាន៤០ពិន្ទុ។ ក្នុងពានរង្វាន់ ASEAN Club Championship ពួកគេកំពុងឈរលេខ៥ បន្ទាប់ពីឈ្នះ១ និងចាញ់២ មាន៣ពិន្ទុ។

ក្រុមព្រះខ័នរាជស្វាយរៀងមានកីឡាករបរទេស៦នាក់ ក្នុងនោះមានកីឡាករឡាវ១នាក់, កីឡាករប្រេសុីល៣នាក់ និងកីឡាករជប៉ុន២នាក់។ កម្លាំងសំខាន់ក្នុងក្រុមដូចជាខ្សែប្រយុទ្ធ Pablo និងខ្សែបម្រើកណ្ដាលជនជាតិជប៉ុន Ryo Fuji កំពុងមានស្ថានភាពល្អប្រសើរឡើងវិញ ក្រោយជួបបញ្ហារបួស។ ការប្រកួត៥លើកចុងក្រោយរបស់ក្រុមទាំង២ក្នុងនោះក្រុម Thanh Hoa ស្មើ៣ និង ឈ្នះ២ ខណៈព្រះខ័នរាជស្វាយរៀង ឈ្នះ៤ និងចាញ់១៕