កីឡា

លោក ខូវ ឆាយ កំពុងសិក្សាពីករណីកីឡាករឈ្នះក្នុងទឹក១ អាចប្រកួតសប្តាហ៍បន្ទាប់

បានផុស

៤ ខែ មុន

នៅ

ថ្ងៃសុក្រ ២៤ មករា ២០២៥

ដោយ

សហព័ន្ធកីឡាគុនខ្មែរកំពុងសិក្សាពីករណីកីឡាករ កីឡាការិនីគុនខ្មែរទទួលបានជ័យជម្នះក្នុងទឹកទី១ អាចត្រូវបានអនុញ្ញាតឲ្យប្រកួតក្នុងសប្តាហ៍បន្ទាប់។

នេះបើតាមការឲ្យដឹងពីលោក ខូវ ឆាយ ប្រធានសហព័ន្ធកីឡាគុនខ្មែរ ក្រោយពេលមានការដាក់ពិន័យលើកីឡាករជាច្រើននាក់ពីបទបំពានលើលក្ខន្តិកៈនៃការប្រកួតដែលបានចែងពីកីឡាករ កីឡាការិនីម្នាក់អាចឡើងប្រកួតបាន ទាល់តែសម្រាកបាន២សប្តាហ៍។ ទោះបីជាយ៉ាងណា លក្ខន្តិកៈនៃការប្រកួតដែលត្រូវបានអនុវត្តកាលពីដើមខែមករា ឆ្នាំ២០២៥ ត្រូវបានអ្នកពាក់ព័ន្ធមួយចំនួនបានស្នើសុំឲ្យមានការបន្ធូរបន្ថយដល់កីឡាករ កីឡាការិនីដែលមានតម្លៃខ្លួនតិច និងមានជីវភាពខ្វះខាត ក្នុងនោះមានក្រុមអត្តពលិកថ្នាលផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខូវ ឆាយ បានលើកឡើងថា ៖«យើងអត់មានកត្តាវិនិច្ឆ័យថា កីឡាករណាប្រកួតហើយ មិនប៉ះពាល់ដល់រាងកាយ គ្មានការឈឺចាប់ខ្លួនប្រាណនោះទេ។ ការប្រកួតនោះរងរបួសអត់ ពេលខ្លះយើងអត់អាចធ្វើដល់ប៉ុណ្ណឹងទេ។ ការអនុវត្តគឺយើងត្រូវតែធ្វើទៅតាមគោលការណ៍ឲ្យបានស្មើៗគ្នា»។

លោកបានឲ្យដឹងថា ៖«ទោះបីជាយ៉ាងណា យើងកំពុងតែសិក្សាលើចំណុចមួយចំនួនដែលអាចអនុគ្រោះបាន។ យើងកំពុងតែពិភាក្សាគ្នា ក្នុងករណីកីឡាករវ៉ៃឲ្យដៃគូសន្លប់ក្នុងទឹកទី១។ ដូច្នេះយើងប្រហែលជាអាចបន្ធូរបន្ថយ កីឡាករណាដែលប្រកួតធ្វើឲ្យដៃគូបោះបង់ចោលការប្រកួតក្នុងទឹក១។ គាត់ចំណាយកម្លាំងតិច អាចអនុញ្ញាតឲ្យប្រកួតនូវសប្តាហ៍បន្ទាប់។ នេះគ្រាន់តែជាអ្វីដែលយើងកំពុងសិក្សា មិនទាន់សម្រេចទេ។ ប្រសិនបើយើងសិក្សាទៅឃើញថា វាត្រឹមត្រូវ យើងនឹងជូនដំណឹងពីករណីនេះ»។

កាលពីថ្ងៃទី១៥ ខែមករា ឆ្នាំ២០២៥ សហព័ន្ធគុនខ្មែរបានសម្រេចពិន័យជាការព្រមានជាសាធារណៈលើកីឡាករ១៥នាក់ ប្រព្រឹត្តខុសពីគោលការណ៍ប្រកួត។ កាលពីថ្ងៃទី២២ ខែមករា សហព័ន្ធបានពិន័យជាការព្រមានលើកីឡាករ៨នាក់ទៀត។ ការពិន័យនេះគឺជាការព្រមានជាសាធារណៈលើកទី១ ប៉ុន្តែកីឡាករនៅតែអាចឡើងប្រកួតឲ្យតែសម្រាកបាន២សប្តាហ៍។

ដោយឡែកកីឡាករ ម៉ាលី អគ្គីនេត្រ បានប្រព្រឹត្តខុសពីគោលការណ៍ប្រកួតជាលើកទី២ បន្ទាប់ពីជាប់ពិន័យលើកទី១កាលពីថ្ងៃទី១៥ ខែមករា ដូច្នេះ សហព័ន្ធគុនខ្មែរសម្រេចដាក់ពិន័យមិនឲ្យឡើងប្រកួតរយៈពេល៦សប្តាហ៍។ ប្រសិនបើប្រព្រឹត្តខុសជាលើកទី៣ នឹងត្រូវពិន័យមិនឲ្យឡើងប្រកួតរហូតដល់១២សប្តាហ៍៕