ព័ត៌មានជាតិ

តាកែវ កណ្តាល និងសៀមរាប សាងសង់បង្គោលអង់តែនទូរសព្ទបន្ថែមបាន ១៩២ ក្នុងផែនការ ៣៩៤ បង្គោល

បានផុស

១ year មុន

នៅ

ថ្ងៃសៅរ៍ ៨ កុម្ភៈ ២០២៥

ដោយ

រដ្ឋមន្រ្តីក្រសួងប្រៃសណីយ៍និងទូរគមនាគមន៍បានគូសបញ្ជាក់ថា ខេត្តគោលដៅចំនួន ៣ មានខេត្តតាកែវ កណ្តាល និងសៀមរាប បានជំរុញការអភិវឌ្ឍហេដ្ឋារចនាសម្ព័ន្ធតភ្ជាប់ រួមមានការសាងសង់បង្គោលអង់តែនទូរសព្ទបន្ថែម ដើម្បីពង្រីកវិសាលភាពការប្រើប្រាស់ឲ្យសមស្របតាមតម្រូវការ និងស្របតាមនិន្នាការនៃកំណើនសេដ្ឋកិច្ចជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងសន្និបាតបូកសរុបលទ្ធផលការងាររយៈពេល ៥ ឆ្នាំរបស់ក្រសួងប្រៃសណីយនិងទូរគមនាគមន៍ រដ្ឋមន្រ្តីក្រសួងប្រៃសណីយ និងទូរគមនាគមន៍បានគូសបញ្ចាក់ថា ក្រសួងកំពុងជំរុញការអនុវត្តផែនការសាងសង់បង្គោលអង់តែនទូរសព្ទបន្ថែមឲ្យបានចំនួន ៣ ៦៧៤ ជាមួយចំនួនស្ថានីយអង់តែនសរុប ៦ ៣៥៥ ត្រឹមឆ្នាំ ២០២៧ ខណៈបច្ចុប្បន្នបង្គោលអង់តែនកំពុងដាក់ឲ្យដំណើរការទូទាំងប្រទេសមានសរុប ១១ ៥១១ បង្គោល។

ថ្លែងនាឱកាសនោះ លោករដ្ឋមន្រ្តីក៏បានបង្ហាញពីវឌ្ឍនភាព នៃការជំរុញការសាងសង់បង្គោលអង់តែនទូរសព្ទនៅតាមរាជធានីខេត្ត ដោយនៅរាជធានីភ្នំពេញបានសាងសង់បង្គោលអង់តែនទូរសព្ទបន្ថែមបានចំនួន ៤១៦ ក្នុងផែនការ ១ ០០០ បង្គោល។ នៅខេត្តគោលដៅចំនួន ៣ មានខេត្តតាកែវ ខេត្តកណ្តាល និងខេត្តសៀមរាប បានសាងសង់បង្គោលអង់តែនទូរសព្ទបន្ថែមបានចំនួន ១៩២ ក្នុងផែនការ ៣៩៤ បង្គោល និងកំពុងបន្តសាងសង់បន្ថែមទៀតនៅតាមទីរួមខេត្ត ទីរួមស្រុក និងតំបន់ប្រជុំជនព្រមទាំងនៅតាមតំបន់ទេសចរដាច់ស្រយាល។

ជាមួយគ្នានេះ លោករដ្ឋមន្រ្តីក៏លើកឡើងបញ្ហាប្រឈម ខណៈការជំរុញឱ្យមានការវិនិយោគសាងសង់ស្ថានីយអង់តនថ្មីៗបន្ថែមទៀតនៅតាមបុរី តាមបណ្តាខណ្ឌទាំង ១៤ ក្នុងរាជធានីភ្នំពេញ និងនៅតាមបណ្តាខេត្ត ខ្វះកិច្ចសហការក្នុងការផ្ដល់ទីតាំងសម្រាប់សាងសង់ស្ថានីយអង់តែន និងការតវ៉ារារាំងមិនឱ្យសាងសង់ ដោយមានការយល់ខុសអំពីផលប៉ះពាល់សុខភាពដែលបណ្តាលមកពីស្ថានីយអង់តែនជាដើម។

បើតាមលោករដ្ឋមន្រ្តី សព្វថ្ងៃនេះសេវាទូរសព្ទបានគ្រប់ដណ្ដប់ប្រមាណ ៨០% នៅទូទាំងប្រទេស ហើយក្រសួងក៏កំពុងបន្តយកចិត្តទុកដាក់ក្នុងការពង្រឹងទាំងគុណភាព ទាំងសេវាប្រើប្រាស់ឱ្យបានល្អប្រសើរ ខណៈដែលក្រសួងដាក់ផែនការឆ្នាំ ២០២៧ នឹងពង្រីកសេវាទូរសព្ទគ្រប់ដណ្ដប់ឲ្យបានទូទាំងប្រទេសកម្ពុជា៕