ព័ត៌មានអន្ដរជាតិ

ក្រុមហ៊ុនបារាំងផ្អាកគម្រោងវារីអគ្គីសនី១.៥ពាន់លានដុល្លារនៅមីយ៉ាន់ម៉ា ក្រុមហ៊ុនបរទេសជាច្រើនទៀតក៏ដកខ្លួន

បានផុស

៥ years មុន

នៅ

ថ្ងៃអាទិត្យ ២១ មីនា ២០២១

ដោយ

ក្រុមហ៊ុនថាមពលយក្សរបស់ប្រទេសបារាំង Électricité de France បានផ្អាលគម្រោងវារីអគ្គីសនីរបស់ខ្លួនដែលមានទឹកប្រាក់១.៥ពាន់លានដុល្លារអាមេរិកនៅរដ្ឋសាន ក្នុងប្រទេសមីយ៉ាន់ម៉ាដោយសារកង្វល់ជុំវិញសិទ្ធិមនុស្ស ខណៈរបបយោធាមីយ៉ាន់ម៉ានៅតែបន្តប្រើកម្លាំងសាហាវឃោឃៅបង្ក្រាបអ្នកតវ៉ាប្រឆាំងរដ្ឋប្រហារទូទាំងប្រទេស។

គិតត្រឹមថ្ងៃសុក្រកន្លងទៅនេះ ជនស៊ីវិលជាង២៣០នាក់ត្រូវបានកម្លាំងសន្តិសុខមីយ៉ាន់ម៉ាសម្លាប់ក្នុងការបង្ក្រាបលើបាតុករដោយសន្តិវិធីទូទាំងប្រទេស។

ក្រុមហ៊ុន Électricité de France (EDF) បានជូនដំណឹងដល់ក្រុមសិទ្ធិមនុស្សកាលពីថ្ងៃសុក្រថា ខ្លួនបានផ្អាកគម្រោងអភិវឌ្ឍ Shweli-3 Project រួមទាំងសកម្មភាពអ្នកម៉ៅការបន្តរបស់ខ្លួន។ ដឹកនាំដោយ EDF គម្រោង៦៧១មេហ្គាវ៉ាត់បានកំពុងអភិវឌ្ឍរួមជាមួយក្រុមហ៊ុន Marubeni Corporation របស់ជប៉ុន និងក្រុមហ៊ុនរបស់មីយ៉ាន់ម៉ា Ayeyar Hinthar។

ក្រុមហ៊ុនទាំងនោះបានទទួលគម្រោងអភិវឌ្ឍកាលពីឆ្នាំ២០១៨ក្រោមរដ្ឋាភិបាលដឹកនាំដោយគណបក្សសម្ព័ន្ធជាតិដើម្បីប្រជាធិបតេយ្យ។ គម្រោងត្រូវបានរំពឹងថា នឹងផលិតអគ្គីសនីបាន៣ពាន់លានគីឡូវ៉ាត់ម៉ោងជារៀងរាល់ឆ្នាំសម្រាប់បណ្តាញអគ្គីសនី និងផ្គត់ផ្គង់ដល់ប្រជាពលរដ្ឋជាង៨.៥លាននាក់ទូទាំងប្រទេស។

ក្នុងខែកុម្ភៈ មេដឹកនាំរដ្ឋប្រហារនាយឧត្តមសេនីយ៍ Min Aung Hlaing បាននិយាយថា របបយោធានឹងបន្តគម្រោងវារីអគ្គីសនីដែលមានស្រាប់។

ទោះបីជាយ៉ាងណា ចាប់តាំងពីរដ្ឋប្រហារ ១កុម្ភៈមក កង្វល់សិទ្ធិមនុស្សក្នុងចំណោមវិនិយោគិនបរទេសបានធ្វើឲ្យប្រទេសមីយ៉ាន់ម៉ាបាត់បង់ឱកាសដើម្បីអនុវត្តគម្រោងដែលមានទឹកប្រាក់រាប់ពាន់លានដុល្លារអាមេរិក។

កាលពីដើមខែកុម្ភៈ គម្រោងឧស្សាហកម្មទំនើបដែលមានទឹកប្រាក់១ពាន់លានដុល្លារអាមេរិកវិនិយោគដោយក្រុមហ៊ុនឧស្សាហកម្មអចលនទ្រព្យធំបំផុតរបស់ប្រទេសថៃ Amata Corporation ក៏ត្រូវបានផ្អាកដែរ ដោយសារភ័យខ្លាចពីទណ្ឌកម្មដែលត្រូវដាក់ដោយប្រទេសមហាអំណាចលោកខាងលិច។

ក្រុមហ៊ុនភេសជ្ជៈជប៉ុន Kirin ក៏បានបញ្ឈប់ភាពជាដៃគូពាណិជ្ជកម្មផលិតស្រាបៀរជាមួយក្រុមហ៊ុន Myanma Economic Holdings Public Co. Ltd ដែលជាក្រុមហ៊ុនធំមានម្ចាស់ជាយោធាមីយ៉ាន់មា (MEHL) បន្ទាប់ពីរដ្ឋប្រហារ។

លើសពីនេះទៀត អ្នកជំនួញសិង្ហបុរីលេចធ្លោលោក Lim Kaling បានដកខ្លួនចេញពីការបណ្តាក់ទុនជាមួយក្រុមហ៊ុន MEHL ដែលបានធ្វើអាជីវកម្មបារីដ៏ល្បីបំផុតនៅក្នុងប្រទេស។

EDF បាននិយាយថា ខ្លួនប្រកាន់ភ្ជាប់នូវគោលការណ៍សិទ្ធិមនុស្សជាមូលដ្ឋាន និងអនុសញ្ញានៃអង្គការពលកម្មអន្តរជាតិ ព្រមទាំងគោលការណ៍ណែនាំរបស់អង្គការសហប្រជាជាតិស្តីពីពាណិជ្ជកម្ម និងសិទ្ធិមនុស្ស នៅគ្រប់ផ្នែកដែលចូលរួម។

ក្រុមហ៊ុននិយាយថា ខ្លួនកំពុងតាមដានការវិវត្តនៅក្នុងប្រទេសមីយ៉ាន់ដោយសហការយ៉ាងជិតដិតជាមួយប្រទេសបារាំង និងអាជ្ញាធរសហភាពអឺរ៉ុប៕

ប្រែសម្រួល៖ វីរបុត្រ
ប្រភព៖ Irrawaddy