បង្ក្រាបហាងផឹកស៊ីបង្កប់សេវាកម្មផ្លូវភេទមួយកន្លែងក្នុងមូលដ្ឋានខណ្ឌ​សែនសុខ ឃាត់ខ្លួននារីជាង២០នាក់

កម្លាំងនាយកដ្ឋាននគរបាលប្រឆាំងការជួញដូរមនុស្ស និងការពារអនិតិជន សហការជាមួយកម្លាំងមូលដ្ឋានខណ្ឌសែនសុខ ចុះបង្រ្កាបទីតាំងហាងផឹកស៊ីមួយកន្លែងយីហោ ម្លប់ធ្នង់ មានលាភ ពាក់ពន្ធ័ករណីជួញដូរផ្លូវភេទ និងឃាត់ខ្លួននារីជាង២០នាក់។

ប្រតិបត្តិការនេះបានធ្វើឡើងនៅវេលាម៉ោងជាង១១យប់ ថ្ងៃទី២៤ ខែកុម្ភៈ ឆ្នាំ២០២៥ នៅតាមបណ្ដោយផ្លូវ ១៩៥២ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ប្រភពពីនគរបាលជំនាញបានឲ្យដឹងថា មុនឈានដល់ការចុះបង្ក្រាបទីតាំងហាង ម្លប់ធ្នង់ មានលាភ នេះ គឺមានសេចក្ដីរាយការណ៍មកថា ក្នុងទីតាំងហាងនេះ មានបង្កប់ដោយនារីបម្រើសេវាផ្លូវភេទជាច្រើននាក់នៅក្នុងហាង។ មន្ត្រីជំនាញថា ក្នុងករណីភ្ញៀវដែលមកផឹកស៉ី ស្រវឹងហើយត្រូវការនារីមប្រើសេវាផ្លូវភេទ ហើយតថ្លៃត្រូវគ្នា ក៏មានសេវានោះតែម្ដង។

ក្នុងរង្វង់ប្រតិបត្តិការនេះ កម្លាំងនគរបាលបានឃាត់មនុស្សស្រីជាង២០នាក់ និងអ្នកគ្រប់គ្រងទីតាំងហាងយកទៅនាយកដ្ឋាននគរបាលប្រឆាំងការជួញដូរមនុស្ស និងការពារអនិតិជន នៃអគ្គស្នងការនគរបាលជាតិ ដើម្បីអនុវត្តបន្តតាមនីតិវិធី៕

អត្ថបទ៖ សុភា