ព័ត៌មានអន្ដរជាតិ

គីម ជុងអ៊ុន អំពាវនាវឲ្យបង្កើតកងទ័ពទំនើប ត្រៀមទុកសម្រាប់សង្គ្រាម

បានផុស

១ year មុន

នៅ

ថ្ងៃពុធ ២៦ កុម្ភៈ ២០២៥

ដោយ

Chheang

ក្នុងអំឡុងពេលទស្សនកិច្ចទៅកាន់សាលាយោធា មេដឹកនាំកូរ៉េខាងជើង លោក គីម ជុងអ៊ុន បានអំពាវនាវឲ្យមានការកសាងកងទ័ពដ៏រឹងមាំ និងទំនើប ដើម្បីត្រៀមទប់ទល់នឹងសង្គ្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ទីភ្នាក់ងារព័ត៌មានរដ្ឋ KNCA នៅថ្ងៃពុធទី២៦ខែកុម្ភៈឆ្នាំ២០២៥ លោក គីម បានរិះគន់ការគ្រប់គ្រង និងប្រតិបត្តិការមិនល្អរបស់សាលា ដោយនិយាយថា សាលាមិនបានបំពេញតាមការចង់បានរបស់គណបក្សកាន់អំណាចពាក់ព័ន្ធនឹង«ទំនើបកម្ម និងលក្ខណៈសម្បត្តិជឿនលឿន» ក្នុងការកសាងកងទ័ពដ៏មានឥទ្ធិពល។

លោកបានបញ្ជាឲ្យមានការកែលម្អគ្រឿងបរិក្ខារឡើងវិញ និងពង្រឹងការអប់រំផ្តោតលើការអនុវត្ត ដើម្បីឲ្យសិស្សបានស្វែងយល់អំពី «បទពិសោធន៍ជាក់ស្តែងនៃសង្គ្រាមសម័យទំនើប» និងដើម្បីធ្វើជាម្ចាស់លើអាវុធទំនើបៗ និងឧបករណ៍បច្ចេកទេស។

មេដឹកនាំវ័យ៤១ឆ្នាំរូបនេះ បានបន្ថែមថា៖ «ស្ថានភាពអន្តរជាតិបច្ចុប្បន្ន ដែលមានលក្ខណៈឆេវឆាវ និងបះបោររបស់ពួកចក្រពត្តិនិយម ត្រូវបានបង្ហាញយ៉ាងបើកចំហបំផុតក្នុងប្រវត្តិសាស្ត្រ ហើយសង្រ្គាម និងការបង្ហូរឈាមក្លាយជារឿងធម្មតា ទាមទារឲ្យកងកម្លាំងប្រដាប់អាវុធត្រូវត្រៀមទប់ទល់នឹងសង្រ្គាមយ៉ាងល្អឥតខ្ចោះជាទីបំផុត»។

ដំណើរទស្សនកិច្ចរបស់លោក គីម ទៅកាន់បណ្ឌិតសភាយោធា Kang Kon ធ្វើឡើងបន្ទាប់ពីកូរ៉េខាងជើងបានបញ្ជូនទាហានរាប់ពាន់នាក់ទៅកាន់រុស្ស៊ី ដើម្បីគាំទ្រសង្រ្គាមប្រឆាំងនឹងអ៊ុយក្រែន។ ក្នុងសប្តាហ៍នេះ លោក គីម ក៏បានទៅទស្សនាសាកលវិទ្យាល័យនយោបាយ Kim Il Sung ផងដែរ ដោយនៅទីនោះលោកបានអំពាវនាវឲ្យយោធាត្រូវមានភក្តីភាព និងការលះបង់។

ទីភ្នាក់ងារស៊ើបការណ៍សម្ងាត់របស់ប្រទេសកូរ៉េខាងត្បូង បាននិយាយថា ការត្រួតពិនិត្យអង្គភាពយោធា និងការហ្វឹកហ្វឺនរបស់លោក គីម អាចជាផ្នែកមួយនៃការរៀបចំសម្រាប់ការបញ្ជូនទាហានបន្ថែមទៅកាន់រុស្ស៊ី។

មន្ត្រីកូរ៉េខាងត្បូង បានព្រមានថា កូរ៉េខាងជើងអាចទទួលបានអត្ថប្រយោជន៍ពីការផ្គត់ផ្គង់សព្វាវុធ និងកងទ័ពដើម្បីប្រយុទ្ធក្នុងប្រទេសរុស្ស៊ី ដោយទទួលបានបទពិសោធន៍ និងការយល់ដឹងពីប្រតិបត្តិការលើសមរភូមិទំនើប។

ប្រទេសអ៊ុយក្រែន កន្លងមកបានប្រាប់ថា កងកម្លាំងកូរ៉េខាងជើងបានរងរបួសយ៉ាងច្រើននៅក្នុងប្រទេសរុស្ស៊ី ដោយមានទាហានជាង ៣០០០នាក់បានស្លាប់ ឬរងរបួសនៅដើមខែមករាឆ្នាំនេះ៕

ដោយ៖ ឈាង