នាយករដ្ឋមន្ត្រីបញ្ជាឱ្យសម្រួលការថតកុនបង្ហាញពីការពិតនៅកម្ពុជាវាយបកទៅព័ត៌មានអាក្រក់

នាយករដ្ឋមន្ត្រី សម្ដេចធិបតី ហ៊ុន ម៉ាណែត បាន​បញ្ជាទៅក្រសួងទេសចរណ៍ ពិភាក្សាជាមួយក្រសួងវប្បធម៌ និងផ្នែកពាក់ព័ន្ធក្នុងការជួយសម្រួលដល់ក្រុមហ៊ុនថតកុនទាំងក្នុងស្រុក និងបរទេស ឱ្យថតភាពយន្តបង្ហាញពីការពិតនៅកម្ពុជាទប់ទល់ទៅនឹងព័ត៌មាន និងភាពយន្តដែលបំផ្លាញឈ្មោះកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបិទសន្និបាតការងារក្រសួងទេសចរណ៍រសៀលថ្ងៃទី២៧ ខែកុម្ភៈ សម្ដេចធិបតី ហ៊ុន ម៉ាណែត បានថ្លែងថាការផ្សព្វផ្សាយជាកិច្ចការសំខាន់ក្នុងការទាក់ទាញទេសចរណ៍មកកម្ពុជា។

សម្ដេចថា៖ «កន្លងទៅដោយសារមានរឿងមួយដែលផ្សព្វផ្សាយពីរឿងអនឡាញដែលធ្វើឱ្យប៉ះពាល់​និងការយល់ច្រលំដល់កម្ពុជា យើងត្រូវថតឱ្យច្រើនដើម្បីផ្សព្វផ្សាយថាកម្ពុជាសុវត្ថិភាព ថតឱ្យច្រើនដើម្បីបង្ហាញនូវទឹកដីដ៏ល្អ និងប្រជាជន​ដ៏ល្អរបស់យើង»។

សម្ដេចថាបើមានក្រុមហ៊ុនថតភាពយន្តអន្តរជាតិមកហើយនោះគឺជាឱកាស ដូច្នេះសូមចាប់យកឱកាសនេះសម្រួលឱ្យពួកគេមានភាពងាយស្រួលក្នុងការបំពេញការងារនៅកម្ពុជា។

ក្នុងឆ្នាំ២០២៣ ខ្សែភាពយន្តចិនមួយដែលមានចំណងជើងថា No More Bets បានបង្ហាញពីឱក្រិដ្ឋកម្មបោកប្រាស់តាមអនឡាញដែលតាមសាច់រឿងត្រូវបានគេមើលឃើញថាធ្វើឱ្យប៉ះពាល់ដល់កម្ពុជានិងប្រទេសមួយចំនួនផ្សេងទៀតនៅអាស៊ាន។ ភាពយន្តនេះត្រូវបានក្រសួងវប្បធម៌ស្នើសុំទៅចិនកុំ​ឱ្យមានការផ្សព្វផ្សាយផងដែរ ខណៈអ្នកនាំពាក្យក្រសួងមហាផ្ទៃបានចាត់ទុករឿងនេះជាការលាបព័ណ៌មកលើកម្ពុជា៕

អត្ថបទដោយ ហ៊ុន សិរីវឌ្ឍន៍