ភ្លៀងលាយឡំខ្យល់កន្ត្រាក់បំផ្លាញផ្ទះពលរដ្ឋ៣ភូមិ​អស់ ៥៤ខ្នង

ផ្ទះប្រជាពលរដ្ឋចំនួន ៥៤ខ្នងត្រូវបានបំផ្លាញខ្ទេចខ្ទីយ៉ាងដំណំ ឯដើមឈើក៏រលំជាច្រើនដើម ខណៈដែលមានភ្លៀងធ្លាក់មួយមេយ៉ាងធំ ហើយក៏មានខ្យល់កន្ត្រាក់បោកបក់មកតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោះធម្មជាតិដ៏អាក្រក់នេះបានកើតឡើងកាលពីថ្ងៃទី១២ ខែមីនា ឆ្នាំ២០២៥ វេលាម៉ោងប្រហែល ៤និង៤៥នាទីល្ងាច ក្នុងឃុំអូរដំបង១ ស្រុកសង្កែ ខេត្តបាត់ដំបង។

យោងតាមរបាយការណ៍របស់សមត្ថកិច្ចបានបញ្ជាក់ថា ក្នុងនោះ ១.ភូមិអូរស្រឡៅ ខូចខាតអស់ចំនួន ៣៧ខ្នង ដោយខូចខាត ស័ង្កសី អស់ចំនួន៦៧៥សន្លឹក និងខូចខាតទាំងស្រុងផ្ទះមួយខ្នងដែលម្ចាស់ឈ្មោះ ឡៃ ខ្លុយ ភេទប្រុស អាយុ៦២ឆ្នាំរស់នក្រុម១ ភូមិអូរស្រឡៅ ឃុំអូរដំបង២ ស្រុកសង្កែ។ តែផ្ទះនេះមានតម្កល់ជើងតាងត្រូវដួលរលំរាបស្មើដល់ដី។ ២.ភូមិអូរខ្ជាយ ខូចខាតអស់ចំនួន ៦ខ្នង ខូចខាតស័ង្កសី អស់ចំនួន២០០សន្លឹក។ និង៣. ភូមិវត្តចែង ខូចខាតអស់ចំនួន១១ខ្នង ដោយរបើករបាញស័ង្កសី អស់៣០០សន្លឹក ។ ប៉ុន្តែសម្រាប់គ្រោះធម្មជាតិខាងលើគឺពុំបានបង្កឲ្យមានផលប៉ះពាល់ដល់អាយុជីវិតមនុស្សឬសត្វឡើយ៕

អត្ថបទ៖ សោ និយមរ័ត្ន