ព័ត៌មានជាតិ

អ្នកនាំពាក្យ៖ គ្រឹះស្ថានសិក្សាចំនួន២ទៀត មានពាក់ព័ន្ធនឹងករណីរដ្ឋមន្ត្រីការបរទេសប្រទេសហុងគ្រី

បានផុស

៥ years មុន

នៅ

ថ្ងៃសៅរ៍ ៧ វិច្ឆិកា ២០២០

ដោយ

លោក រស់ សុវាចា អ្នកនាំពាក្យក្រសួងអប់រំយុវជន និងកីឡា បានឲ្យដឹងនៅព្រឹកថ្ងៃទី៧ ខែវិច្ឆិកា នេះថា ក្រសួងបានរកឃើញគ្រឹះស្ថានសិក្សា ចំនួន២ទៀត ពាក់ព័ន្ធនឹងករណីរដ្ឋមន្ត្រីការបរទេសប្រទេសហុងគ្រី ដែលធ្វើឲ្យចំនួនសាលាកើនឡើងដល់ទៅ៦សាលាហើយ។

លោកបានបន្តថា«គិតត្រឹមយប់ថ្ងៃទី០៦ ខែវិច្ឆិកា ឆ្នាំ២០២០ ក្រសួងអប់រំ យុវជន និងកីឡាបានរកឃើញគ្រឹះស្ថានសិក្សាឯកជនចំនួន២ទៀត (សរុបមានចំនួន០៦គ្រឹះស្ថានសិក្សា) ពាក់ព័ន្ធនឹងករណីគណ:ប្រតិភូនៃប្រទេសហុងគ្រី»។

លោកបានបន្ថែមថា គណៈគ្រប់គ្រងនៃគ្រឹះស្ថានសិក្សាទាំងនេះ បានចាត់ចែងអនុវត្តវិធានការ តាមការណែនាំរបស់ក្រសួងសុខាភិបាល យ៉ាងខ្ជាប់ខ្ជាន់ រួចបានផ្អាកដំណើរការសិក្សាក្នុងថ្នាក់រៀនតាមការចាំបាច់ និងបន្តការសិក្សាតាមអនឡាញរយៈពេល១៤ថ្ងៃ។ លោកបានបញ្ជាក់ថា គ្រឹះស្ថានសិក្សាទី៦ មានសិស្ស២រូប មានមាតាបិតា ដែលបានទទួលទានអាហារជាមួយអ្នក ដែលបានប៉ះពាល់ជាមួយគណៈប្រតិភូនៃប្រទេសហុងគ្រី និងគ្រឹះស្ថានសិក្សាទី៥ មានសិស្ស២រូបទៀត ដែលមានមាតាបិតាបានប៉ះពាល់ជាមួយគណៈប្រតិភូនៃប្រទេសហុងគ្រី។

បើតាមក្រសួងសុខាភិបាលបានឲ្យដឹងថា សម្រាប់អ្នកប៉ះពាល់ជាមួយរដ្ឋមន្ត្រីក្រសួងការបរទេស និងពាណិជ្ជកម្មហុងគ្រី នៅថ្ងៃទី០៦ ខែវិច្ឆិកា ឆ្នាំ២០២០ ចំនួន៤៩នាក់ថែមទៀត ត្រូវបានធ្វើតេស្ត តែលទ្ធផលពីវិទ្យាស្ថានប៉ាស្ទ័រកម្ពុជា គឺអវិជ្ជមានទាំងអស់ ក្នុងនោះរួមមាន មាតាបិតារបស់សិស្សផងដែរ។ បើបូកទាំងថ្ងៃទី០៤ ០៥ និង ០៦ ខែវិច្ឆិកា ឆ្នាំ២០២០ មានអ្នកប៉ះពាល់ទាំងអស់ចំនួន ៨៨៩នាក់ ដែលមានលទ្ធផលអវិជ្ជមានកូវីដ១៩ទាំងអស់៕

អត្ថបទ៖ សំអឿន

សូមចុចអាន៖ អ្នកនាំពាក្យក្រសួងអប់រំ៖ ក្រសួងបានផ្អាកគ្រឹះស្ថានសិក្សាចំនួន៤ពាក់ព័ន្ធនឹងករណីរដ្ឋមន្ត្រីការបរទេសប្រទេសហុងគ្រី

Related Topics:ក្រសួងអប់រំ យុវជន និងកីឡា