បេសកជន​អាមរិក ស្នើ​ផែនការ​កាត់​​តំបន់​ចំនួន​៤​ឲ្យ​រុស្ស៊ី ជា​ថ្នូរ​នឹងបទ​ឈប់បាញ់

យោង​តាម​ការ​ចុះផ្សាយ​​​នៅ​ថ្ងៃ​ទី​១២​ខែ​មេសា​ឆ្នាំ​២០២៥​​របស់សារព័ត៌មាន​ New Voice of Ukraine បេសកជនពិសេសរបស់សហរដ្ឋអាមេរិក លោក Steve Witkoff បានស្នើផែនការដ៏ចម្រូងចម្រាសមួយ គឺ​ការ​ប្រគល់តំបន់ភាគខាងកើតអ៊ុយក្រែនចំនួនបួន ដូចជា Donetsk, Luhansk, Zaporizhzhia និង Kherson ទៅ​ឲ្យ​រុស្ស៊ី សម្រាប់​ជាផ្នែក​មួយ​នៃកិច្ចព្រមព្រៀងឈប់បាញ់។

លោក Witkoff បាន​និយាយ​ថា៖ «វិធី​លឿន​ជាង​គេ​ដើម្បី​ឈាន​ដល់​បទ​ឈប់បាញ់​នៅ​អ៊ុយក្រែន គឺ​គាំទ្រ​យុទ្ធសាស្ត្រ​ដែល​នឹង​ផ្ដល់​​ឲ្យ​រុស្ស៊ី​នូវ​ភាព​ជាម្ចាស់​នៃ​តំបន់​ភាគ​ខាង​កើត​អ៊ុយក្រែន​ទាំង​បួន ដូច​អ្វី​ដែល​រុស្ស៊ី​ប៉ុនប៉ង​កាត់​​យក​ជា​ទឹក​ដី​របស់​ខ្លួន​ដោយ​ខុសច្បាប់​កាល​ពី​ឆ្នាំ​២០២២»។

លោក Witkoff ដែលជាសហការីជិតស្និទ្ធរបស់ប្រធានាធិបតី ដូណាល់ ត្រាំ បានបង្ហាញគំនិតនេះក្នុងអំឡុងពេលកិច្ចប្រជុំនៅសេតវិមាន ទោះបីជាមានការប្រឆាំងយ៉ាងខ្លាំងពីឥស្សរជនដូចជា​លោក Keith Kellogg បេសកជន​ពិសេស​អាមេរិក​​នៅ​អ៊ុយក្រែន និងការបដិសេធយ៉ាង​ដាច់​ណាត់​ពី​ក្រុង​កៀវ ក៏​ដូចជា​សម្ព័ន្ធមិត្តលោកខាងលិចក៏ដោយ។

ក្រុមអ្នករិះគន់អះអាងថា ជំហររបស់​លោក Witkoff បំផ្លាញអធិបតេយ្យភាពអ៊ុយក្រែន និងអាចជំរុញសកម្មភាពឈ្លានពានរបស់រុស្ស៊ី ដោយ​លើក​ឡើង​ថា អសមត្ថភាពការទូតរបស់គាត់ និងកង្វះគោលនយោបាយ​បង្រួបបង្រួម​របស់​អាមេរិក បានបង្ក​ឲ្យ​មានការភាន់ច្រឡំ ដែលអាចធ្វើ​ឲ្យ​ប៉ះពាល់ដល់ស្ថិរភាពក្នុងតំបន់។

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បាននិយាយយ៉ាងខ្ជាប់ខ្ជួនថា អ៊ុយក្រែននឹងមិនទទួលស្គាល់​ជា​ដាច់​ខាត​នូវ​ការ​កាត់​​យក​​ទឹកដីដែល​រុស្ស៊ី​កាន់កាប់ រួមទាំងតំបន់​គ្រីមៀ​ផងដែរ។ សំណើ​នេះ​ក៏​បាន​បង្ក​ភាព​តានតឹង​ក្នុង​ចំណោម​ប្រជាជន​អ៊ុយក្រែន​ដែល​ភៀស​ខ្លួន​ដែល​បារម្ភ​ថា ​សម្បទាន​បែប​នេះ​អាច​រារាំង​ពួកគេ​មិន​ឲ្យ​​ត្រឡប់​ទៅ​ផ្ទះ​វិញ​ជា​អចិន្ត្រៃយ៍៕

ដោយ៖ ឈាង