លោក Oleg ថា បាល់ទាត់កម្ពុជាពិតជារីកចម្រើន ក្រោយព្រះខ័នរាជស្វាយរៀងឡើងវគ្គផ្តាច់ព្រ័ត្រ ACL

គ្រូបង្វឹកក្លិបភ្នំពេញក្រោន លោក Oleg Starynskyi បានលើកឡើងពីអារម្មណ៍ផ្ទាល់ខ្លួន ក្រោយក្លិប ព្រះខ័នរាជស្វាយរៀង ឡើងទៅកាន់វគ្គផ្តាច់ព្រ័ត្រពាន AFC Challenge League រដូវកាល ២០២៤-២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសសញ្ជាតិ អ៊ុយក្រែន វ័យ ៣៩ ឆ្នាំយល់ថា បាល់ទាត់កម្ពុជាបច្ចុប្បន្នពិតជារីកចម្រើនពិតមែន បន្ទាប់ពី ព្រះខ័នរាជស្វាយរៀង សាងកំណត់ត្រាដ៏ល្អនៅក្នុងពានរង្វាន់កម្រិតអន្តរជាតិ។ ជាមួយគ្នានេះ លោកក៏បានរម្លឹកពីស្នាដៃរបស់ ភ្នំពេញក្រោន នៅក្នុងពានក្លិបលំដាប់ទី ២ ប្រចាំទ្វីបអាស៊ី AFC Cup កាលពីរដូវកាលមុនផងដែរ ដោយពេលនោះក្រុមរបស់លោកបានឡើងដល់វគ្គពាក់កណ្តាលផ្តាច់ព្រ័ត្រប្រចាំតំបន់ ប៉ុន្តែចុងក្រោយបានចាញ់ក្រុម Central Coast Mariners ក្នុងលទ្ធផល ៤-០។

ថ្លែងនៅក្នុងសន្និសីទសារព័ត៌មានមុនការប្រកួតរវាង ភ្នំពេញក្រោន ទល់នឹង វិសាខា កាលពីល្ងាចថ្ងៃទី ១៨ ខែ មេសា ម្សិលមិញ លោក Oleg បានមានប្រសាសន៍ថា ៖«ខ្ញុំគិតថា នេះគឺជាសញ្ញា​វិជ្ជមានមួយ​ដ៏ល្អ។ ក្នុងនាមខ្ញុំជាគ្រូបង្វឹក ខ្ញុំធ្វើការងាររបស់ខ្ញុំ លោក Pep Munoz (គ្រូព្រះខ័នរាជស្វាយរៀង) ធ្វើការងាររបស់គាត់។ ខ្ញុំគិតថា បាល់ទាត់កម្ពុជាយើងពិតជាមានភាពរីកចម្រើន។ ខ្ញុំ​​ក៏​បានចូលរួមជួយឱ្យបាល់ទាត់កម្ពុជា ដូចជាកាលពីរដូវកាលមុន។ ភាពប្រសើរឡើង​ជា​មួយនឹងការលេងនៅពាន AFC។ យើងបានលេង ៩ ប្រកួត ដែលការប្រកួតនោះសុទ្ធតែជាការប្រកួតលំបាក ហើយយើងក៏បានបំបែកកំណត់ត្រាមួយចំនួនផងដែរ ដែលនេះគឺជារឿងល្អ»។

លោក Oleg បានជូនពរក្រុម ព្រះខ័នរាជស្វាយរៀង ឱ្យទទួលបានជ័យជម្នះ ដើម្បីបាល់់ទាត់កម្ពុជា ក្នុងនោះលោកបានមានប្រសាសន៍ថា៖ «ខ្ញុំអត់មានអ្វីទេ ក្រៅពីការជូនពរឱ្យពួកគេទទួលបានសំណាងល្អក្នុងការប្រកួតចុងក្រោយ និងទទួលបានពានរង្វាន់ ដើម្បីបង្ហាញទៅកាន់ពិភពលោកអំពីបាល់ទាត់កម្ពុជារបស់យើង»។

សូមបញ្ជាក់ជាថ្មីថា ក្រុមព្រះខ័នរាជស្វាយរៀង នឹងត្រូវជួបជាមួយក្រុមមកពី តួកមេនីស្ថាន FK Arkadag ក្នុងការប្រកួតពាន AFC Challenge League នៅពហុកីឡដ្ឋានជាតិមរតកតេជោ ថ្ងៃ សៅរិ៍ ទី ១០ ខែ ឧសភា ឆ្នាំ ២០២៥៕

អត្ថបទ៖ សេម កុសល