Nike និង Adidas ស្នើឱ្យ ត្រាំ លើកលែងពន្ធ ដោយខ្លាចត្រូវបិទទ្វារអាជីវកម្ម

​ក្រុមហ៊ុនផលិតស្បែកជើង និងសម្លៀកបំពាក់អន្តរជាតិ​ធំៗ រួមទាំង Nike និង Adidas ដែល​ពឹង​ផ្អែកលើមជ្ឈមណ្ឌលផលិតកម្មនៅវៀតណាម​សម្រាប់ការនាំចេញ កំពុងស្នើសុំប្រធានាធិបតីអាមេរិក លោក ដូណាល់ ត្រាំ ឱ្យលើកលែងពន្ធ ​ក្រោមក្ដីបារម្ភអំពីកំណើនថ្លៃដើមផលិត ​និងការបិទអាជីវកម្ម។ នេះបើតាមការចុះផ្សាយរបស់កាសែត The Investor កាលពីចុងសប្ដាហ៍មុន។

ក្នុងលិខិតស្នើសុំផ្ញើទៅកាន់សេតវិមានកាលពីសប្ដាហ៍មុន អង្គការអ្នកចែកចាយស្បែកជើង និងអ្នកលក់រាយរបស់អាមេរិក តំណាងឱ្យក្រុមហ៊ុនផលិតស្បែកជើងធំៗ បាននិយាយថា​ ពន្ធគយបដិការរបស់ ត្រាំ បង្កជា «ការគំរាមកំហែង​អត្ថិភាព​» ដល់ឧស្សាហកម្មស្បែកជើង។

លិខិតនេះ ត្រូវបានចុះហត្ថលេខាដោយម៉ាកស្បែកជើងជាច្រើន ចំនួន ៧៦ រួមមានក្រុមហ៊ុន Nike, Adidas, Skechers និង Under Armour ជាដើម។

លិខិតដដែលសរសេរយ៉ាងដូច្នេះថា៖ «ក្រុមហ៊ុនជាច្រើន ដែលផលិតស្បែកជើង​មានតម្លៃសមរម្យសម្រាប់គ្រួសារ​មានប្រាក់ចំណូលទាប និងមធ្យម​ មិនអាចសម្រប​នឹងអត្រាពន្ធខ្ពស់នេះទេ ហើយក៏មិនអាចបង្កើនការចំណាយសម្រាប់អតិថិជនដែរ។ ​បើគ្មាន​ការបន្ធូរបន្ថយពន្ធគយបដិការភ្លាមៗទេ ពួកគេនឹងបិទទ្វារ»។

គួរគូសបញ្ជាក់ថា ត្រាំ បានប្រកាសដាក់ពន្ធគយធ្ងន់ធ្ងរលើចិន និងប្រទេសនៅអាស៊ានរួមមានវៀតណាម ឥណ្ឌូណេស៊ី កម្ពុជា ដែលសុទ្ធសឹងតែជាប្រទេសផលិតស្បែកជើងសំខាន់សម្រាប់ក្រុមហ៊ុនអន្តរជាតិដូចជា Nike និង Adidas ជាដើម។ ក្រុមហ៊ុនទាំងនោះ មាន​សហរដ្ឋអាមេរិកគឺជាទីផ្សារដ៏សំខាន់មួយ៕