ក្រុម​ប្រដាប់​អាវុធ​​គ្រឿងញៀន​បាញ់ប្រហារ​ទាហាន​​ឡាវចូលដល់​ទឹកដីថៃ​

ក្រុមប្រដាប់អាវុធបានវាយប្រហារសម្លាប់ទាហានឡាវយ៉ាងតិច២នាក់ក្បែរព្រំដែនថៃ ដែលហេតុការណ៍នេះទំនងជាការសងសឹកពីក្រុមប្រដាប់អាវុធចំពោះការរឹបអូសថ្នាំមេតំហ្វេតាមីនចំនួន២០លានគ្រាប់របស់អាជ្ញាធរឡាវកាលពីខែមុន។ នេះបើយោងរតាមការចេញផ្សាយរបស់សារព័ត៌មាន​ The Nation នៅថ្ងៃទី០៥ខែឧសភានេះ។

យោងតាមសេចក្តីរាយការណ៍ មានការវាយប្រហារដោយក្រុមប្រដាប់អាវុធមិនស្គាល់អត្តសញ្ញាណនៅលើមូលដ្ឋានយោធាឡាវ។ ទាហានឡាវយ៉ាងហោចណាស់ពីរនាក់ត្រូវបានសម្លាប់ក្នុងអំឡុងពេលប៉ះទង្គិចគ្នា ដែលក្នុងនោះមានម្នាក់មានឋានៈជាវរសេនីយ៍ឯក។

មានគ្រាប់កាំភ្លើងជាច្រើនដែលបាញ់ចេញពី Ban Phu Pha Mon ស្រុក Paktha ខេត្ត Bokeo ក្នុងប្រទេសឡាវ បាញ់ចូលទីតាំងជាច្រើននៅជិតទន្លេមេគង្គ ដែលជាព្រំដែនរវាងប្រទេសថៃ និងឡាវ។ រួមទាំងការ​បាញ់​ប្រហារ​ជា​ច្រើន​គ្រាប់ក្នុង​ស្រុក Wiang Kaen ខេត្តឈៀងរ៉ៃ។

ជា​លទ្ធផល​នៃ​ការ​ប៉ះ​ទង្គិច​គ្នា គ្រាប់​កាំភ្លើង ៧.៦២ មីល្លីម៉ែត្រ បាន​ធ្លាក់​មក​លើ​ទឹក​ដី​ថៃ ទម្លុះ​ដំបូល​ផ្ទះ​មួយ​ខ្នង នៅតំបន់ Por ​ស្រុក Wiang Kaen ខេត្តឈៀងរ៉ៃ តែមិន​មាន​​របាយការណ៍​ពី​​អ្នក​រងរបួស​​ក្នុងទឹកដីថៃ​ទេ។ ជាការឆ្លើយតប ទាហាន​ថៃ​មកពីក្រុមការងារ Pha Muang ត្រូវបានដាក់ពង្រាយតាមព្រំដែន ដើម្បីតាមដានស្ថានការណ៍យ៉ាងដិតដល់។

ជាមួយ​គ្នានេះ លោក Kidakorn Chantra មេបញ្ជាការនៃក្រុមការងារ Pha Muang បានចេញលិខិតផ្លូវការមួយទៅកាន់​ប្រធាន​អង្គភាពសម្របសម្រួលព្រំដែនឡាវ-ថៃ ក្នុងខេត្ត Bokeo ដោយសម្តែងការព្រួយបារម្ភចំពោះគ្រាប់កាំភ្លើងដែលធ្លាក់ពីលើដំបូលផ្ទះជនស៊ីវិលក្នុងប្រទេសថៃ អំឡុងពេលមានការប៉ះទង្គិចគ្នាឆ្លងព្រំដែននាពេលថ្មីៗនេះ។

ជាការឆ្លើយតប កងកម្លាំងឡាវបានដាក់ពង្រាយរថពាសដែក និងឧទ្ធម្ភាគចក្រដើម្បីបង្រ្កាបក្រុមប្រដាប់អាវុធដោយសមាជិកក្រុមប្រដាប់អាវុធមួយចំនួនត្រូវបានគេរាយការណ៍ថាត្រូវបានចាប់ខ្លួន។

ក្រោយការវាយប្រហារនេះមាន ពាក្យចចាមអារ៉ាមលេចឡើងនៅលើប្រព័ន្ធផ្សព្វផ្សាយសង្គមឡាវថាអ្នកវាយប្រហារអាចជាសមាជិកនៃក្រុមជួញដូរគ្រឿងញៀនដើម្បីសងសឹកកងកម្លាំងរដ្ឋាភិបាលឡាវ។ ការ​លេចឡើងនេះបន្ទាប់ពី​ការ​រឹប​អូស​គ្រឿង​ញៀន​ដ៏​ធំ​មួយ​នៅ​ថ្ងៃ​ទី ២០ ខែ​មេសា នៅ​ពេល​ថ្នាំ​ញៀន​មេតំហ្វេតាមីន​ជាង ២០ លាន​គ្រាប់។

អាជ្ញាធរឡាវក៏បានកត់សម្គាល់ផងដែរថា នេះជាឧបទ្ទវហេតុដែលមិនធ្លាប់មានពីមុនមក ដែលក្រុមប្រដាប់អាវុធបានបើកការវាយប្រហារដោយផ្ទាល់ទៅលើកងកម្លាំងយោធានៅក្នុងតំបន់នោះ៕

អត្ថបទ៖ ប៊ុន សុភាព