តួអាចែ រងការរិះគន់ពី​អ្នក​គាំទ្រថា ប្រើស្នាមញញឹមក្លែងក្លាយ ដាក់អ្នកគាំទ្រ ពេលជួបគ្នាចៃដន្យ

តារាសម្ដែងហុងកុង Chow Yun Fat ឬជារឿយៗទស្សនិកជនកម្ពុជានិយមហៅថា «អាចែ» នាពេលនេះលោកកំពុងប្រឈមមុខនឹងការរិះគន់យ៉ាងខ្លាំង បន្ទាប់ពីអ្នកគាំទ្រម្នាក់បានចែករំលែករូបថតមួយសន្លឹកតាមប្រព័ន្ធអ៊ីនធឺណិត​អ​ម​ដោយសារ​រិះគន់​​និង​ចោទ​ប្រកាន់ថា តារាប្រុសហាក់មិនសូវចាប់អារម្មណ៍ជាមួយមហាជនក្នុងកំឡុងពេលជួបជាមួយ​អ្នក​គាំទ្រ (fans) នៅទីក្រុងសៀងហៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមកាសែត Dimsum Daily ឧប្បត្តិហេតុទាំងនេះត្រូវបានថតនៅក្នុងវីដេអូដែលត្រូវបានចែករំលែកនៅលើប្រព័ន្ធផ្សព្វផ្សាយសង្គម។ នៅក្នុងវីដេអូនោះ តារាជើងចាស់និយមដើរតួក្បាច់គុនបែបកំប្លុកកំប្លែងបានធ្វើដំណើរកម្សាន្តជាលក្ខណឯកជននៅក្នុងតំបន់ Shanghai Bund អមដោយអង្គរក្សការពារយាងតឹងរ៉ឹងបំផុត។ ភ្លាមៗនោះដែរ នៅពេលដែលរូបលោក​ដើរ​មកដល់កន្លែងមួយ ស្រាប់តែអ្នក​គាំទ្រ​មួយ​ក្រុម​ពាក់​ម៉ាស់​បានរត់​មកព័ន្ធ​ជុំ​វិញ​គាត់ ដោយ​សង្ឃឹម​ថា​ មាន​ឱកាស​ថត​រូបជាមួយគ្នាក្នុងនាមជាអាយដល់សំណព្វនិងហ្វេនៗ។ ក្នុង​ចំណោម​នោះមាន​នារី​វ័យ​ក្មេង​ម្នាក់​ស្លៀក​ពាក់​អាវ​ស និង​ពាក់​ម៉ាស់​បាន​សុំ​ថត​សែលហ្វី​ជាមួយលោក។ ប៉ុន្តែ តារាប្រុសបែរងាកមុខចេញ និងបង្ហាញអាការមិនចង់អើពើជាមួយអ្នកគាំទ្រ។

អ្នក​មើល​ខ្លះ​បាន​បញ្ចេញ​មតិ​ថា ដំបូង​ឡើយ តារាប្រុសវ័យ៦៩ឆ្នាំរូបនេះ ហាក់​មិន​សូវ​រំភើប​ចំពោះ​ការ​ឆ្លើយ​ឆ្លង​គ្នា​នោះ​ទេ។ ការបញ្ចេញមតិរបស់គាត់ជាមួយហ្វេន ហាក់ដូចជាបង្ហាញពីការមិនសប្បាយចិត្ត ដែលនាំឲ្យពួកគេបកស្រាយការឆ្លើយតបរបស់គាត់ថា ជាការបដិសេធនឹងអ្នកនៅចំពោះមុខ។ យ៉ាងណា មួយសន្ទុះក្រោយមក អាកប្បកិរិយារបស់គាត់ បែរជាស្រទន់ ហើយញញឹមឡើងវិញ ដើម្បីត្រៀមថតរូបជាមួយអ្នកគាំទ្រ។

ទោះបីជាញញឹមក៏ដោយ ក៏អ្នកលេងអ៊ីនធឺណិតមួយចំនួនបានចោទប្រកាន់តារាប្រុសត្រកូល Chow ថា ផ្តល់ស្នាមញញឹមក្លែងក្លាយ និងបង្ហាញទឹកមុខក្រម៉ូវដាក់មហាជនដែលស្រលាញ់ពេញចិត្តលោក។

ផ្ទុយ​ទៅ​វិញ អ្នក​គាំទ្រ​របសលោកជា​ច្រើន​បាន​មក​ការពារ​តួហុងកុងយ៉ាង​ឆាប់​រហ័ស។ ពួក​គេ​បាន​ចង្អុល​បង្ហាញ​ថា តារា​សម្ដែង​រូប​នេះ​គ្រាន់​តែ​ដើរ​ម្សាន្ត ហើយនោះគឺជាពេល​វេលា​ផ្ទាល់​ខ្លួន​របស់គាត់ ប៉ុន្តែគាត់នៅតែ​ចូល​រួម​ជាមួយ​អ្នក​គាំទ្រ​ក្នុង​ពេល​ឯកជនបានយ៉ាងល្អប្រសើរថែមទៀត។ អ្នក​គាំទ្រ​ផ្សេងទៀតបាន​គូស​បញ្ជាក់​ពី​កេរ្តិ៍​ឈ្មោះ​ដ៏​យូរ​អង្វែង​របស់​គាត់​ ដែល​មាន​ចិត្ត​រាប​ទាប និង​ចិត្ត​សប្បុរសចំពោះអ្នកគាំទ្រជានិច្ច។

មុនពេលចូលប្រឡូកក្នុងឧស្សាហកម្មកម្សាន្តក្នុងឆ្នាំ ១៩៧៤ ជាមួយទូរទស្សន៍ហុងកុង TVB លោក Chow Yun Fat បានធ្វើការជាច្រើនមុខ រួមទាំងជាជាងខាត់ស្បែកជើង ជំនួយការការិយាល័យ បុគ្គលិកដឹកជញ្ជូនទំនិញ បុគ្គលិកសណ្ឋាគារ និងអ្នកបើកបរតាក់ស៊ីជាដើម។

គាត់ទទួលបានភាពល្បីល្បាញតាមរយៈរឿងភាគរបស់ TVB ដូចជា «The Good, The Bad, and The Ugly” និង “The Bund» ។ ក្នុងអាជីពរបស់លោក Chow ទទួលបានពានរង្វាន់ជាច្រើន រួមទាំងពានរង្វាន់ភាពយន្តហុងកុងចំនួនបី និងពានរង្វាន់ Golden Horse ចំនួនពីរសម្រាប់តារាសម្តែងល្អបំផុត។

នៅឆ្នាំ ២០២៣ លោក Chow ត្រូវបានគេដាក់ឈ្មោះថា Asian Filmmaker of the Year ក្នុងកម្មវិធីប្រគល់ពានរង្វាន់ភាពយន្តអន្តរជាតិ Busan លើកទី ២៨ ដែលធ្វើឲ្យគាត់ក្លាយជាតារាសម្តែងហុងកុងទីពីរបន្ទាប់ពី Tony Leung ដែលទទួលបានកិត្តិយសដ៏មានកិត្យានុភាព៕

អត្ថបទ៖ សាង ស្រីល័ក្ខ

ចុចអាន៖តួអាចែប្រាប់ថា ទិញឡាន Rolls-Royce ជជុះ មិនមែនបង្អួត តែចង់ដឹងពីម៉ាស៊ីន