នយោបាយ

ប្រធានសភាជំរុញពង្រឹងឯកភាពផ្ទៃក្នុងឆ្លើយតបនឹងស្ថានភាពពិភពលោកបច្ចុប្បន្ន

បានផុស

៤០ វិនាទី មុន

នៅ

ថ្ងៃពុធ ២១ ឧសភា ២០២៥

ដោយ

ប្រធានសភាកម្ពុជា សម្ដេចសភាធិបតី ឃួន សុដារី បានជំរុញដល់សមាជិកសភាទាំងពីថ្នាក់តាមដានពីស្ថានការណ៍វិវត្តន៍របស់ពិភពលោកដើម្បីជាទុនសម្រាប់ការអនុវត្តនយោបាយការទូតសភា ដោយថាក្នុងស្ថានភាពអន្តរជាតិស្មុគស្មាញការពង្រឹងសមត្ថភាព សាមគ្គីភាព ឯកភាពផ្ទៃ គឺជាការសំខាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើកសិក្ខាសាលាផ្សព្វផ្សាយស្ដីពី«លទ្ធផលនៃកិច្ចសហប្រតិបត្តុការអន្តរជាតិ» នៅអាគាររដ្ឋបាលថ្មី វិមានសភាកម្ពុជាព្រឹកថ្ងៃទី២១ ខែឧសភា ឆ្នាំ២០២៥ សម្ដេចសភាធិបតី ឃួន សុដារី បានថ្លែងថា រដ្ឋសភាកំពុងចូលរួមយ៉ាងសំខាន់ជាមួយរដ្ឋាភិបាលក្នុងការឆ្លើយតបទៅនឹងបញ្ហាប្រឈមនានា ខណៈដែលក្នុងអាណត្តិទី៧នេះ «ការទូតសភា» គឺជាការងារអាទិភាពមួយរបស់រដ្ឋសភា។

សម្ដេចសភាធិបតីបន្ថែមថាស្ថានការណ៍អន្តរជាតិចុងក្រោយនេះកំពុងទាញពិភពលោកឱ្យជួបប្រទះនឹងការប្រកួតប្រជែងភូមិសាស្ត្រនយោបាយ សេដ្ឋកិច្ច និងបច្ចេកវិទ្យាដែលបានជះឥទ្ធិពលដល់ស្ថិរភាពតំបន់នានា ហើយកម្ពុជាត្រូវតែរក្សាវិធីសាស្ត្រនិយមកណ្ដាល ជាមួយនឹងការពង្រឹងសាមគ្គីភាព ឯកភាពផ្ទៃក្នុងជាកត្តាសំខាន់ ដើម្បីរក្សាប្រយោជន៍ជាតិ ប្រជាជនកម្ពុជា

សម្ដេចថា៖ «ក្នុងបរិបទស្ថានការណ៍អន្តរជាតិកាន់តែស្មុគស្មាញពិបាកទស្សន៍ទាយ និងគ្រោះថ្នាក់ យើងត្រូវពង្រឹងស្មារតីសាមគ្គីភាព ឯកភាពផ្ទៃក្នុង ពីព្រោះកត្តាខាងក្នុងនៅតែជាកត្តាកំណត់»។

ការងារការទូតសភាត្រូវបានសម្ដេចតេជោ ហ៊ុន សែន បានប្រកាសក្នុងពេលសម្ដេចកាន់ការងារជាប្រធានព្រឹទ្ធសភាក្នុងសម័យប្រជុំដំបូងព្រឹទ្ធសភាកាលពីខែមេសា ឆ្នាំ២០២៤។ ការកំណត់យកអាទិភាពនេះដោយសារសម្ដេចតេជោ មើលឃើញថា ពិភពលោកសព្វថ្ងៃ មានភាពប្រទាក់ក្រឡាគ្នាកាន់តែខ្លាំង ប៉ុន្តែជាមួយគ្នានេះក៏មានការបែកបាក់ ស្មុគស្មាញ និងច្របូកច្របល់ ដោយសារតែការប្រកួតប្រជែងជាយុទ្ធសាស្ត្រកាន់តែខ្លាំងឡើងរវាងមហាអំណាចនានា សង្គ្រាម និងវិបត្តិជុំវិញពិភពលោក និងការគំរាមកំហែងផ្នែកសន្តិសុខមិនប្រពៃណីដែលមិនធ្លាប់មានពីមុនមក។

ប្រធានគណៈកម្មការកិច្ចការបទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា លោក សួស យ៉ារ៉ា បានបញ្ជាក់ថាក្រោមការអនុវត្តនយោបាយកាទូតសភានេះ រដ្ឋសភាកម្ពុជាកំពុងសហការជាមួយអ្នកពាក់ព័ន្ធទាំងអស់ទាំងក្នុងវេទិកាជាតិ និងអន្តរជាតិដើម្បីផ្ដល់ធាតុចូល មតិយោបល់ អនុសាសន៍សម្រាប់គោលនយោបាយយុទ្ធសាស្ត្រ និងការឆ្លើយតបទៅនឹងបញ្ហាប្រឈមឱ្យមានប្រសិទ្ធភាពផងដែរ។

ថ្លែងក្នុងពិធីបើកសិក្ខាសាលានោះដែរឧបនាយករដ្ឋមន្ត្រីការបរទេសលោក ប្រាក់ សុខុន បានឱ្យដឹងថារដ្ឋាភិបាលកម្ពុជាក្រៅពីបានចូលរួមក្នុងការថែរក្សាសណ្ឋាប់ធ្នាប់ពិភពលោកហើយ អ្នកការទូតនៅក្រៅប្រទេសក៏ជាចំណែកជាខ្លាំងក្នុងការលើកស្ទួយកិត្យានុភាពជាតិ ខណៈកំណែទម្រង់ផ្ទៃក្នុងក៏នឹងត្រូវបន្តដើម្បីបង្កើនគុណភាព សមត្ថភាព កម្រិតវិជ្ជាជីវៈ និងភាពវៀងវៃផងដែរ។

លោកថា៖ «កំណែទម្រង់ផ្ទៃក្នុងក៏នឹងត្រូវបន្ត គុណភាព សមត្ថភាព កម្រិតវិជ្ជាជីវៈ និងភាពវៀងវៃរបស់អ្នកការទូតយើងក្នុងការពិគ្រោះយោបល់ចរចា បកស្រាយ ការពារនយោបាយ និងជំហររបស់រដ្ឋាភិបាលយើងនឹងត្រូវសម្រួចថែមទៀត ដើម្បីសម្រេចនូវបេសកម្មដ៏ថ្លៃថ្នូរខាងលើ»។

លើកឡើងក្នុងឱកាសនោះដែរប្រធានសភា សម្ដេចសភាធិបតី ឃួន សុដារី បានបង្ហាញពីជំនឿចិត្តថាអ្នកដឹកនាំជំនាន់ថ្មីរបស់កម្ពុជាក្រោមរដ្ឋាភិបាលសម្ដេចធបិតី ហ៊ុន ម៉ាណែត នឹងបន្តវេនបានល្អធានានយោបាយការបរទេសកម្ពុជានាំកម្ពុជាឆ្លងផុតពីបញ្ហាប្រឈមសកលបច្ចុប្បន្នដោយភាពប្រុងប្រយ័ត្ន និងសុវត្ថិភាព៕