ប្រទេសថៃកត់ត្រាករណីឆ្លងកូវីដថ្មីជាង៥ម៉ឺននាក់ ក្នុងរយៈពេលត្រឹមមួយសប្តាហ៍

យោងតាមការចេញផ្សាយរបស់ការសែត Bangkok Post នៅថ្ងៃទី២៦ខែឧសភានេះ ស្ថានភាព​ជំងឺ​កូវីដ១៩ នៅ​ប្រទេស​ថៃ នៅតែ​គួរ​ឲ្យ​ព្រួយ​បារម្ភ ដោយចន្លោះពីថ្ងៃទី១៨ដល់ថ្ងៃទី ២៤ខែឧសភា មានករណីឆ្លងថ្មីសរុបចំនួន ៥២,៩១៧ នាក់និងមានអ្នកស្លាប់ចំនួន ៤នាក់បន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមនាយកដ្ឋានគ្រប់គ្រងជំងឺថៃ (DDC) ក្នុងចំណោមអ្នកឆ្លងថ្មី ៥០១៣៣ នាក់គឺជាអ្នកជំងឺក្រៅ (សម្រាកព្យាបាលនៅផ្ទះ) ខណៈ ២,៧៨៤នាក់តម្រូវឱ្យចូលមន្ទីរពេទ្យ។ ចាប់តាំងពីដើមឆ្នាំ ២០២៥មកចំនួនអ្នកឆ្លងបានកើនឡើងដល់ ១៨៦,៣០៨ នាក់ដោយមានអ្នកស្លាប់សរុបចំនួន ៤៤នាក់។

ខេត្តចំនួនប្រាំដែលមានចំនួនករណីឆ្លងច្រើនជាងគេគឺទីក្រុងបាងកក (៩,៥៦០ ករណី) Chonburi (៣,៣៣៧ ករណី) Samut Prakan (២,៤៣៩ ករណី)  Nonthaburi (២,២៧៩ ករណី) និងRayong (២,១៥២ ករណី) ។

កូវីដ១៩ បន្តបង្កក្តីបារម្ភដល់សុខភាពសាធារណៈក្នុងប្រទេសថៃ ជាពិសេសក្នុងរដូវវស្សា និងរដូវកាលសិស្សចូលរៀន ដែលបង្កើនហានិភ័យនៃការឆ្លងនៅតំបន់មានមនុស្សច្រើន ដូចជាសាលារៀន ការដឹកជញ្ជូនសាធារណៈ មន្ទីរពេទ្យ និងមណ្ឌលថែទាំមនុស្សចាស់។ នាយកដ្ឋានគ្រប់គ្រងជំងឺ (DDC) បានជំរុញឱ្យសាធារណជនចាត់វិធានការប្រុងប្រយ័ត្ន រួមទាំងពាក់ម៉ាស់នៅពេលមានរោគសញ្ញា អនុវត្តអនាម័យល្អ ជៀសវាងការប៉ះពាល់ជាមួយអ្នកដែលមានរោគសញ្ញាផ្លូវដង្ហើម និងធ្វើការតេស្តនៅពេលមានការសង្ស័យថាមានការឆ្លង។

ជាមួយគ្នានេះនាយកដ្ឋានវិទ្យាសាស្ត្រវេជ្ជសាស្ត្រ (DMSC) រាយការណ៍ថាប្រភេទJN.1 នៅតែជាមេរោគ កូវីដ១៩លេចធ្លោនៅក្នុងប្រទេសថៃដែលមានចំនួនជាង ៦៣% នៃករណីឆ្លងជាបន្តបន្ទាប់។ ទោះបីជាស្ថានភាពធ្ងន់ធ្ងររបស់មេរោគនេះបានថយចុះក៏ដោយ ក៏វានៅតែបន្តរីករាលដាលយ៉ាងឆាប់រហ័ស៕

អត្ថបទ៖ ប៊ុន សុភាព