ព័ត៌មានអន្ដរជាតិ

សកម្មភាពរោងចក្រនៅអាស៊ីធ្លាក់ចុះនៅខែឧសភា ដោយពន្ធ ត្រាំ

បានផុស

១១ ខែ មុន

នៅ

ថ្ងៃចន្ទ ២ មិថុនា ២០២៥

ដោយ

ការស្ទង់មតិឯកជនផ្សេងៗគ្នាចេញផ្សាយនៅថ្ងៃចន្ទនេះ បានបង្ហាញថា សកម្មភាពរោងចក្រនៅអាស៊ីបានធ្លាក់ចុះនៅក្នុងខែឧសភា ដោយសារកម្សោយតម្រូវការខ្សោយនៅក្នុងប្រទេសចិន និងផលប៉ះពាល់នៃពន្ធរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ធនាគារ au Jibun បានចេញផ្សាយការស្ទង់មតិ ដែលបង្ហាញថា សន្ទស្សន៍អ្នកគ្រប់គ្រងការបញ្ជាទិញ (PMI) របស់ជប៉ុន បានឈរនៅត្រឹម ៤៩,៤ ពិន្ទុ ក្នុងខែឧសភា ដោយកើនឡើងពីខែមេសា ប៉ុន្តែនៅតែស្ថិតក្នុងកម្រិតធ្លាក់ចុះ ដោយវានៅក្រោម ៥០,០ ពិន្ទុ។

ចំណែកឯការស្ទង់មតិរបស់ក្រុមហ៊ុនទីផ្សារ S&P Global វិញ បានបង្ហាញថា PMI សម្រាប់ប្រទេសកូរ៉េខាងត្បូង ដែលមានសេដ្ឋកិច្ចធំជាងគេទី៤របស់អាស៊ី មានត្រឹម ៤៧,៧ ពិន្ទុ ដោយសារតែកម្សោយតម្រូវការ និងផលប៉ះពាល់ពន្ធរបស់សហរដ្ឋអាមេរិក។

ទាំងជប៉ុន និងកូរ៉េខាងត្បូង បានកត់ត្រាពីការធ្លាក់ចុះនៃសេដ្ឋកិច្ចរបស់ខ្លួនក្នុងត្រីមាសទី១ ដោយសារតែពន្ធគយ និងភាពមិនច្បាស់លាស់របស់លោក ត្រាំ លើគោលនយោបាយពាណិជ្ជកម្មរបស់សហរដ្ឋអាមេរិក ដែលដាក់បន្ទុកលើការនាំចេញ និងសកម្មភាពសាជីវកម្ម ខណៈមានសញ្ញាតិចតួចពីភាពប្រសើរឡើងនៃស្ថានភាពបែបនេះ ។ ការដាក់ពន្ធលើរថយន្តនាំចូលអាមេរិករបស់ ត្រាំ ដាក់សម្ពាធខ្លាំងលើប្រទេសនាំចេញរថយន្តសំខាន់ៗទាំង២របស់ពិភពលោក។

ជាមួយនឹងនេះ ការស្ទង់មតិពីរដ្ឋចិនចេញផ្សាយកាលពីថ្ងៃសោរ៍ឯណោះវិញ បានបង្ហាញថា សកម្មភាពរោងចក្ររបស់ចិន បានធ្លាក់ចុះនៅក្នុងខែឧសភា ដែលជាសញ្ញាពីភាពទន់ខ្សោយនៅក្នុងប្រទេសមានសេដ្ឋកិច្ចធំទី២របស់ពិភពលោកមួយនេះ។ PMI ប្រចាំខែឧសភា ឈរនៅត្រឹម ៤៩,៥ ពិន្ទុ។

អ្នកវិភាគបាននិយាយថា ខណៈប្រទេសនៅអាស៊ីជាច្រើនមានវឌ្ឍនភាពតិចតួចក្នុងការចរចាពាណិជ្ជកម្មជាមួយសហរដ្ឋអាមេរិក ភាពមិនប្រាកដប្រជានឹងអាចរារាំងក្រុមហ៊ុនផ្សេងៗ ពីការជំរុញផលិតកម្ម ឬការចំណាយរបស់ពួកគេ។

ប្រធានសេដ្ឋវិទូសម្រាប់ប្រទេសមានទីផ្សារកំពុងរីកចម្រើននៅវិទ្យាស្ថានស្រាវជ្រាវ Dai-ichi Life លោក Toru Nishima បាននិយាយថា៖ «វាពិបាកក្នុងការរំពឹងថាពីកំណើនសកម្មភាពផលិតកម្មរបស់អាស៊ីនៅពេលណាមួយក្នុងពេលឆាប់ៗនេះ ដោយសារតែពន្ធគយបដិការខ្ពស់»។ លោកបានបន្តថា៖ «ដោយមានតម្រូវការក្នុងស្រុកចុះខ្សោយ ទំនិញថោកៗចិនជនលិចទីផ្សារនៅអាស៊ី ដែលកំពុងដាក់សម្ពាធបរិត្តផរណាលើសេដ្ឋកិច្ចក្នុងតំបន់ផងដែរ»។

ក្នុងបរិបទដែលការចរចាពន្ធបន្តស្ថិតក្នុងភាពស្រពិចស្រពិល PMI ក៏ធ្លាក់ចុះផងដែរនៅប្រទេសវៀតណាម ឥណ្ឌូណេស៊ី និងកោះតៃវ៉ាន់ជាដើម៕