ការនាំចូលអង្ករហ្វីលីពីនធ្លាក់ចុះយ៉ាងគំហុក​ ៥ ខែដើមឆ្នាំ

ការនាំចូលអង្កររបស់ហ្វីលីពីន ដែលជាប្រទេសនាំចូលអង្កររបស់ពិភព​លោក បាន​ធ្លាក់ចុះជាគំហុកប្រមាណ ២០,៩ ភាគរយ មកត្រឹម ១,៧ លាន​តោន ក្នុងរយៈពេល ៥ ខែ ដើមឆ្នាំ ២០២៥ ធៀប​នឹង​រយៈពេល​ដូចគ្នា​កាលពីឆ្នាំមុន។ នេះបើតាមការចុះផ្សាយរបស់កាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការធ្លាក់ចុះការនាំចូលនេះ រួម​ចំណែក​ដោយ​កំណើន​តិចតួចនៃផលិតកម្មស្រូវក្នុងស្រុកហ្វីលីពីននៅត្រីមាសទី ១ ឆ្នាំនេះ ដោយទិន្នផលរបស់ប្រទេសបាន​កើនដល់ ៤,៦៩ លាន​តោន ធៀប​នឹង​ ៤,៦៨ លានតោន នៅត្រីមាសដូចគ្នាឆ្នាំមុន។ ​

ទោះបីជាបែបនេះក្ដី ​ក្រសួងកសិកម្មសហរដ្ឋអាមេរិក (USDA) ​បាន​ព្យាករថា ហ្វីលីពីននឹងនៅតែជា​ប្រទេសនាំចូលអង្ករឈានមុខគេរបស់ពិភពលោកនៅឆ្នាំ ២០២៥ ​ដោយ​នឹងកើនឡើងដល់ ៥,៤ លាន​តោន និង​បន្តកើនដល់ ៥,៥ លាន​តោន នៅឆ្នាំក្រោយ។ ​ការរំពឹងពីកំណើននេះ ​ជំរុញដោយកត្តាដូចជា ការកើនឡើង​នៃប្រជាជន ​ទេសចរណ៍ ដែលជំរុញតម្រូវការក្នុងស្រុក។

ដើម្បីឆ្លើយតបទៅនឹង​កត្តាទាំងនេះ រដ្ឋាភិបាលហ្វីលីពីនកន្លងមក​បានអនុវត្តវិធានការដើម្បីរក្សាស្ថិរភាពតម្លៃអង្ករ និងធានាឱ្យមានតម្លៃសមរម្យ។ ក្រោមបទបញ្ជាប្រតិបត្តិដែលបានចុះហត្ថលេខាក្នុងខែមិថុនា ឆ្នាំ ២០២៤ ពន្ធលើអង្ករនាំចូលត្រូវបានកាត់បន្ថយមកត្រឹម ១៥ ភាគរយ​ ​ហើយត្រូវបានកំណត់​ឱ្យ​នៅកម្រិតនេះរហូតដល់ឆ្នាំ ២០២៨​ ដោយស្ថិតនៅក្រោមការត្រួតពិនិត្យជាប្រចាំរៀងរាល់ ៤ ខែម្តង។

ទោះជាយ៉ាងណាក៏ដោយ​ ការធ្លាក់ចុះនៃការនាំចូលអង្កររបស់ហ្វីលីពីន រួមចំណែកជាសំខាន់ដល់ការធ្លាក់ចុះនៃតម្លៃអង្ករសកល ដោយវាបង្កើនការផ្គត់ផ្គង់លើសតម្រូវការលើទីផ្សារអន្តរជាតិ ចំពេលឥណ្ឌូណេស៊ីឈប់នាំចូលអង្ករ ហើយឥណ្ឌាបើកការនាំចេញអង្ករឡើងវិញ៕