មហាជនស្ញប់ស្ញែងខ្លាំងនឹងការរៀបចំពិធីមង្គលការតាមប្រពៃណីខ្មែរ របស់គូស្នេហ៍តារារ៉េប

កម្មវិធីដ៏ឱឡាឬកក្នុងឱកាសថ្ងៃចូលរោងជ័យ នៃអាពាហ៍ពិពាហ៍របស់គូស្នេហ៍តារាចម្រៀងរ៉េប លោក G-Devith និងអ្នកនាង ទេព បូព្រឹក្ស បានរៀបចំរំលេចនូវវប្បធម៌ប្រពៃណីជាតិពោរពេញដោយអត្ថន័យ មិនថាសម្លៀកបំពាក់ និងកម្មវិធីប្រពៃណីខ្មែរមួយចំនួន សូម្បីតែការរចនាសាលពិធីបង្ហាញ ក៏បង្ហាញពីទិដ្ឋភាពប្រាសាទបុរាណដែលជាអត្តសញ្ញាណជាតិខ្មែរ មករំលេចក្នុងកម្មវិធីមង្គលរបស់ខ្លួនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងលំដាប់លំដោយក្នុងទិដ្ឋភាពមង្គលការប្រពៃណីខ្មែរ គិតត្រឹមរសៀលថ្ងៃនេះ បានរៀបចំពិធីមួយចំនួនរួចទៅហើយ ដូចជា ពិធីបើករបងជ័យ; ក្រុងពាលា; សូត្រមន្តចម្រើនព្រះបរិត្ត; កម្មវិធីបន្ទប់; ពិសីជុំពេលា និង ជាវខាន់ស្លាជាដើម ខណៈនៅមានកម្មវិធីបន្តបន្ទាប់ទៀត។

គួររំលេចដែរថា “ពិធីបើករបងជ័យ” ជាពិធីមួយដែលគេប្រារព្ធរៀបចំឡើងនៅល្ងាចថ្ងៃចូលរោង វេលាថ្ងៃរសៀល (ចន្លោះចាប់ពីម៉ោង១-២ រសៀល)។ បើតាមការកត់សម្គាល់ បច្ចុប្បន្នពិធីនេះ ច្រើនតែប្រារព្ធរៀបចំភាគច្រើនសម្រាប់ក្រុមគ្រួសារ ដែលមានធនធាន ជាពិសេសក្រុមគ្រួសារមន្រ្តីធំៗជាដើម។

បន្ទាប់ពីពិធីបើករបងជ័យ កូនក្រមុំ និងកូនកំលោះ ព្រមនិងសាច់ញាតិ ត្រូវបន្តធ្វើពីធីក្រុងពាលា មុននឹងរៀបចំពិធី សូត្រមន្តចម្រើនព្រះបរិត្ត។ ក្នុងប្រពៃណីខ្មែរពីបរមបុរាណ ពិធីនេះប្រារព្ធធ្វើដើម្បីសូមការអនុញ្ញាតសង់រោងជ័យ និងបួងសួងសុំសេចក្តីសុខចម្រើន ការពារនូវគ្រោះណាមួយដែលបម្រុងនឹងកើតឱ្យជៀសចេញចាកឆ្ងាយពីរោងជ័យនេះ ហើយសូមឱ្យតែបាននូវពុទ្ធិពរទាំង ៤ប្រការជានិច្ច ដរាបតរៀងទៅ។