កីឡា

ក្លិបព្រះខ័នរាជស្វាយរៀង ប្រកាសចែកផ្លូវជាមួយ Gabriel និង Nick Taylor

បានផុស

១ year មុន

នៅ

ថ្ងៃអាទិត្យ ៨ មិថុនា ២០២៥

ដោយ

នៅថ្ងៃទី៨ ខែមិថុនា ឆ្នាំ២០២៥ ក្លិបបាល់ទាត់ ព្រះខ័នរាជស្វាយរៀង បានប្រកាសចែកផ្លូវជាមួយកីឡាករដ៏ឆ្នើម២រូបគឺកីឡាករ Gabriel Silva Consta និងកីឡាករ Nick Taylor បន្ទាប់ពីចប់រដូវកាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចាកចេញរបស់កីឡាករសញ្ជាតិប្រេស៊ីល Gabriel Silva Consta បានធ្វើឲ្យអ្នកគាំទ្រភ្ញាក់ផ្អើល និងសោកស្តាយដោយសាររូបគេបានបង្ហាញសមត្ថភាពដ៏ល្អក្នុងពីររដូវកាលចុងក្រោយ។ រូបគេបានរួមចំណែកដល់ក្លិបក្នុងការឈ្នះជើងឯកលីគកំពូលកម្ពុជា២រដូវកាលជាប់គ្នា ឈ្នះពានសម្តេចអគ្គមហាសេនាបតីតេជោ ហ៊ុន សែន ១លើក និងពាន ខេមបូឌានស៊ុបភើខាប់ ១លើក ព្រមទាំងជើងឯករង AFC Challenge League។

ជាមួយគ្នានេះ ខ្សែបម្រើការខ្មែរអាមេរិក Nick Taylor ក៏បានចាកចេញដែរ។ កីឡាករខ្មែរ-អាមេរិករូបទំនងជាទៅចូលរួមជាមួយក្លិបនៅប្រទេសថៃ ប៉ុន្តែសម្រាប់ Gabriel នៅមិនទាន់ព័ត៌មានណាមួយថាតើរូបគេបន្តលេងក្នុងប្រទេសកម្ពុជា ឬទៅក្រៅប្រទេស។

កាលពីប៉ុន្មានសប្តាហ៍មុន ការចាកចេញរបស់កីឡាករប្រេស៊ីល Breno Caetano ក៏បានធ្វើឲ្យអ្នកគាំទ្រសោកស្តាយដែរ ហើយរូបគេបានចូលរួមជាមួយក្លិប វិសាខា។

រហូតដល់ពេលនេះ ក្លិបព្រះខ័នរាជស្វាយរៀង នៅមិនទាន់ប្រកាសនាំចូលកីឡាករបរទេសថ្មីទេ ខណៈការប្រកួតរដូវកាលថ្មីក៏កាន់តែខិតជិតចូលមកដល់ដែរ។ ព្រះខ័នរាជស្វាយរៀង មានភារកិច្ចច្រើនដូចរដូវកាលមុនគឺ លីគបាល់ទាត់កម្ពុជា ពានសម្តេចតេជោ ហ៊ុន សែន ពានក្លិបអាស៊ី AFC Challenge League និងពានក្លិបអាស៊ាន ASEAN Club Championship៕