ព័ត៌មានអន្ដរជាតិ

ចិន និងអាមេរិក បន្តចរចាពាណិជ្ជកម្ម ដោយផ្ដោតលើការរឹតត្បឹតការនាំចេញរ៉ែកម្ររបស់ចិន

បានផុស

២ ថ្ងៃ មុន

នៅ

ថ្ងៃចន្ទ ៩ មិថុនា ២០២៥

ដោយ

សហរដ្ឋអាមេរិក និងចិន គ្រោងនឹងបន្តការចរចារពាណិជ្ជកម្មនៅទីក្រុងឡុងដ៍ នៃចក្រភពអង់គ្លេស នៅថ្ងៃចន្ទនេះ ក្នុងគោលបំណងដើម្បីកាត់បន្ថយភាពតានតឹង ដោយនឹងផ្ដោតលើការរឹតត្បឹតការចេញរ៉ែកម្ររបស់ចិន ដែលបង្កក្ដីបារម្ភសម្រាប់វិស័យបច្ចេកវិទ្យាទំនើបទូទាំងសកល ក្រោយមេដឹកនាំរវាងប្រទេសទាំង២ និយាយគ្នាតាមទូរស័ព្ទកាលពីសប្ដាហ៍មុន។ នេះបើតាមការចុះផ្សាយរបស់សារព័ត៌មាន Bloomberg។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគីទាំង ២ បានចោទប្រកាន់គ្នាទៅវិញទៅមក ពីការរំលោភលើកិច្ចព្រមព្រៀងនៅទីក្រុងហ្សឺណែវ ប្រទេសស្វីស ដែលខ្លួនបានព្រមព្រៀងគ្នាលើការទម្លាក់ពន្ធពីអត្រាខ្ពស់កប់ពពករៀងៗខ្លួននៅខែឧសភា។

នៅសប្ដាហ៍មុន ប្រធានាធិបតីសហរដ្ឋអាមេរិក លោក ដូណាល់ ត្រាំ និងប្រធានាធិបតីចិន លោក ស៊ី ជិនពីង បានឆ្លើយឆ្លងទូរស័ព្ទគ្នា ទាំងបាននិយាយអំពីសារៈសំខាន់នៃលំហូររ៉ែកម្រ ដែលចិនរឹតត្បឹតការនាំចេញដើម្បីឆ្លើយតបនឹងគោលនយោបាយពន្ធគយរបស់លោក ត្រាំ។

ចំពោះកិច្ចប្រជុំបន្ទាប់នៅទីក្រុងឡុងដ៍នាថ្ងៃចន្ទនេះ លោក ត្រាំ បានរំពឹងថា វានឹងប្រព្រឹត្តទៅ «យ៉ាងល្អ»។

កាលពីថ្ងៃសៅរ៍ថា ចិនបានអនុម័តលើពាក្យស្នើសុំការនាំចេញរ៉ែកម្រមួយចំនួន ប៉ុន្តែមិនបានបញ្ជាក់ថាវាពាក់ព័ន្ធជាមួយប្រទេសណា ឬឧស្សាហកម្មអ្វីនោះទេ។

ចិនរួមចំណែក ៩០ ភាគរយ លើការផលិតរ៉ែកម្ររបស់ពិភពលោក ដែលរ៉ែទាំងនោះត្រូវបានគេប្រើប្រាស់ក្នុងឧស្សាហកម្មការពារជាតិ អវកាស ឈីប រថយន្តអគ្គិសនី ថាមពល និងអេឡិចត្រូនិកជាដើម។ បើតាមរ៉យទ័រ សហរដ្ឋអាមេរិកមានអណ្តូងរ៉ែកម្រតែមួយគត់ ហើយការផ្គត់ផ្គង់ភាគច្រើនគឺមកពីប្រទេសចិន។

ប្រធានក្រុមប្រឹក្សាសេដ្ឋកិច្ចជាតិនៅសេតវិមានអាមេរិក លោក Kevin Hassett បាននិយាយកាលពីថ្ងៃអាទិត្យក្នុងកម្មវិធីមួយរបស់ទូរទស្សន៍ CBS ថា៖ «យើងចង់ឱ្យរ៉ែកម្រ រ៉ែម៉ាញ៉េទិកដែលមានសារៈសំខាន់សម្រាប់[ផលិតកម្ម]ទូរស័ព្ទដៃ និងអ្វីៗផ្សេងទៀត មានលំហូរដូចមុនដើមខែមេសា ហើយយើងមិនចង់ឱ្យព័ត៌មានលម្អិតបច្ចេកទេសណាមួយ ធ្វើឱ្យលំហូរនោះយឺតយ៉ាវ»។

គួរគូសបញ្ជាក់ថា ភាពតានតឹងពាណិជ្ជកម្មរវាងសហរដ្ឋអាមេរិក និងចិន បានផ្ទុះឡើងនៅឆ្នាំនេះ ក្រោយលោក ត្រាំ ដំឡើងពន្ធលើទំនិញចិន ដែលជំរុញឱ្យមានការសងសឹកពីចិនវិញ។ ខណៈកិច្ចព្រមព្រៀងទីក្រុងហ្សឺណែវមានគោលបំណងត្រួសត្រាយផ្លូវសម្រាប់ការកាត់បន្ថយភាពតានតឹង ការពិភាក្សាទ្វេភាគីបានបន្តធ្លាក់ទៅក្នុងបញ្ហាជាបន្តបន្ទាប់ រួមទាំងក្រោយពេលដែលសហរដ្ឋអាមេរិកហាមឃាត់ទិដ្ឋាការសិស្សចិន។