ព័ត៌មានជាតិ

ខេត្តមណ្ឌលគិរី មានតំបន់ទេសចរណ៍ ១០៦ កន្លែង រង់ចាំស្វាគមន៍ភ្ញៀវទេសចរជាតិ-អន្តរជាតិ

បានផុស

១ នាទីute មុន

នៅ

ថ្ងៃសុក្រ ២៧ មិថុនា ២០២៥

ដោយ

មណ្ឌលគិរី ជាខេត្តមានសក្ដានុពលខ្លាំងលើវិស័យទេសចរណ៍ ក្នុងនោះ តំបន់ជាច្រើនកន្លែងមានទេសភាពស្រស់បំព្រង ខ្នងភ្នំទាបខ្ពស់ វាលស្មៅខៀវខ្ចី និងសម្បូរទៅដោយធនធានធម្មជាតិ ហើយខេត្តនេះមានតំបន់ទេសចរណ៍ ១០៦ កន្លែង រង់ចាំទទួលស្វាគមន៍ភ្ញៀវទេសចរជាតិ-អន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ាង សឿន ប្រធានមន្ទីរទេសចរណ៍ខេត្តមណ្ឌលគិរី បានឲ្យដឹងថា ក្នុងខេត្តមណ្ឌលគិរីនាពេលបច្ចុប្បន្នមានតំបន់ទេសចរណ៍ទាំងរមណីយដ្ឋានកែច្នៃ និងរមណីយដ្ឋានធនធានធម្មជាតិសរុបចំនួន ១០៦ កន្លែង ដូចជា ៖ តំបន់ទេសចរណ៍វប្បធម៌ប្រវត្តិសាស្ត្រចំនួន ៥ កន្លែង រួមមាន ភ្នំដោះក្រមុំ , ភ្នំក្រោល , ភ្នំលុប្រាណ , ភ្នំណាមលៀរ និងព្រះរាជដំណាក់។ ឯតំបន់រមណីយដ្ឋានធម្មជាតិ-អេកូទេសចរណ៍មានចំនួន ៩៨ កន្លែង និងរមណីយដ្ឋានកែច្នៃ ៣ កន្លែង។

លោកប្រធានមន្ទីរ បានបញ្ជាក់ថា ក្រៅពីតំបន់ទេសចរណ៍ទាំងនេះ ខេត្តមណ្ឌលគិរី ក៏នៅមានតំបន់ដែនជម្រកសត្វព្រៃចំនួន ៥ កន្លែង ផងដែរ ហើយតំបន់ទាំងនោះមានវត្តមានប្រភេទសត្វធំៗ សម្រាប់ទស្សនា ដូចជា ព្រៃស្រោង បឹង ទឹកជ្រោះ ជាច្រើនសម្បូរបែប នៃវប្បធម៌ប្រភេទសត្វកម្រ ដែលជាសក្ដានុពលអភិវឌ្ឍន៍អេកូទេសចរណ៍ខ្លាំង និងទាក់ទាញភ្ញៀវទេសចរយ៉ាងច្រើនសន្ធឹកសន្ធាប់ឲ្យមកទស្សនាកម្សាន្តនាខេត្តមណ្ឌលគិរី។

លោកបញ្ជាក់ទៀតថា ខេត្តមណ្ឌលគិរី ក៏មានសេវាកម្មទេសចរណ៍ទូទាំងខេត្តចំនួន ២២០ កន្លែង ស្មើនឹង ២.១៤២ បន្ទប់ ក្នុងនោះ រីសតសណ្ឋាគារម៉ូតែបឹងហ្គាឡូ ៨២ កន្លែង ស្មើនឹង ១.៤៦៩ បន្ទប់ , ផ្ទះសំណាក់ ៥០ កន្លែង ស្មើនឹង ៥៦៩ បន្ទប់ , រមណីយដ្ឋាន ៨ កន្លែង ស្មើនឹង ២១១ ខ្ចុស , ខារ៉ាអូខេ ១៦ កន្លែង ស្មើនឹង ៨២ បន្ទប់ , ក្លិប ១ កន្លែង ស្មើនឹង ៥០ កៅអី , ស្ទីមសូណា ២ កន្លែង ស្មើនឹង ១៥ កៅអី និង ៣ បន្ទប់ , និងម៉ាស្សា ១០ កន្លែង ស្មើនឹង ២៧ បន្ទប់។

គូសបញ្ជាក់ថា តំបន់ទេសចរណ៍ និងរមណីយដ្ឋានផ្សេងៗ រួមទាំងសេវាកម្មស្នាក់នៅ កំពុងតែទន្ទឹងរង់ចាំទទួលស្វាគមន៍ភ្ញៀវទេសចរជាតិ និងអន្តរជាតិ ដែលមកកម្សាន្តនៅខេត្តមណ្ឌលគិរីផងដែរ៕

អត្ថបទ ៖ រៀម សុខហេង