ស្រុកសំឡូត តំបន់កសិកម្មដ៏ល្បី​មានច្រក​ទ្វារព្រំដែន​ ៤ កន្លែង​សម្រាប់ទំនាក់ទំនង​ជាមួយ​ថៃ

ប្រភពពី​មន្រ្តីសមត្ថកិច្ច​ឈរជើងនៅ​ស្រុកសំឡូត​ខេត្ត​បាត់ដំបង​បាន​ឲ្យ​ដឹង​ថា ក្នុងស្រុកសំឡូតមានច្រកទ្វារ​ព្រំដែន​ចំនួន ៤ កន្លែង សម្រាប់​ទំនាក់ទំនង​ជាមួយប្រទេសថៃក្នុងនោះមានច្រក ៤០០ ច្រកចរិយា១ ច្រកសែនចៅ១ និងច្រកពាមតានៅក្នុងឃុំតាតោក១។

មន្រ្តីសមត្ថកិច្ច​ដដែល​បាន​បញ្ជាក់ថា ច្រកចរិយា១ ច្រកសែនចៅ១ និងច្រកពាមតា មិន​អនុញ្ញាតិ​ឲ្យ​​ពលរដ្ឋ​​​ធ្វើ​ដំណើរ​ចេញ​ចូលនោះទេ​ គឺសម្រាប់តែសមត្ថកិច្ចខ្មែរនិងថៃជួបគ្នាប្រចាំខែឬសប្តាហ៍ ដើម្បីសហការគ្នាពង្រឹងសន្តិសុខក្នុងតំបន់តែ​ប៉ុណ្ណោះ។

មន្រ្តីដដែល​បានបន្ត​ថា បើគិតពីច្រកពាមតាទៅច្រក​ថ្មដា ស្រុកវាលវែង ក្នុងខេត្តពោធិ៍សាត់ ដែល​គ្រោង​ដំឡើង​កម្រិត​ជា​ច្រកទ្វារព្រំដែនអន្តរជាតិមានចម្ងាយពីគ្នាប្រមាណ ៧៦ គីឡូម៉ែត្រ​។

ធ្លាប់ជាតំបន់ពោរពេញដោយភ្លើងសង្គ្រាម ស្រុកសំឡូតបានក្លាយជាតំបន់ឈានមុខគេទៅលើវិស័យកសិកម្ម សម្បូរទៅដោយភោគផលដំណាំ​កសិកម្មចម្រុះជាច្រើនប្រភេទ ដែលបង្កើនជាប្រភពចំណូលសេដ្ឋកិច្ចគ្រួសារ​របស់ពលរដ្ឋ​នៅក្នុងតំបន់។ ដោយសារតែប្រភពដីមានជីវជាតិល្អ ធ្វើឱ្យដំណាំលូតលាស់តាមបែបធម្មជាតិ ហើយផ្លែឈើ​ពលរដ្ឋ​និយម​ដាំដុះ​មានដូចជា ទុរេន សាវម៉ាវ មង្ឃុត ប៊រ័ មៀន ស្វាយ រួមទាំង​ដំណាំកសិកម្មមាន​ដំឡូងមី និងពោតជាដើម។

មន្ត្រីទេសចរណ៍ខេត្តបាត់ដំបង​បាន​ឲ្យ​ដឹង​ថា ស្រុកសំឡូតក្រៅពី​សម្បូរដំណាំកសិកម្ម ក៏​មាន​គោលដៅទេសចរណ៍ទាក់ទាញ​ជាច្រើនកន្លែង​​ ដែល​ជំរុញ​ឲ្យ​ភ្ញៀវទេសចរ​ក្នុងនិងក្រៅស្រុកសម្រុកទៅលេងកម្សាន្តជារៀងរាល់ថ្ងៃ ក្នុងនោះមានដូចជា ទឹកធ្លាក់ចំការស្វាយ រមណីយដ្ឋានចំការទុរ៉េន ទឹកធ្លាក់អូរជាំ ទឹកធ្លាក់អេនជូលីណា ទឹកធ្លាក់ចម្លងកួយ រួមទាំង​មានរីសតធំៗ​ ៣ កន្លែង សម្រាប់ទទួលឲ្យភ្ញៀវស្នាក់នៅលំហែកម្សាន្តផង​ដែរ​។

ស្រុកសំឡូត មានផ្ទៃដីសរុបចំនួនជាង ១ ៧០០គីឡូម៉ែត្រការ៉េ ចែកចេញជា០៧ ឃុំ និងភូមិចំនួន ៥៩ភូមិ មានពលរដ្ឋ​រស់នៅ​ជាង​ ៥ ម៉ឺននាក់ ខណះស្រុកមួយនេះពលរដ្ឋ​ពឹងអាស្រ័យ​លើវិស័យកសិកម្មមាន​ប្រមាណ ៧៧ភាគរយ៕

អត្ថបទ៖ សៅ សារិទ្ធ