ព័ត៌មានជាតិ

សេដ្ឋីកសិកម្មអ្នកឧកញ៉ា ម៉ុង ឫទ្ធី ណែនាំបច្ចេកទេសចិញ្ចឹមជ្រូកដេកម៉ាស៊ីនត្រជាក់ មួយឆ្នាំកើតកូនមធ្យម ២៥ ទៅ ៣៥ ក្បាល

បានផុស

១០ ខែ មុន

នៅ

ថ្ងៃសុក្រ ៤ កក្កដា ២០២៥

ដោយ

អ្នកឧកញ៉ា ម៉ុង ឫទ្ធី អ្នកជំនួញកសិកម្មដ៏លេចធ្លោដែលប្រឡូកលើវិស័យកសិកម្មជាង ៣០ ឆ្នាំ បានលើកបង្ហាញពីបច្ចេកទេសចិញ្ចឹមជ្រូក ដោយនាំពូជពីបរទេសដែលចិញ្ចឹមមានលក្ខណៈទំនើបផ្តល់ផលបានច្រើន។

ថ្លែងចូលរួមក្នុងកម្មវិធីវេទិកាធុរកិច្ច និងនវានុវត្តន៍ អ្នកឧកញ៉ា ម៉ុង ឫទ្ធី ប្រធានក្រុមហ៊ុន ម៉ុង ឫទ្ធី គ្រុប ដែលសាងកេរ្តិ៍ឈ្មោះតាមរយៈការវិនិយោគលើវិស័យកសិកម្មជាពិសេសការដាំដុះដំណាំដូងប្រេងលើផ្ទៃដីរាប់ពាន់ហិតាក្នុងខេត្តព្រះសីហនុបានបង្ហើបថា តាមធម្មតាកសិករខ្មែរជាទូទៅចិញ្ចឹមជ្រូកលែងតាមទីវាលបង្កើតកូនតាមធម្មជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ អ្នកជំនួញកសិកម្មដែលមានងារជាអ្នកឧកញ៉ា ដែលនឹងឈានចូលវ័យ ៧១ ឆ្នាំ ឆាប់ៗនេះបានរៀបរាប់ពីបទពិសោធន៍ចិញ្ចឹមជ្រូកពូជបរទេសនាំពីអង់គ្លេសនិងដាណឺម៉ាកនៅកសិដ្ឋានរបស់លោក ដែលចិញ្ចឹមដាក់ឲ្យដេកម៉ាស៊ីនត្រជាក់ មួយឆ្នាំអាចបង្កើតកូនពី ២ ទៅ ៣ ដង ហើយជាមធ្យមបានចំនួនពី ២៥ ទៅ ៣៥ ក្បាល។

លោកថា ជ្រូកដែលមានទម្ងន់ ១០០ ទៅ ១១០ គីឡូក្រាម ដាក់ឲ្យដេកម៉ាស៊ីនត្រជាក់ ត្រូវប្រើប្រាស់ភ្លើងអគ្គិសនី ១០០ គីឡូវ៉ាត់ក្នុងមួយម៉ោង។ លោកអះអាងថា ជ្រូកបើចិញ្ចឹមមិនដាក់ឲ្យដេកម៉ាស៊ីនត្រជាក់ត្រូវចំណាយថ្លៃដើមខ្ពស់ មានទាំងការប្រើប្រាស់ទឹក និងការផ្ដល់ចំណី។

ពាក់ព័ន្ធការចិញ្ចឹមជ្រូកបានកូនតិច អ្នកឧកញ៉ា ម៉ុង ឫទ្ធី បានលើកឡើងថា អាចប៉ះពាល់ដល់ការផ្គត់ផ្គង់ ដែលកាលណាកូនតិចនាំឲ្យតម្លៃផលិតខ្ពស់ មិនអាចប្រកួតប្រជែងប្រទេសជិតខាងបាននោះទេ។

បន្ថែមពីនេះ អ្នកឧកញ៉ាក៏ណែនាំឲ្យកសិករគួរងាកមករកពូជជ្រូកល្អមកចិញ្ចឹម និងបង្វែរពីការចិញ្ចឹមដែលប្រើចំណីគីមីដែលនាំឲ្យប៉ះពាល់សុខភាពដល់អ្នកទទួលទាន៕