ព្រះខ័នរាជស្វាយរៀង យកបានជើងក្រឡុកសញ្ជាតិ ប្រេស៊ីល ធ្លាប់លេងនៅលីគអាល់បានី

ក្លិបព្រះខ័នរាជស្វាយរៀង កំពុងតែបង្កើនសក្តានុពលនៅត្រង់តំបន់ប្រយុទ្ធរបស់ខ្លួនសម្រាប់រដូវកាលថ្មី ២០២៥-២០២៦ បន្ទាប់ពីនាំចូលខ្សែប្រយុទ្ធបរទេសថ្មីជាបន្តបន្ទាប់។

កាលពីល្ងាចថ្ងៃ ព្រហស្បតិ៍ ទី ៣ ខែ កក្កដា ម្សិលមិញ ក្រុមការពារតំណែងជើងឯកលីគកំពូលកម្ពុជា Cambodian Premier League ទើបតែប្រកាសយកបានខ្សែប្រយុទ្ធសញ្ជាតិ ហ្គាណា Kwame Peprah។ ដោយឡែកនៅព្រឹកថ្ងៃ សុក្រ ទី ៤ ខែ មិថុនា ឆ្នាំ ២០២៥ ក្លិប​បានប្រកាសយកបានខ្សែប្រយុទ្ធថ្មីម្នាក់ទៀត គឺកីឡាករសញ្ជាតិ ប្រេស៊ីល Patrick Robson de Souza Monteiro។

Patrick Robson គឺជាកីឡាករម្នាក់ ដែលមានសមត្ថភាពលេងនៅស្លាប និងកណ្តាល ហើយម្យ៉ាងរូបគេក៏មានជំនាញក្រឡុកគូប្រកួតផងដែរ។ កីឡាករវ័យ ២៧ ឆ្នាំរូបនេះ ធ្លាប់លេងនៅក្លិបជាច្រើនក្នុងតំបន់ អាស៊ី និងអឺរ៉ុប។ មុនពេល​រូបគេផ្លាស់មកកាន់ក្លិប​ព្រះ​ខ័ន​រាជ​ស្វាយរៀង រូប​គេបានលេងនៅក្លិប Hatta Club នៃលីគរបស់ អារ៉ាប់រួម។

ចំណែកក្លិបផ្សេងៗទៀត ខ្សែប្រយុទ្ធវ័យ ២៧ ឆ្នាំរូបនេះ ធ្លាប់លេងនៅក្លិប KF Tirana នៃលីគកំពូល អាល់បានី បាន ២ រដូវកាល, ក្លិប FK Gabala នៃលីគកំពូលប្រទេស អាស៊ែបៃហ្សង់, ក្លិប Admira Wacker ស្ថិតនៅលីគទី ២ និងក្លិប SV Horn ស្ថិតនៅលីគទី ៣ ប្រទេស អូទ្រីស និងនៅក្លិបក្នុងប្រទេស ប្រេស៊ីល មួយចំនួនទៀត។

គួរឱ្យដឹងថា ការមកដល់របស់ Patrick Robson បានធ្វើឱ្យតំបន់ប្រយុទ្ធរបស់ព្រះខ័នរាជស្វាយរៀង បច្ចុប្បន្នមានកីឡាករដល់ទៅ ៦ នាក់ហើយ ដូចជាសៀង ចន្ធា, ញាន សុស៊ីដាន់, Cristian Roque, Bouphachan Bounkong, Kwame និងរូបគេម្នាក់ទៀត៕

អត្ថបទ៖ កុសល