ខ្សែបម្រើ សុផល ឌីម៉ង់ ប្តេជ្ញា​លើស​១០០%សម្រាប់ការចូលក្លិបធំតាមក្តីស្រមៃ

ខ្សែបម្រើការពារ សុផល ឌីម៉ង់ បានលើកឡើងដោយមោទកភាព បន្ទាប់ពីបានចូលរួមជាមួយក្លិប ព្រះខ័នរាជស្វាយរៀង ដែលជាក្លិបក្នុងក្តីស្រមៃ​របស់​ខ្លួន​ ហើយរូបគេ​ប្តេជ្ញាខ្ពស់ សម្រាប់ការចូលរួមជាមួយក្រុមរដូវកាលដំបូង។

ថ្លែងនៅក្នុងកិច្ចសម្ភាសជាមួយសារព័ត៌មាន «កម្ពុជាថ្មី» អតីតខ្សែបម្រើរបស់ អង្គរថាយហ្គើរ បានលើកឡើងថា៖ «ការមកទីនេះ ខ្ញុំគិតថា មានសម្ពាធតិចតួចដែរ ព្រោះ​នៅទីនេះមានកីឡាករល្អៗច្រើន។ គ្រប់​តួនាទី សុទ្ធ​តែ​មាន​កីឡាករល្អៗច្រើន ប៉ុន្តែវាអាស្រ័យលើខ្ញុំ​ខ្លួន​ឯង​។ ខ្ញុំនឹងប្រឹងប្រែងហ្វឹកហាត់ និងបង្ហាញសមត្ថភាពឱ្យបានល្អ ដើម្បីទាក់ទាញចិត្តគ្រូបង្វឹក»។

ខ្សែបម្រើវ័យ ២៤ ឆ្នាំបានបន្ថែមថា ៖«ខ្ញុំនឹងប្រឹងប្រែងហ្វឹកហាត់ឱ្យខ្លាំង និងជួយក្រុមតាមលទ្ធភាព ដែលអាចធ្វើទៅបាន។ ព្រោះមកទីនេះខ្ញុំបានដាក់គោលដៅលើស ១០០% ដើម្បីជួយក្រុម។ គោលដៅដំបូងរបស់ខ្ញុំ ដែលមកព្រះខ័នរាជស្វាយរៀង គឺការបានលេងជម្រើស ១១ នាក់ដំបូង បង្ហាញសមត្ថភាពនៅលើទីលាន ជួយក្លិបឱ្យលើកពាន និងការទទួលបានឱកាសជាប់ជម្រើសជាតិ»។

សុផល ឌីម៉ង់ បានបង្ហាញឆន្ទៈមោះមុត ក្នុងការមកចូលរួមជាមួយព្រះខ័នរាជស្វាយរៀងនៅរដូវកាលនេះ។ រូបគេបានបង្ហាញពីគោលដៅរបស់ខ្លួន ដោយតាំងចិត្តយ៉ាងមុតមាំ ក្នុងការជួយក្រុមឱ្យអស់ពីសមត្ថភាព ពោលគឺលើស ១០០% ទៅទៀត។ គោលដៅដំបូង ដែល ឌីម៉ង់ បានកំណត់សម្រាប់ខ្លួនឯងនៅព្រះខ័នរាជស្វាយរៀង គឺរូបគេចង់បានកៅអីលេងជម្រើស ១១ នាក់ដំបូង បង្ហាញសមត្ថភាពនៅលើទីលាន ជួយក្លិបឱ្យលើកពាន និងការទទួលបានឱកាសជាប់ជម្រើស​ជាតិជាដើម។

គួរបញ្ជាក់ថា សុផល ឌីម៉ង់ មុនផ្លាស់មកកាន់ក្លិបព្រះខ័នរាជស្វាយរៀងនៅរដូវកាលនេះ រូបគេ គឺជាកីឡាករដ៏ឆ្នើមរបស់ក្រុម អង្គរថាយហ្គើរ ដោយរូបគេបានលេងនៅទីនោះរយៈពេល ៥ ឆ្នាំ ពោលគឺតាំងពីឆ្នាំ ២០២០៕

អត្ថបទ​៖ កុសល