ព័ត៌មានជាតិ

ទាហានថៃឃាត់ខ្លួនជនជាតិថៃ ៣ នាក់ និងខ្មែរម្នាក់ ក្រោយលបឆ្លងអូរចេញពីកម្ពុជាចូលទឹកដីថៃ

បានផុស

១២ ខែ មុន

នៅ

ថ្ងៃសុក្រ ១១ កក្កដា ២០២៥

ដោយ

ជនជាតិថៃ ចំនួន ៣ នាក់ រួមជាមួយជនជាតិខ្មែរម្នាក់ ជាអ្នកនាំផ្លូវឆ្លងអូរចូលទឹកដីថៃ ត្រូវបានយោធាថៃធ្វើការឃាត់ខ្លួននៅក្បែរមាត់អូរតែម្ដង ខណៈពួកគេទាំង ៤ នាក់ កំពុងជិះទូកឆ្លងអូរចេញពីកម្ពុជាចូលទឹកដីថៃ ដែលពេលនេះទឹកអូរកំពុងជន់ជោរខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឃាត់ខ្លួននេះបានធ្វើឡើងកាលពីវេលាម៉ោង ២ រសៀល ថ្ងៃទី ១០ ខែកក្កដា ឆ្នាំ ២០២៥ ត្រង់ចំណុចភូមិគោកស្បែង ឃុំថាខាម ស្រុកអារញ្ញប្រថេត ខេត្តស្រះកែវ ដែលនៅត្រង់ចំណុចនោះប្រឈមជាមួយ ភូមិគីឡូ ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ គឺជាចំណុចឈរជើងដោយកម្លាំងវីរសេនាតូច នគរបាលការពារព្រំដែនគោក លេខ ៨៩១ គ្រប់គ្រងដោយលោកវរសេនីយ៍ឯក ហាំ វណ្ណៈ។

ក្នុងចំណោមនោះ ជនជាតិថៃ ២ នាក់ បានសារភាពថា ពួកគេធ្វើការជា admin ជាមួយនឹងវេបសាយ ៨៨៨ នៅក្រុងប៉ោយប៉ែត ទទួលបានប្រាក់ខែចាប់ពី ១៨.០០០ ដល់ ២០.០០០ បាត។ នៅពេលនេះសុខចិត្តចំណាយក្នុងម្នាក់ ៥.០០០ បាត ដើម្បីឲ្យជនជាតិខ្មែរ ឈ្មោះ ឈឿង នុត ដែលជាអ្នករស់នៅក្នុងតំបន់នោះ ជូនពួកគេឆ្លងដែនត្រឡប់ចូលប្រទេសថៃវិញ។

ដោយឡែកស្ត្រីជនជាតិថៃម្នាក់ទៀត បានអះអាងថា ខ្លួនគ្រាន់តែឆ្លងមកលេងស្វាមីដែលធ្វើការសំណង់នៅក្រុងប៉ោយប៉ែត ជាជនជាតិហ្វីលីពីន ហើយពេលនេះក៏ឆ្លងដែនត្រឡប់ចូលប្រទេសថៃវិញ ដោយខ្លួនមិនមានប្រាក់កាសច្រើនទេ ទើបសុខចិត្តឲ្យទៅជនជាតិខ្មែរខាងលើ ចំនួន ៥០ បាត ដើម្បីឆ្លងអូរទៅជាមួយ តែក៏ត្រូវទាហានថៃឃាត់ខ្លួនតែម្ដង។