កីឡា

បឺត សង្ឃឹម បញ្ជាក់ថា ខ្លួនមិនធ្លាប់ស្នើសុំជួបកីឡាករណាទេ សំខាន់លើគ្រូជាអ្នកអនុញ្ញាត

បានផុស

១ year មុន

នៅ

ថ្ងៃអង្គារ ១៥ កក្កដា ២០២៥

ដោយ

អ្នកលេងចិត្តសាស្ត្រ បឺត សង្ឃឹម បានចេញមុខឆ្លើយតបនៅលើទំព័រហ្វេសប៊ុកផ្លូវការរបស់ខ្លួន បន្ទាប់ពីខ្លួនលើកឡើងអំពីការចង់ជួបជាមួយមនុស្សឈើ សុខ ធី ហើយត្រូវបានអ្នកគាំទ្រមួយចំនួនតូចរិះគន់ខ្លួនចង់ធ្វើទីផ្សារ និងចង់តោងល្បីទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាក់ទងនឹងរឿងខាងលើនេះដែរ បឺត សង្ឃឹម កូនសិស្សរបស់លោកគ្រូ សេន ប៊ុនថេន បានសរសេរនៅទំព័រហ្វេសប៊ុករបស់ខ្លួនថា៖ «ជម្រាបជូនបងប្អូនថាខ្ញុំបាទមិនបានស្នេីសុំកីឡាកររូបណាម្នាក់ដេីម្បីធ្វេីការប្រកួតនោះទេ។ រាល់វីដេអូទាំងអស់គឺជាការផ្តល់បទសម្ភាស បងប្អូនអ្នកសារព័ត៌មានសួរខ្ញុំបាទ ទាក់ទងជាមួយកីឡាករផ្សេងៗតែប៉ុណ្ណោះ! ចាប់ពីពេលនេះតទៅសម្រាប់ខ្ញុំបាទសូមឆ្លេីយថា OK ជួបកីឡាកររូបណាក៏បានដែរ សំខាន់លេីលោកគ្រូខ្ញុំអនុញ្ញាត ខ្ញុំទទួល»។

គួរឱ្យដឹងថា ដំណើដើមទងដែលនាំឱ្យកើតរឿងនេះ បន្ទាប់ពី បឺត សង្ឃឹម ត្រូវបានអ្នកគាំទ្រជាច្រើនផ្គូផ្គងចង់ឱ្យរូបគេឡើងមកជួប សុខ ធី ដែលទើបយកឈ្នះលើ ពេជ្រ សម្បត្តិ កាលពីថ្ងៃ សៅរ៍ ទី ២៨ ខែ មិថុនា ឆ្នាំ ២០២៥។ តាមរយៈកិច្ចសម្ភាសជាមួយអ្នកសារព័ត៌មាន សង្ឃឹម ក៏មិនបានបដិសេធលើរឿងនេះដែរ ដោយគេបានឆ្លើយថា យល់ព្រមសម្រាប់ជំនួបនេះ ឱ្យតែមានការចរចាត្រូវរ៉ូវគ្នា។

យ៉ាងណា បន្ទាប់ពីការលើកឡើងបែបនេះ បែរជាធ្វើឱ្យអ្នកគាំទ្រមួយចំនួនតូចបង្ហាញការរិះគន់ និងយល់ថា នេះជាការធ្វើទីផ្សារ និងចង់តោងល្បី សុខ ធី ទៅវិញ។ ទោះបីយ៉ាងណា សង្ឃឹម បានឆ្លើយតបទៅវិញហើយ ថា គ្រប់យ៉ាង គឺរូបគេមិនធ្លាប់បានស្នើសុំប្រកួតជាមួយ កីឡាករណាឡើយ ប៉ុន្តែជាការឆ្លើយតបនឹងសារព័ត៌មាន ដែលបានសួរចំពោះការជួបកីឡាករនេះ ឬកីឡាករនោះប៉ុណ្ណោះ។ សម្រាប់រូបគេជួបកីឡាករណាក៏បាន ឲ្យតែគ្រូអនុញ្ញាតឲ្យប្រកួត៕