ត្រាំ ​ទម្លាក់អត្រាពន្ធ​ខ្ពស់សម្រាប់ឥណ្ឌូណេស៊ីមកត្រឹម ១៩% ក្រោមការចរចាថ្មី

ប្រធានាធិបតីសហរដ្ឋអាមេរិក លោក ដូណាល់ ត្រាំ បាន​ប្រកាស​ទម្លាក់អត្រាពន្ធខ្ពស់សម្រាប់ឥណ្ឌូណេស៊ីពី ៣២ ភាគរយ មកនៅត្រឹម ១៩ ភាគរយ ក្រោយ​មាន​ការចរចាគ្នា​ជាថ្មី ​ក្រោម​លក្ខខណ្ឌ​ផ្សេងៗ រួមទាំងការទិញ​យន្តហោះប៊ូអ៊ីង ៥០ គ្រឿង។

ក្នុងសេចក្ដីថ្លែងការណ៍ប្រកាសលើបណ្ដាញសង្គម Truth Social លោក ត្រាំ បាន​និយាយថា ការព្រមព្រៀងទម្លាក់ពន្ធមកត្រឹម ១៩ ភាគរយ ​ដែលទាបជាងពន្ធ ២០ ភាគរយ លើវៀតណាម ធ្វើឡើងក្រោយ​ពីលោក​បាន​និយាយចរចាគ្នាជាមួយ​ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ។

ជាថ្នូរនឹង​ការទម្លាក់អត្រាពន្ធនេះ លោក ត្រាំ បាន​និយាយថា ឥណ្ឌូណេស៊ីនឹង​បើកទីផ្សារទាំងមូលសម្រាប់ទំនិញ​អាមេរិក ​ដោយ​ការនាំចូលរបស់អាមេរិកទៅឥណ្ឌូណេស៊ីកំណត់ថានឹង​មិនជាប់របាំងពន្ធ និងមិនមែនពន្ធគយ ហើយ «ជាផ្នែកមួយ​នៃការព្រមព្រៀងគ្នា ឥណ្ឌូណេស៊ីប្ដេជ្ញាទិញថាមពលអាមេរិក​តម្លៃ ១៥ ប៊ីលាន​ដុល្លារ ​ទំនិញ​កសិកម្ម ៤,៥ ប៊ីលាន​ដុល្លារ និង​យន្តហោះប៊ូអ៊ីង ៥០ គ្រឿង»។

ទន្ទឹមនឹង​ពន្ធ ១៩ ភាគរយ លោក ត្រាំ បាន​និយាយថា រាល់ទំនិញ​ឆ្លងកាត់ (Transshipment) មកពីប្រទេសដែលជាប់ពន្ធខ្ពស់ នឹង​ត្រូវរងពន្ធ ១៩ ភាគរយ បូកនឹងអត្រា​ពន្ធ​របស់ប្រទេសនៃប្រភពទំនិញនោះ។

ជុំវិញការសម្រេច​ចុង​ក្រោយ​ដដែល ឥណ្ឌូណេស៊ីកំពុងរៀបចំសេចក្តីថ្លែងការណ៍រួមមួយជាមួយសហរដ្ឋអាមេរិក ដែលនឹងលម្អិតព័ត៌មានបន្ថែម រួមទាំងវិធានការមិនគិតពន្ធ និងកិច្ចព្រមព្រៀងពាណិជ្ជកម្ម​នៅពេល​ក្រោយ​។ នេះបើតាម​ការឱ្យដឹង​របស់​លេខាធិការក្រសួងសម្របសម្រួលកិច្ចការសេដ្ឋកិច្ច លោក Susiwijono Moegiarso ​កាលពីល្ងាចថ្ងៃអង្គារនៅទីក្រុងហ្សាកាតា។ ​ភ្នាក់ងារព័ត៌មាន​ AFP វិញ បាន​រាយការណ៍ដោយស្រង់សម្ដីអតីតការទូតឥណ្ឌូណេស៊ី ដែលនិយាយថា មន្រ្តីរដ្ឋាភិបាល​ឥណ្ឌូណេស៊ី​ពេញ​ចិត្តនឹងកិច្ចព្រមព្រៀងថ្មី។

គូរគូសបញ្ជាក់ថា រាប់តាំងពីលោក​ ត្រាំ ប្រកាសពន្ធខ្ពស់ ៣២ ភាគរយ លើឥណ្ឌូណេស៊ីនៅដើមខែមេសា មក មន្រ្តីឥណ្ឌូណេស៊ី​បាន​ចរចាជាបន្តបន្ទាប់ ដោយដាក់សំណើផ្សេងៗ រួមទាំងការទម្លាក់ពន្ធជិតសូន្យភាគរយ លើជិត ៧០ ភាគរយ នៃទំនិញ​នាំចូល​ពីអាមេរិក​ ការបង្កើនការនាំចូលនូវថាមពល ​ផលិតផលកសិកម្ម​ និងគ្រឿងការពារជាតិអាមេរិក​ ក៏ដូចជា​សំណើវិនិយោគរួមលើរ៉ែសំខាន់ៗរបស់ឥណ្ឌូណេស៊ី។ យ៉ាងណា​មិញ លោក ត្រាំ នៅតែបន្តរក្សាអត្រាពន្ធ ៣២ ភាគរយ​ នៅពេល​ផ្ញើលិខិតមកឥណ្ឌូណេស៊ីកាលពីសប្ដាហ៍មុន។ ​

គេមើលឃើញថា ការព្រមព្រៀងគ្នា​ចុង​ក្រោយ ធ្វើឡើងក្រោយ​អ្នកចរចាកំពូលរបស់​ឥណ្ឌូណេស៊ី លោករដ្ឋមន្ត្រី Airlangga Hartarto កាលពីសប្តាហ៍មុន បានជួបជាមួយមន្ត្រី​អាមេរិក រួមទាំងតំណាងពាណិជ្ជកម្មលោក​ Jamieson Greer រដ្ឋមន្ត្រីក្រសួងពាណិជ្ជកម្ម លោក​ Howard Lutnick និងលេខាធិការរតនាគារ លោក​ Scott Bessent ជាដើម​។

តាមអ្វីដែលរដ្ឋបាល ត្រាំ បាន​ទទូចនាពេល​កន្លងមក ពន្ធខ្ពស់គឺមាន​គោលបំណងដោះស្រាយឱនភាពពាណិជ្ជកម្ម​ ដែល​ជាការគំរាមកំហែងដ៏ធំសម្រាប់សេដ្ឋកិច្ច និងសន្តិសុខជាតិអាមេរិក ដោយសារតែគោលនយោបាយ និងរបាំងពាណិជ្ជកម្មពន្ធ និងមិនមែនពន្ធគយរបស់​ប្រទេសផ្សេងៗ រួមទាំងឥណ្ឌូណេស៊ី ដែលមាន​អតិរេកពាណិជ្ជកម្មជាមួយអាមេរិក​ប្រមាណ ១៧,៩ ប៊ីលាន​ដុល្លារ កាលពីឆ្នាំមុន៕