អ្នកនាំពាក្យ៖ គ្រឹះស្ថានមធ្យមសិក្សាកំពុងដំណើរការកំណែប្រឡងឌីប្លូម និងប្រកាសលទ្ធផលនៅថ្ងៃទី២១កក្តដាខាងមុខ

លោកស្រី ឃួន វិច្ឆិកា អ្នកនាំពាក្យ ក្រសួងអប់រំយុវជននិងកីឡា បានមានប្រសាសន៍នៅរសៀលថ្ងៃទី១៦កក្តដានេះថាគ្រឹះស្ថាន មធ្យមសិក្សាសាធារណៈនីមួយៗកំពុងដំណើរការកំណែសន្លឹកកិច្ចការប្រឡងសញ្ញាបត្រមធ្យមសិក្សាបឋមភូមិ ឬឌីប្លូមចាប់ពីថ្ងៃទី១៦ ដល់ថ្ងៃទី១៨ និងត្រៀមប្រកាសលទ្ធផលនៅថ្ងៃទី២១កក្តដា ឆ្នាំ២០២៥ខាងមុខ។

លោកស្រីបានបន្តថា បន្ទាប់ពីដំណើរការកំណែរួចនៅថ្ងៃទី១៨ រហូតដល់ថ្ងៃទី២១ គ្រឹះស្ថានមធ្យមសិក្សាសាធារណៈនីមួយៗត្រូវបន្តដំណើរការស្រង់ពិន្ទុ បូកពិន្ទុ និងគូសជាប់ធ្លាក់ និងប្រកាសលទ្ធផលប្រឡង។ ចំពោះរបបពិន្ទុដែលបេក្ខជនទទួលបានជាអតិបរមាមានចំនួន៤៤៥ពិន្ទុ និងរបបពិន្ទុប្រចាំឆ្នាំ១០០ពិន្ទុ សរុបពិន្ទុទាំងអស់៥៤៥ពិន្ទុ។ ប៉ុន្តែដោយសារភាសាបរទេសជាវិញ្ញាសាស្ម័គ្រចិត្ត ដូចនេះពិន្ទុប្រឡងជាប់ គឺ៥៤៥ ដក២៥ រួចចែកនឹង២ស្មើនឹង២៦០ពិន្ទុ សម្រាប់បេក្ខជនចំណេះទូទៅ និងបំពេញវិជ្ចា។ ចំពោះបេក្ខជនស្វ័យរិនពិន្ទុជាប់៤៤៥ ដក២៥ចែកនឹង២ ស្មើនឹង ២១០ ពិន្ទុ។

ពិន្ទុដែលទទួលបាននិទ្ទេសមធ្យម គឺចាប់ពី២៦០ ដល់៣៣៧ពិន្ទុ និទ្ទេសល្អបង្គួរចាប់ពី៣៣៨ ដល់៤១៥ពិន្ទុ និងនិទ្ទេសល្អចាប់៤១៦ពិន្ទុឡើងទៅ សម្រាប់បេក្ខជនចំណេះទូទៅនិងបំពេញវិជ្ជា។ ចំពោះបេក្ខជនស័្វយរិនពិន្ទុចាប់ពី​២១០ ដល់២៧២ ទទួលនិទ្ទេសមធ្យម។ ពិន្ទុចាប់ពី២៧៣ ដល់៣៣៥ទទួលបាននិទ្ទេសល្អបង្គួរ និងពិន្ទុចាប់ពី៣៣៦ឡើងទៅទទួលបាននិទ្ទេសល្អ។

លោកស្រី ឃួន វិច្ឆិកា បានបន្តទៀតថា ក្រសួងបានណែនាំឱ្យនាយក នាយិកា និងនាយករង នាយិការងដែលទទួលបន្ទុកផ្នែកមធ្យមសិក្សាបឋមភូមិ នៃគ្រឹះស្ថាន មធ្យមសិក្សាសាធារណៈដែលជាមណ្ឌលប្រឡង គឺជាប្រធានមណ្ឌល និងអនុប្រធានមណ្ឌល ចាប់តាំងពីដំណើរការសំណេរ កំណែ ស្រង់ បូកពិន្ទុ និងគូសជាប់ ធ្លាក់ ប្រធាន អនុប្រធានមណ្ឌលត្រូវសហការគ្នា និងម្ចាស់ការរៀបចំ និងចុះហត្ថលេខាលើលិខិតឧទ្ទេសនាម គណៈមេប្រយោគនានា តាមដំណាក់កាលនៃការប្រឡង រួមមានដំណើរការសំណេរ ដំណើរការកំណែ និងដំណើរការស្រង់ បូកពិន្ទុ និងគូសជាប់ ធ្លាក់ ដោយប្រើប្រាស់បុគ្គលិកអប់រំទទួលបន្ទុកផ្នែកមធ្យម សិក្សាបឋមភូមិ នៅក្នុងគ្រឹះស្ថានមធ្យមសិក្សាសាធារណៈរបស់ខ្លួន ។

លោកស្រីបានបន្ថែមថា គណៈមេប្រយោគ ដែលបានចាត់តាំងក្នុងដំណើរការកំណែនឹងត្រូវទទួលបានការឧបត្ថម្ភដោយថវិការដ្ឋ តាមគោលការណ៍កំណត់ដោយគិតរយៈពេលបំពេញការងារ ៣ថ្ងៃ រួមមាន៖ ប្រធាន អនុប្រធានមណ្ឌលកំណែ គណៈកម្មការបែងចែកសន្លឹកកិច្ចការបូក គណៈកម្មការកំណែនឹងត្រូវបានទទួលការឧបត្ថម្ភដោយថវិការដ្ឋតាមគោលការណ៍កំណត់ដោយ គិតរយៈពេលបំពេញការងារ ៤ថ្ងៃ ដោយគិតទាំងការឧបត្ថម្ភលើការស្នើប្រធានវិញ្ញាសាផង លើកលែង តែគណៈកម្មការកំណែមុខវិជ្ជាភាសាខ្មែរ ដែលត្រូវញែកចេញជាពីរគឺ៖ តែងសេចក្តី និងការ សរសេរតាមអាន ត្រូវបានគិតរយៈពេលបំពេញការងារ ៦ថ្ងៃ។

ចំណែកគណៈមេប្រយោគដែលបានចាត់តាំងក្នុងដំណើរការស្រង់ បូកពិន្ទុ និងគូសជាប់ ធ្លាក់ នឹងត្រូវបានទទួល ការឧបត្ថម្ភដោយថវិការដ្ឋ តាមគោលការណ៍កំណត់ដោយគិតរយៈពេលបំពេញការងារ ៣ថ្ងៃ រួមមាន៖ ប្រធាន អនុប្រធានមណ្ឌលស្រង់ បូកពិន្ទុ និងគូសជាប់ ធ្លាក់បូក គណៈកម្មការស្រង់ បូកពិន្ទុ និងគូសជាប់ ធ្លាក់។

លោកស្រីបានបញ្ជាក់ថាក្រសួងអប់រំយុវជននិងកីឡាទើបតែបញ្ចប់ដំណើរការសំណេរប្រឡឌីប្លូមរយៈពេល២ថ្ងៃគឺថ្ងៃទី១៤និងទី១៥ខែកក្តដាឆ្នាំ២០២៥ដោយមានបេក្ខជនប្រឡងនៅទូទាំងប្រទេសចំនួន១៧៧ ៣៨២ នាក់ស្រី ៩៥ ៥០៩ នាក់ចែកជា១៨៤៥ មណ្ឌល ទាំងរដ្ឋនិងឯកជនបើធៀបទៅនឹងឆ្នាំមុនមានការថយចុះគួរឱ្យកត់សម្គាល់ខណៈឆ្នាំមុនមានបេក្ខជនចំនួន ២០១ ៧១២ នាក់ ស្រី ១០៧ ៨០៦ នាក់ ចែកជា ២ ០៩៦ មណ្ឌលទាំងរដ្ឋ និងឯកជន៕

អត្ថបទ៖ សំអឿន