ព័ត៌មានជាតិ

ប្រធានសភាស្នើដល់កូរ៉េឱ្យបង្កើនចំនួនកូតាពលករខ្មែរបន្ថែមទៀត

បានផុស

៤០ វិនាទី មុន

នៅ

ថ្ងៃសុក្រ ១៨ កក្កដា ២០២៥

ដោយ

ប្រធានសភាកម្ពុជា សម្ដេចសភាធិបតី ឃួន សុដារី បានស្នើដល់សាធារណរដ្ឋកូរ៉េឱ្យបង្កើននូវកូតាដល់ពលករខ្មែរបានទៅធ្វើការនៅប្រទេសកូរ៉េបន្ថែមទៀត ស្របពេលដែលទំនាក់ទំនងប្រទេសទាំងពីរកាន់តែត្រូវបានតំឡើងដល់ «ភាពជាដៃគូយុទ្ធសាស្ត្រ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងជំនួបជាមួយឯកអគ្គរដ្ឋទូតកូរ៉េលោក ផាក ជុងវូក (PARK Jung-Wook) នៅវិមានរដ្ឋសភាកាលពីថ្ងៃទី១៧ ខែកក្កដា ឆ្នាំ២០២៥ សម្ដេចសភាធិបតី ឃួន សុដារី បានជំរុញឱ្យមាននូវអនុស្សរណៈនៃយោគយល់គ្នារវាងរដ្ឋសភាកម្ពុជានិងរដ្ឋសភាសាធារណកូរ៉េ ដើម្បីពង្រឹងកិច្ចសហប្រតិបត្តិការរដ្ឋសភាប្រទេសទំាងពីរកាន់តែសកម្ម ស៊ីជម្រៅ ទំាងកម្រិតទ្វេភាគី និងពហុភាគី ដោយយកផលប្រយោជន៍ពលរដ្ឋជាស្នូល ក្នុងពេលដែលកម្ពុជា និងកូរ៉េខាងត្បូងបានដំឡើងកម្រិតទំនាក់ទំនងទ្វេភាគី “ភាពជាដៃគូយុទ្ធសាស្ត្រ” កាលពីឆ្នាំ២០២៤ កន្លងទៅ។

សម្ដេចបន្ថែមថា៖ «ការដំឡើងកម្រិតទំនាក់ទំនងនេះពិតជាមិនមែនជារឿងចៃដន្យ ឬងាយៗនោះទេ។ ការណ៍នេះបានឆ្លុះបញ្ចាំងយ៉ាងច្បាស់អំពីវឌ្ឍនភាព នៃទំនាក់ទំនង និងកិច្ចសហប្រតិបត្តិការទ្វេភាគី ដោយផ្អែកលើការជឿទុកចិត្តគ្នា ការគោរពគ្នា ការយោគយល់គ្នា ផ្តល់ផលប្រយោជន៍ឱ្យគ្នាទៅវិញទៅមក»។

សម្ដេចបានស្នើដល់សាធារណកូរ៉េ បង្កើននូវចំនួនកូតាពលរដ្ឋខ្មែរទៅធ្វើការនៅសាធារណររដ្ឋកូរ៉េ ដោយថាការទៅបម្រើការងារនៅសាធារណកូរ៉េ មិនត្រឹមទទួលបាននូវប្រាក់ចំណូលខ្ពស់ប៉ុណ្ណោះទេ តែបានផ្តល់នូវបទពិសោធន៍ ជំនាញបច្ចេកទេសខ្ពស់ ដល់ពលករយកមកអនុវត្តនៅកម្ពុជាផងដែរ។

កាលពីឆ្នាំ២០២៣ ប្រទេសភាគីកូរ៉េបានសន្យាក្នុងការផ្តល់កូតាជូនពលករកម្ពុជាឱ្យបានជាងជាងមួយម៉ឺននាក់ទៀត តាមរយៈគណៈកម្មាធិការបណ្តុះ បណ្តាល និងបញ្ជូនពលករទៅបរទេស (MTOSB) នៃក្រសួងការងារ និងបណ្តុះបណ្តាលវិជ្ជាជីវៈ ដែលនឹងធ្វើការជ្រើសរើសពលករកម្ពុជា ដែលមានសមត្ថភាព និងឧស្សាហ៍ព្យាយាមក្នុងការបំពេញការងារជូនដល់និយោជកកូរ៉េ ឱ្យកាន់តែមានផលិតភាពខ្ពស់។ របាយការណ៍ឆ្នាំ២០២១ មានពលករខ្មែរធ្វើការនៅប្រទេសកូរ៉េប្រមាណជាង៤ម៉ឺន៥ពាននាក់៕