មណ្ឌល​ប្រឡង​ភ្នំពេញ​ មាន​បេក្ខជន​ប្រឡង​ជាប់​ឌីប្លូម​ជាង​១ម៉ឺន៥ពាន់នាក់ ស្មើនឹងជាង៩០%

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បាន​មាន​ប្រសាសន៍នៅព្រលប់ថ្ងៃទី២១ កក្កដានេះថា លទ្ធផលប្រឡងសញ្ញាបត្រ មធ្យម​សិក្សាបឋមភូមិ ឬ ឌីប្លូម​សម័យ​ប្រឡង ១៤ កក្កដា ២០២៥នៅមណ្ឌលប្រឡងរាជធានីភ្នំពេញមានបេក្ខជនប្រឡងចំនួន ១៥ ៧៥៧ នាក់ស្រី ៨ ២៣២ នាក់ស្មើនឹង៩០.៦៧%ស្រី ៩៣.៦០% ក្នុង​ចំណោម​បេក្ខជន​មក​ប្រឡង១៧ ៣៧៩នាក់ ស្រី៨៧៩៥នាក់ នៃបេក្ខជនដាក់ពាក្យប្រឡងសរុបចំនួន១៧ ៦៦៥ នាក់ស្រី ៨៩៣៥នាក់ ចែកជា៦៥ មណ្ឌលត្រូវជា៧៤៣ បន្ទប់។

លោក​ប្រធាន​មន្ទីរ​បាន​បន្ត​ថា ក្នុងចំណោមបេក្ខជនប្រឡងជាប់ចំនួន ១៥ ៧៥៧ នាក់​ក្នុង​នោះ​បេក្ខជន​ទទួល​បាន​និទ្ទេសល្អមានចំនួន១១.៥៦%ស្រី ១៤.៨៧% និទ្ទេសល្អបង្គួរចំនួន៣០.១៤%ស្រី ៣៤.៣៣%និង និទ្ទេស​មធ្យម​ចំនួន ៥៨.៣០%ស្រី ៥០.៨០%។

លោក​ប្រធាន​មន្ទីរ​បាន​បន្ត​ទៀត​ថា តួលេខ​នេះ​បើ​ធៀប​ទៅ​នឹង​ប្រឡង​ឆ្នាំ​មុន​ឃើញ​ថា មាន​ការ​កើនឡើងបន្តិចបន្តួច ដោយឆ្នាំមុនមានបេក្ខជនដាក់ពាក្យប្រឡងចំនួន ១៨ ៥២៦ នាក់ ស្រី ៩ ៤៩៨ នាក់ មាន ៦៤ មណ្ឌល ចែកជា ៧៧៧ បន្ទប់ ក្នុងនោះមានបេក្ខជនមកប្រឡងចំនួន ១៨ ៣០៤ នាក់ ស្រី ៩ ៣៩៨ នាក់ ក្នុងនោះមានបេក្ខជនប្រឡងជាប់ចំនួន ១៦ ៥៨៩ នាក់ ស្រី ៨ ៧៦១ នាក់ ស្មើនឹង ៩០,៦៣%។ បេក្ខជនប្រឡងជាប់និទ្ទេសល្អចំនួន ១១.២១% បេក្ខជនជាប់និទ្ទេសល្អបង្គួរ ៣២.៧៣% និងបេក្ខជនជាប់និទ្ទេសមធ្យម ៥៦.០៦%។

លោកស្រី ឃួន វិច្ឆិកា អ្នកនាំ​ពាក្យក្រសួងអប់រំ យុវជន និងកីឡា បានមានប្រសាសន៍ ថាសម្រាប់ឆ្នាំនេះមានបេក្ខជនប្រឡងឌីប្លូមចំនួន១៧៧ ៣៨២ ក្នុងនោះស្រី ៩៥ ៥០៩ នាក់ចែកជា១៨៤៥ មណ្ឌល​ទាំង​រដ្ឋ​និង​ឯកជន​បើ​ធៀប​ទៅ​នឹង​ឆ្នាំ​មុន​មាន​ការ​ថយ​ចុះគួរឱ្យកត់សម្គាល់ ខណៈ​ឆ្នាំមុនមានបេក្ខជនដាក់ពាក្យប្រឡងនៅទូទាំងប្រទេសចំនួន ២០១ ៧១២ នាក់ ស្រី ១០៧ ៨០៦ នាក់ ចែក​ជា ២ ០៩៦ មណ្ឌលទាំងរដ្ឋ និងឯកជន។

លោកស្រីបានបន្តទៀតថា ក្រសួងអប់រំ បន្តប្រគល់សិទ្ធិអំណាច និងការទទួលខុសត្រូវទាំងស្រុង ជូនគ្រឹះស្ថានមធ្យមសិក្សានីមួយៗរៀប​ចំ​ការ​ប្រឡង​ចាប់​តាំង ពី​ការ​រៀប​ចំ​វិញ្ញាសា ដំណើរ​ការ​សំណេរ កំណែ ស្រង់បូកពិន្ទុ និងប្រកាសលទ្ធផលនៅតាមគ្រឹះស្ថានមធ្យមសិក្សានីមួយៗ។

គ្រឹះស្ថានមធ្យមសិក្សានីមួយៗត្រូវប្រើប្រាស់បុគ្គលិកអប់រំ នៅ​ក្នុង​គ្រឹះស្ថាន​មធ្យម​សិក្សា​របស់​ខ្លួន​ធ្វើ​ជា​មេ​ប្រយោគប្រឡង។ មន្ទីរអប់រំ យុវជន និងកីឡា មានភារកិច្ចបញ្ជូនមន្ត្រីជំនាញ ដើម្បី​ត្រួត​ពិនិត្យ​តាមមណ្ឌលប្រឡងមួយចំនួន ក្នុងករណី ចាំបាច់ដោយប្រើប្រាស់ថវិកាកម្មវិធីរបស់អង្គភាព និងមានភារកិច្ចចេញវិញ្ញាបនបត្របណ្តោះអាសន្ន​មធ្យមសិក្សាបឋមភូមិ ជូន​ដល់​បេក្ខជន​ទាំង​អស់​ដែលប្រឡងជាប់។

គួរបញ្ជាក់ថា ចំពោះរបបពិន្ទុដែលបេក្ខជនទទួលបានជាអតិបរមាមានចំនួន៤៤៥ពិន្ទុ និងរបបពិន្ទុប្រចាំឆ្នាំ១០០ពិន្ទុ សរុបពិន្ទុទាំងអស់៥៤៥ពិន្ទុ។ ប៉ុន្តែ​ដោយសារ​ភាសាបរទេស​ជា​វិញ្ញាសា​ស្ម័គ្រចិត្ត ដូចនេះពិន្ទុប្រឡងជាប់គឺ៥៤៥ ដក២៥ រួចចែកនឹង២ស្មើនឹង២៦០ពិន្ទុ សម្រាប់​បេក្ខជន​ចំណេះ​ទូទៅ​និង​បំពេញវិជ្ជា។ ចំពោះបេក្ខជនស្វ័យរិនពិន្ទុជាប់៤៤៥ដក២៥ចែកនឹង២ ស្មើនឹង ២១០ ពិន្ទុ។

ពិន្ទុដែល​ទទួល​បាន​និទ្ទេស​មធ្យម​ គឺចាប់​ពី២៦០ដល់៣៣៧ពិន្ទុ និទ្ទេស​ល្អ​បង្គួរ​ចាប់​ពី​៣៣៨​ដល់​៤១៥ពិន្ទុ និងនិទ្ទេសល្អចាប់៤១៦ពិន្ទុឡើងទៅ សម្រាប់​បេក្ខជន​ចំណេះ​ទូទៅ​ និងបំពេញវិជ្ជា។ ចំពោះ​បេក្ខជន​ស្វៃរិន​ពិន្ទុចាប់ពី២១០ដល់២៧២ ទទួល​និទ្ទេស​មធ្យម។ ពិន្ទុ​ចាប់​ពី​២៧៣​ដល់៣៣៥​ទទួល​បាន​និទ្ទេស​ល្អ​បង្គួរ​និង​ពិន្ទុ​ចាប់​ពី៣៣៦ឡើងទៅទទួលបាននិទ្ទេស​ល្អ៕

អត្ថបទ ៖ សំអឿន