ព័ត៌មានជាតិ

អភិបាលខណ្ឌឫស្សីកែវ ស្នើម្ចាស់ទីតាំងអគារខុនដូ ជំរុញជនបរទេសដែលមក ស្នាក់នៅ ចុះបញ្ជីផ្តល់ព័ត៌មានក្នុងប្រព័ន្ធគ្រប់គ្រងបច្ចុប្បន្នភាពជនបរទេសនៅកម្ពុជា

បានផុស

១០ ខែ មុន

នៅ

ថ្ងៃព្រហស្បតិ៍ ២៤ កក្កដា ២០២៥

ដោយ

លោក ជិន ប៊ុនធឿន អភិបាលខណ្ឌឫស្សីកែវ បានស្នើម្ចាស់ទីតាំងអគារខុនដូទាំងអស់ ជំរុញជនបរទេសដែលមកស្នាក់នៅទីតាំងរបស់ខ្លួន ចុះបញ្ជីផ្តល់ព័ត៌មានក្នុងប្រព័ន្ធគ្រប់គ្រងបច្ចុប្បន្នភាពជនបរទេសនៅកម្ពុជា ហៅកាត់ថា FPCS (Foreign Presence in Cambodia System) របស់អគ្គនាយកដ្ឋានអន្តោប្រវេសន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើបែបនេះ ក្នុងឱកាស លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌ បានបន្តដឹកនាំមន្ត្រីក្រោមឱវាទ ចុះពិនិត្យអគារស្នាក់នៅខុនដូ ២ ទីតាំង ស្ថិតក្នុងសង្កាត់ទួលសង្កែទី ២ រួមមាន ៖ ទី១-អគារ TV TOWER និង ទី២-អគារកាំកូ កាលពីល្ងាចថ្ងៃទី ២៣ ខែកក្កដា ឆ្នាំ ២០២៥ ម្សិលមិញ។

នាឱកាសនោះ លោកអភិបាលខណ្ឌ បានជំរុញដល់អ្នកគ្រប់គ្រងទីតាំង បង្កើនការគ្រប់គ្រងជនបរទេសដែលចូលមកស្នាក់នៅឲ្យបានច្បាស់លាស់ និងចូលរួមសហការជាមួយអាជ្ញាធរ ដើម្បីការពារសុវត្ថិភាពជនបរទេស។

ជាមួយគ្នានេះ លោកអភិបាលខណ្ឌ បានស្នើម្ចាស់ទីតាំងអគារខុនដូទាំងអស់ ជំរុញជនបរទេសដែលមកស្នាក់នៅទីតាំងរបស់ខ្លួនទាំងអស់ ត្រូវចុះបញ្ជីផ្តល់ព័ត៌មានក្នុងប្រព័ន្ធគ្រប់គ្រងបច្ចុប្បន្នភាពជនបរទេសនៅកម្ពុជា ហៅកាត់ថា FPCS (Foreign Presence in Cambodia System) របស់អគ្គនាយកដ្ឋានអន្តោប្រវេសន៍។ មិនតែប៉ុណ្ណោះ លោកអភិបាល ក៏បានស្នើដល់លោកអធិការ-អធិការរង ជាពិសេសនាយប៉ុស្តិ៍នគរបាលរដ្ឋបាល និងមន្ត្រីនគរបាលប៉ុស្តិ៍រដ្ឋបាល ទាំង ៧ ត្រូវបង្រៀនអំពីរបៀបប្រើប្រាស់ប្រព័ន្ធ FPCS ដល់បណ្តាម្ចាស់ទីតាំង ខុនដូ សណ្ឋាគារ ផ្ទះសំណាក់ ឬអ្នកកាន់កាប់លំនៅឋានគ្រប់ប្រភេទ។

សូមបញ្ជាក់ថា ការប្រើប្រព័ន្ធអេឡិចត្រូនិក FPCS (Foreigner Presence in Cambodia System) អត្តសញ្ញាណជនបរទេសទាំងអស់ នឹងចូលទៅក្នុងប្រព័ន្ធគ្រប់គ្រងរបស់សមត្ថកិច្ច ហើយក៏ងាយស្រួលក្នុងការគ្រប់គ្រងជនបរទេស ជាពិសេសការបង្ក្រាបបទល្មើស និងក្រុមឧក្រិដ្ឋជនឆ្លងដែន បានទាន់ពេលផងដែរ៕

អត្ថបទ ៖ សំណាង