ខេត្តថៃភាគខាងជើងកំពុងប្រឈមទឹកជំនន់ធ្ងន់ធ្ងរ

ភ្លៀងធ្លាក់ខ្លាំងនៅភាគខាងជើងប្រទេសថៃ បណ្តាលឱ្យទឹកទន្លេ Sai ហក់ឡើងនៅព្រឹកថ្ងៃចន្ទ ដោយជន់លិចតំបន់ទីប្រជុំជនក្នុងស្រុក Mae Sai ខេត្តឈៀងរ៉ៃ (Chiang Rai) ជាប់ព្រំដែនជាមួយមីយ៉ាន់ម៉ា។ នេះបើយោងតាមការចេញផ្សាយរបស់កាសែត Bangkok Post នៅថ្ងៃទី២៨ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយសារតែភ្លៀងធ្លាក់ខ្លាំងយ៉ាងគំហុកធ្វើឲ្យទឹកទន្លេ Sai ហក់ឡើងហូរចូលទៅក្នុងផ្សារ Sai Lom Joy និងផ្ទះនៅក្បែរនោះ ដោយជំរុញឱ្យមានការជម្លៀសចេញ ជាពិសេសសម្រាប់មនុស្សចាស់។ អាជ្ញាធរ​មូលដ្ឋាន​ថៃបាន​ចេញ​ការ​ប្រកាស​អាសន្ន​ទឹក​ជំនន់​សម្រាប់​សហគមន៍​ក្បែរ​នោះ​មួយ​ចំនួន​រួម​មាន Koh Sai, Mai Lung Khon, និង Muang Daeng។

លើសពីនេះនៅស្រុក Doi Luang ផ្លូវត្រូវលិចទឹក ហើយទឹកជំនន់ភ្លាមៗត្រូវបានរាយការណ៍នៅក្នុងតំបន់ជាច្រើន។ ស្រុកផ្សេងទៀតដែលតម្រូវឲ្យមានការប្រុងប្រយ័ត្នខ្ពស់រួមមាន Chiang Khong, Wiang Kai និង Wiang Rung ។

នាយកដ្ឋានឧតុនិយមថៃបានព្រមានថានឹងមានភ្លៀងធ្លាក់ខ្លាំងបន្ថែមទៀតនៅថ្ងៃច័ន្ទ និងថ្ងៃអង្គារ ជាពិសេសនៅខេត្តChiang Rai, Phayao និង Nan។ ប្រជាពលរដ្ឋ​ក្នុងខេត្តទាំងនោះត្រូវ​ប្រុង​ប្រយ័ត្ន និង​រើ​របស់របរ​ទៅ​កាន់​ទីទួល​ខ្ពស់ជាការត្រៀមបង្ការ​។

គួរបញ្ជាក់ថាខេត្តថៃភាគច្រើនកំពុងប្រឈមនឹងវិបត្តិអាកាសធាតុ ដូចជាទឹកជំនន់ធ្ងន់ធ្ងរ ក្នុងនោះខេត្ត Nan រងគ្រោះធ្ងន់ធ្ងរជាងគេដោយនៅតំបន់ខ្លះក្នុងខេត្តនេះទឹកជំនន់ហក់ឡើងដល់ ១២ ម៉ែត្រឯណោះ៕

អត្ថបទ៖ ប៊ុន សុភាព