ជីវិតកម្សាន្ដ

G-Devith នាំយកសម្ភារៈបច្ចេកវិទ្យាចាំបាច់-ស្បៀង ជូនវីរៈកងទ័ព ខណៈមូលនិធិអ្នកចម្បាំងឈាមខ្មែរ នឹងបន្តរហូតអស់ថវិកា

បានផុស

១១ ខែ មុន

នៅ

ថ្ងៃអាទិត្យ ៣ សីហា ២០២៥

ដោយ

តាមរយៈមូលនិធិអ្នកចម្បាំងឈាមខ្មែរ ” KHMER WARRIORS FUND ” តារារ៉េបគូស្នេហ៍ល្បីឈ្មោះ រួមនិងក្រុមការងារ បានទៅជួបកងទ័ពទីរួមខេត្តព្រះវិហារ ដោយបាននាំយកជំនួយជាស្បៀង សម្ភារៈ ព្រមទាំងបានសួរសុខទុក្ខនិងប្រគល់ថវិកាផងដែរ។ នេះបើតាមសំណេររបស់លោក G-Devith បានបញ្ជាក់នៅថ្ងៃទី០២ សីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក G-Devith ក្នុងនាមជាអ្នកតំណាងឱ្យអ្នកគាំទ្រនិងសប្បុរសជន បាននាំនូវស្បៀងអាហារ របស់ប្រេីប្រាស់គ្រប់មុខ ព្រមទាំង សូឡា , តង់ , កំព្យូទ័រ , ម៉ាសុីន Printer និង ថវិកា ទៅកាន់គោលដៅបីចំណុចនៅជួរមុខ រួមមាន តំបន់មុំ៣ តំបន់អានសេះ និង បុសស្បូវ។

ក្នុងដំណើរនាំយកការឧបត្ថម្ភជូនវីរកងទ័ពនេះ លោកនិងក្រុមការងារបេសកកម្ម បានសួរសុខទុក្ខនិងប្រគល់ថវិកាដល់អ្នកកំពុងសម្រាកព្យាបាលធ្ងន់ស្រាលជាង ១២០នាក់ ព្រមទាំងទឹកប្រាក់ឧបត្ថម្ភមួយចំនួនដល់មន្ទីពេទ្យផងដែរ។

សកម្មភាពនៃទឹកចិត្តសប្បុរសនេះ ត្រូវបានមហាជនពិសេសកងកម្លាំងឈរជើងនៅតាមបន្ទាត់ព្រំដែនកម្ពុជា សម្តែងការអរគុណ និងជូនពរផងដែរ។

ទន្ទឹមនេះ G-Devith និងអ្នកនាង ទេព បូព្រឹក្ស ក៏បង្ហាញការអរគុណដល់សប្បុរសជនដែលរួមចំណែកនឹងលោកផងដែរ។ លោកថា “ដោយក្តីសាមគ្គីនៃមូលនិធិនេះ សូមបងប្អូនដែលបានចូលរួម បានទទួលនូវកុសលផលបុណ្យតាមបច្ច័យរៀងៗខ្លួន”។

លោកបន្ថែមថា “បងកងទ័ពយើងគាត់បានផ្តាំមកថា អរគុណដល់បងប្អូនមូលនិធិអ្នកចម្បាំងឈាមខ្មែរ ដែលបានយកចិត្តទុកដាក់ជាមួយគាត់ គាត់ពិតជាត្រេកអរ និង មានមោទនភាពណាស់”។

គួរជម្រាបថា នេះពុំមែនជាលើកទី១សម្រាប់ដំណើរបេសកកម្មនាំយកទឹកចិត្តសប្បុរសជន ទៅកាន់វីរកងទ័ពដែលកំពុងបំពេញភារកិច្ចការពារអធិបតេយ្យភាពកម្ពុជា។ តាមការគូសបញ្ជាក់ បេសកកម្មមូលនិធិអ្នកចម្បាំងឈាមខ្មែរ ” KHMER WARRIORS FUND “ នឹងបន្តនៅថ្ងៃស្អែក និងថ្ងៃបន្តបន្ទាប់ទៀតរហូតដល់អស់ទឹកប្រាក់៕