ក្រុមនិស្សិតចិន ធ្វើទស្សនកិច្ចសិក្សាឈ្វេងយល់អំពីកិច្ចប្រតិបត្តិការសកម្មភាពមីននៅកម្ពុជា      

ក្រុមនិស្សិតចិនប្រមាណ១០រូប ដែលសិក្សានៅសហរដ្ឋអាមេរិក នៃក្រុមផ្សព្វផ្សាយសន្តិភាពសកល (Global Peace Advocates Team) និងមូល​និធិអាប៉ូឡូ (Apollo Foundation) បានចុះមកសិក្សាឈ្វេងយល់អំពីកិច្ចប្រតិបត្តិការសកម្មភាពមីននៅកម្ពុជា។ ដំណើរ​ទស្សនកិច្ច​ ធ្វើនៅថ្ងៃទី១៣ ខែសីហានេះ ប្រព្រឹត្ត​ទៅ​ក្រោម​ការ​សម្របសម្រួល​របស់​ក្រុមហ៊ុន​ Global Sunshine Group ដែល​បាន​និង​កំពុង​រកស៊ី​នៅ​ក្នុង​ប្រទេស​កម្ពុជា​ និងអញ្ជើញទទួល​ស្វាគមន៍ដោយ លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដំណើរទស្សនកិច្ចនេះ មន្រ្តីអាជ្ញាធរមីន បានធ្វើបទបង្ហាញសង្ខេបអំពីបញ្ហាមីន និងសំណល់ជាតិផ្ទុះពីសង្រ្គាមនៅកម្ពុជា និងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាមីនរយៈពេលជាង ៣០ឆ្នាំ ដើម្បីគាំទ្រដល់ការអភិវឌ្ឍសេដ្ឋកិច្ចសង្គម និងគាំពារដល់សុខសន្តិភាពនៅកម្ពុជា។

លោកទេសរដ្ឋមន្រ្តី លី ធុជ បានថ្លែងប្រាប់ក្រុមនិស្សិតថា ការងារបោស សម្អាត​មីន និងសំណល់ជាតិផ្ទុះពីសង្រ្គាម គឺជាកិច្ចការមួយចាំបាច់បន្ទាប់ពីការបញ្ចប់សង្រ្គាមរ៉ាំរ៉ៃនៅកម្ពុជា ដើម្បីគាំទ្រដល់ការស្តារឡើងវិញនូវសេដ្ឋកិច្ចសង្គម និងធ្វើឱ្យប្រទេសកម្ពុជាមានសុវត្ថិភាពជាងមុន ប៉ុន្តែការបោស​សម្អាតមីននេះ អាចដំណើរការបានគ្រប់ជ្រុងជ្រោយ គឺដោយសារកម្ពុជាទទួលបាននូវសុខសន្តិភាពពេញលេញ ក្រោមនយោយឈ្នះឈ្នះរបស់ សម្តេចតេជោ ហ៊ុន សែន អតីតនាយករដ្ឋមន្រ្តី។

លោកបានបន្តទៀតថា ដើម្បីដោះស្រាយបញ្ហា​មីន​ដែលនៅសេសសល់ រាជរដ្ឋាភិបាលអាណត្តិទី៧របស់ សម្តេចធិបតី ហ៊ុន ម៉ាណែត នាយករដ្ឋមន្រ្តី នៅតែបន្តគាំទ្រ និងដឹកនាំឥតងាករេ ជាមួយ​នឹង​ការដាក់ចេញនូវចក្ខុវិស័យ ការយកចិត្តទុកដាក់ និងការប្តេជ្ញាចិត្តខ្ពស់ ដែលអាចឱ្យកម្ពុជាសម្រេចគោលដៅគ្មានផលប៉ះពាល់ដោយសារមីន និងសំណល់ជាតិផ្ទុះពីសង្រ្គាម។

លោកបានគូសបញ្ជាក់បន្ថែមដល់ក្រុមនិស្សិតចិនថា ដើម្បីអាចឱ្យកម្ពុជាសម្រេចនូវគោលដៅរបស់ខ្លួន ការរួមចំណែករបស់ប្រទេសជា​មិត្ត​ ដៃគូអភិវឌ្ឍន៍ និង​សប្បុរសជន​នានា​ ពិតជាមានសារៈសំខាន់ណាស់ ក្នុងការដោះស្រាយហានិភ័យនៃសំណល់ជាតិផ្ទុះពីសង្រ្គាមដែលនៅសេសសល់។ ក្នុងឱកាស​នោះ​ លោក លី ធុជ បានស្នើឱ្យក្រុមនិស្សិតចិនដែល​មកទស្សនកិច្ចនៅកម្ពុជា គាំទ្រ និងចូលរួមផ្សព្វផ្សាយអំពីកិច្ចខិតខំប្រឹងប្រែង និងសមិទ្ធផលសម្រេចបានរបស់កម្ពុជា នាពេលកន្លងមក ក្នុងនោះ​រួមទាំងការងារបោសសម្អាតមីន ផងដែរ។

ពាក់ព័ន្ធបញ្ហាមីន អ្នកនាំពាក្យរាជរដ្ឋាភិបាលកម្ពុជាលោក ប៉ែន បូណា ថ្លែងថា កម្ពុជាបានចូលជាសមាជិកអនុសញ្ញាស្តីពីការហាមប្រាមប្រើប្រាស់គ្រាប់មីនតាំងពីឆ្នាំ ១៩៩៩ ដែលមកដល់ពេលនេះកម្ពុជាបានដោះមីន និងបំផ្លាញគ្រាប់មីនប្រឆាំងមនុស្ស ព្រមទាំងគ្រាប់មិនទាន់ផ្ទុះផ្សេងៗទៀតដែលជាកាកសំណលពីសង្គ្រាមជាច្រើនលានគ្រាប់។​ លើសពីនេះ កម្ពុជាបានចូលរួមយ៉ាងសកម្មនៅក្នុងបេសសកម្មថែរក្សាសន្តិភាពពិភពលោក និងចូលរួមចំណែកដោះមីនក្នុងបណ្តាប្រទេសជាច្រើន។ លោកថ្លែងថា៖«កេរ្តិ៍ឈ្មោះរបស់កម្ពុជានៅពេលនេះ គឺការដោះមីន និងបំផ្លាញគ្រាប់មីនប្រឆាំងមនុស្ស មិនមែនការដាក់មីនថ្មីនោះទេ»៕