ព័ត៌មានអន្ដរជាតិ

Boonsin Padklang រអើលខ្លួនឯង រឿងប្រឈមផ្លូវច្បាប់ឧក្រិដ្ឋកម្មសង្គ្រាម

បានផុស

៨ ខែ មុន

នៅ

ថ្ងៃព្រហស្បតិ៍ ១៤ សីហា ២០២៥

ដោយ

មេបញ្ជាការយោធាថៃប្រចាំតំបន់ភូមិភាគ២ លោក ប៊ុនស៊ីន ផាតក្លាង (Boonsin Padklang) ហាក់ដូចជាដឹងខ្លួនឯងថា អាចប្រឈមនឹងការចោទប្រកាន់«ឧក្រិដ្ឋកម្មសង្គ្រាម (War Crime)» ក្រោយពេលដែលខ្លួនចូលនិវត្តន៍ក្នុងពេលដ៏ខ្លីខាងមុខនេះ។

ឧត្តមសេនីយ៍ ប៊ុនស៊ីន ផាតក្លាង ដែលជនទីមួយបង្កឲ្យមានភាពតានតឹងជាសាធារណៈ និងបង្កើនការគំរាមកំហែងបញ្ឆេះកំហឹង រហូតដល់បង្កឲ្យមានការផ្ទុះអាវុធទ្រង់ទ្រាយធំដែលឈានទៅសម្លាប់ប្រជាពលរដ្ឋស្លូតត្រង់រាប់សិបនាក់ និងការបំផ្លិចបំផ្លាញសម្បតិ្តវប្បធម៌ ទីអារាម ផ្ទះសម្បែងប្រជាជន និង ហេដ្ឋារចនាសម្ព័ន្ធស៊ីវិល។

យោងសារព័ត៌មានថៃ The Nation ផ្សាយនៅថ្ងៃទី១៤សីហានេះ លោក ប៊ុនស៊ីន ផាតក្លាង បានលើកឡើងជាសាធារណៈអំពីលទ្ធភាពដែលខ្លួនអាចប្រឈមផ្លូវច្បាប់ ដោយហាក់ដូចលួងខ្លួនឯងថា ខ្លួនមិនព្រួយបារម្ភអំពីវិធានការផ្លូវច្បាប់និងការវាយប្រហារផ្ទាល់ខ្លួនដែលអាចកើតនៅពេលលោកចូលនិវត្តន៍នៅពេលខាងមុខ ប៉ុន្តែច្បាស់ណាស់ថា ទង្វើឧក្រិដ្ឋដែលលោក ប៊ុនស៊ីន បានបង្កើតឡើង នឹងប្រឈមពាក្យបណ្តឹងបទចោទ «ឧក្រិដ្ឋកម្មសង្គ្រាម»។

យោធាថៃបានចាប់ផ្តើមវាយប្រហារបង្កជម្លោះជាមួយកម្ពុជាជាបន្តបន្ទាប់រហូតដល់មានការផ្ទុះអាវុធបាញ់សម្លាប់ទាហានកម្ពុជាដំបូងនៅថ្ងៃទី២៨ខែឧសភា ហើយ ទាហានថៃបានធ្វើសកម្មភាពបង្កហេតុជាច្រើន ដូចជា ការរាយបន្លាលួសបិទប្រាសាទរបស់កម្ពុជា ការដើរចូលទឹកដីកម្ពុជារួចជាន់មីន បាត់បង់ជីវិតទាហាន និងពិការជើង ដើម្បីចោទប្រកាន់កំហុសដល់យោធាកម្ពុជាជាដើម។

រហូតដល់ថ្ងៃចាប់ផ្តើមផ្ទុះអាវុធទ្រង់ទ្រាយធំនៅថ្ងៃទី២៤ខែកក្កដា យោធាថៃបានប្រើប្រាស់ការវាយប្រហារទ្រង់ទ្រាយធំមិនធ្លាប់មាន ដែលជាការប្រុងប្រៀបរៀបចំទុកមុន ដោយក្នុងនោះ គ្រាន់តែការផ្ទុះអាវុធដែលថៃបានបង្កឡើងភ្លាមៗ យោធាថៃ បានប្រើប្រាស់យន្តហោះចម្បាំង F-16 ដើម្បីជំនួយដល់ការវាយប្រហារបំផ្លាញដល់កងទ័ពកម្ពុជា។

ប៉ុន្តែការវាយប្រហាររបស់យោធាថៃដោយប្រើប្រាស់ F-16 និង Gripen ដែលជាយន្តហោះចម្បាំងទំនើបនោះ បានបំផ្លាញដល់ប្រាសាទព្រះវិហារដែលជាសម្បត្តិបេតិកភណ្ឌពិភពលោក វត្តអារាម និងលំនៅឋានប្រជាពលរដ្ឋ៕

រ៉ាន់ រើយ