បុរសហ្វីលីពីន ស្លាប់បន្ទាប់ពីប៉ូលិសដាក់ទណ្ឌកម្មឲ្យអាវ៉ង់៣០០ដង ដោយសារចេញក្រៅផ្ទះទិញទឹកផឹកក្រោយម៉ោង ៦ល្ងាច

បុរសជនជាតិហ្វីលីពីនម្នាក់ដែលរំលោភបម្រាមគោចរ បានស្លាប់បន្ទាប់ពីត្រូវប៉ូលិសដាក់ទណ្ឌកម្មឲ្យអាវ៉ង់៣០០ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Darren Manaog Penaredondo ត្រូវបានប៉ូលិសឃាត់ឲ្យឈប់ នៅពេលចេញក្រៅផ្ទះដើម្បីទិញទឹកផឹក ក្រោយម៉ោង១៨:០០ក្នុងខេត្ត Cavite កាលពីថ្ងៃព្រហស្បតិ៍សប្តាហ៍មុន។

គាត់បានដួលនៅថ្ងៃបន្ទាប់ ហើយក្រោយមកគាត់ក៏បានស្លាប់។

ខេត្ត Cavite ដែលស្ថិតនៅលើកោះ Luzon បច្ចុប្បន្នកំពុងស្ថិតនៅក្រោមការរឹតត្បិតយ៉ាងតឹងរ៉ឹង ដើម្បីទប់ស្កាត់ការរីករាលដាលនៃជំងឺកូវីដ-១៩។

លោក Marlo Solero មេប៉ូលិសក្រុង General Trias បាននិយាយថា គ្មានការដាក់ទណ្ឌកម្មលើរាងកាយចំពោះអ្នកដែលត្រូវបានរកឃើញថា រំលោភបម្រាមគោចរទេ មានតែការប្រៀនប្រដៅពីមន្រ្តីប៉ុណ្ណោះ។ លោកបានប្រាប់ប្រព័ន្ធផ្សព្វផ្សាយក្នុងស្រុកថា ប្រសិនបើមន្រ្តីណាម្នាក់ត្រូវបាន រកឃើញថាបានអនុវត្តការដាក់ទណ្ឌកម្មនោះ ពួកគេនឹងមិនត្រូវបានអត់អោនឲ្យឡើយ។

សាច់ញាតិរបស់ជនរងគ្រោះឈ្មោះ Adrian Lucena បានប្រកាសអំពីមរណភាពរបស់គាត់នៅលើ Facebook។ លោកបាននិយាយថា Penaredondo និងអ្នកផ្សេងទៀតត្រូវបានគេរកឃើញថារំលោភបម្រាមគោចរ ហើយត្រូវអាវ៉ង់ចំនួន១០០ដង។

ប្រសិនបើពួកគេខកខានមិនបានអាវ៉ង់រួមគ្នាក្នុងពេលតែមួយ ពួកគេនឹងត្រូវអាវ៉ង់ ម្នាក់ដល់ទៅ៣០០ដង ពេលត្រឡប់មកផ្ទះវិញ។

បងប្រុសរបស់គាត់និយាយថា គាត់បានត្រឡប់មកផ្ទះវិញនៅម៉ោង៦ព្រឹកថ្ងៃសុក្រ ជាមួយការឈឺចាប់ គាត់មិនអាចដើរបានពេញមួយថ្ងៃ។ នៅថ្ងៃបន្ទាប់ គាត់បានដួលហើយដាច់ខ្យល់ស្លាប់តែម្តង។

លោក Ony Ferrer អភិបាលក្រុង General Trias បានបញ្ជាឲ្យមេប៉ូលិសបើកការស៊ើបអង្កេតឲ្យបានហ្មត់ចត់ចំពោះករណីនេះប៉ុន្តែក្រុមមន្ត្រីបាននិយាយថា គាត់ស្លាប់ដោយសារគាំងបេះដូង៕

ប្រែសម្រួលដោយ៖ Vann Vann

ប្រភព៖ BBC