ហេតុអ្វីលោក គីម ជុងអ៊ុន ប្រើប្រាស់រថភ្លើងដើម្បីធ្វើដំណើរទៅក្រៅប្រទេសជាជាងប្រើយន្តហោះ?

មេដឹកនាំកូរ៉េខាងជើងលោក គីម ជុងអ៊ុន ជាធម្មតាធ្វើដំណើរទៅក្រៅប្រទេសតាមរថភ្លើង ជំនួសការធ្វើដំណើរដោយយន្តហោះ ដូចឪពុករបស់លោក គីម ជុងអ៊ីល និងជីតា លោក គីម អ៊ីលស៊ុង ដែរ។ កាលពីថ្ងៃច័ន្ទ លោក គីមក៏បានចាកចេញពីទីក្រុងព្យុងយ៉ាងតាមរថភ្លើងទៅកាន់ទីក្រុងប៉េកាំង ដោយធ្វើតាមប្រពៃណីគ្រួសារដ៏យូរនេះដដែល។

ហេតុអ្វីបានជាលោក គីម ជុងអ៊ុន ប្រើប្រាស់រថភ្លើងធ្វើដំណើរជាជាងជិះយន្តហោះ?

លោក គីម ជុងអ៊ុន កម្រធ្វើដំណើរតាមយន្តហោះណាស់ ដោយសារតែហានិភ័យផ្នែកសុវត្ថិភាព យន្តហោះដែលអាចទុកចិត្តបានមានកម្រិត និងប្រពៃណីគ្រួសារ ដោយសារទាំងឪពុក និងជីតារបស់គាត់ចូលចិត្តប្រើរថភ្លើងពាសដែក។ រថភ្លើងឯកជនរបស់គាត់ត្រូវបានការពារយ៉ាងខ្លាំង ប្រណិត និងមានសុវត្ថិភាពជាងក្នុងការគ្រប់គ្រង ខណៈពេលដែលវាបម្រើជានិមិត្តរូបនៃអំណាច និងការបន្តពីមេដឹកនាំអតីតកាល។

រថភ្លើងទាំងនេះយឺតជាងយន្តហោះ ប៉ុន្តែមានសុវត្ថិភាពជាង មានការពារខ្លាំង និងមានផាសុខភាពគ្រប់គ្រាន់សម្រាប់ដឹកមនុស្សច្រើនជាមួយថ្នាក់ដឹកនាំកូរ៉េខាងជើង។ បើតាមអ្នកជំនាញនិយាយថារថភ្លើងដ៏ទំនើបនេះជារថភ្លើងពាសដែកច្រើនតែរត់សម្រាប់ការការពារ ជាធម្មតាមានទូរថភ្លើងពី ១០ ទៅ ១៥ទូរ។ ទូរទាំងនោះរួមមានបន្ទប់ឯកជនសម្រាប់ថ្នាក់ដឹកនាំ ការិយាល័យដែលមានឧបករណ៍ទំនាក់ទំនង ភោជនីយដ្ឋាន និងកន្លែងពេទ្យ។

ក្នុងរថភ្លើងក៏មានអង្គរក្ស បុគ្គលិក និងរថយន្តទំនើបការពារដ៏រឹងមាំMercedes-Benz SUV ផងដែរ។ ទូរទស្សន៍កូរ៉េខាងជើងធ្លាប់បានបង្ហាញផ្នែកខាងក្នុងរបស់រថភ្លើងដែលមាន តុបតែងលម្អដោយរបស់របរផ្សេងៗដូចជាសាឡុងពណ៌ផ្កាឈូក ផែនទីនៃប្រទេសចិន និងកូរ៉េ និងអំពូលភ្លើងតុបតែងយ៉ាងស្រស់ស្អាត។

ឪពុក​របស់​លោក គីម គឺ​លោក គីម ជុងអ៊ីល ក៏​ល្បី​ខាង​ប្រើ​រថភ្លើង​ដែរ។ ក្នុងដំណើរកម្សាន្តឆ្នាំ ២០០១ ទៅកាន់ទីក្រុងមូស្គូ រថភ្លើងរបស់គាត់បានដឹកស្រាបារាំងល្អៗ និងបង្កងផ្ទាល់។ ក្រោយ​មក​គាត់​បាន​ស្លាប់​ដោយ​ជំងឺ​គាំង​បេះដូង ខណៈ​កំពុង​ជិះ​រថភ្លើង​មួយ​របស់​គាត់ ដែល​ឥឡូវ​នេះ​ត្រូវ​បាន​គេ​ដាក់​តាំង​នៅ​ក្នុង​ផ្នូរ​របស់​គាត់។ លោក គីម អ៊ីលស៊ុង ស្ថាបនិកប្រទេសកូរ៉េខាងជើង ក៏បានធ្វើដំណើរទៅក្រៅប្រទេសជាចម្បងដោយរថភ្លើង រហូតដល់គាត់បានទទួលមរណភាពនៅឆ្នាំ ១៩៩៤ផងដែរ។

ទោះបីជាយ៉ាងណាក៏ដោយ មានមនុស្សតិចបំផុត ដែលបានឃើញទិដ្ឋភាពខាងក្នុងរថភ្លើង។ នោះរួមទាំងមន្ត្រីរុស្ស៊ីមួយរូបគឺលោក Konstantin Pulikovsky ផងដែរ ដែលនៅក្នុងសៀវភៅ Orient Express របស់គាត់ បានរៀបរាប់ពីមុខម្ហូបអាហារឆ្ងាញ់ៗ ក្នុងអំឡុងពេលធ្វើដំណើរឆ្លងកាត់ចុងបូព៌ារបស់រុស្ស៊ីជាមួយឪពុករបស់លោក គីម គឺលោក គីម ជុងអ៊ីល។

លោក Pulikovsky បានសរសេរថា អ្នកដំណើរអាចជ្រើសរើសមុខម្ហូបចម្រុះ រួមទាំងម្ហូបមកពីកូរ៉េ និងជប៉ុន និងបញ្ជីស្រាដែលរួមមាន Bordeaux និង Burgundy ផងដែរ។ លើសពីនេះ ក្នុងរថភ្លើងមានទាំងសិល្បការិនី ច្រៀងរាំនិងសម្តែងឲ្យភ្ញៀវ មើលកម្សាន្តទៀតផង។

ការធ្វើដំណើរឆ្លងកាត់ព្រំដែនមានភាពស្មុគស្មាញ។ នៅពេលលោក គីម ទៅលេងរុស្ស៊ី កង់របស់រថភ្លើងត្រូវតែផ្លាស់ប្តូរ ព្រោះផ្លូវរបស់រុស្ស៊ីខុសគ្នា។ តែសម្រាប់​ប្រទេស​ចិន មិន​ចាំបាច់​មាន​ការ​ផ្លាស់​ប្តូរ​ទេ ប៉ុន្តែ​មាន​ក្បាលរថភ្លើង​របស់​ចិន​ចូល​ទៅ​ទាញ​រថភ្លើងរបស់កូរ៉េខាងជើង ដោយប្រទេសចិនតែងតែប្រើប្រាស់ម៉ាស៊ីនពិសេសដែលមានលេខ «០០០១ ឬ ០០០២” សម្រាប់ការធ្វើដំណើរ VIP បែបនេះ។ ល្បឿនរថភ្លើងអាចឡើងដល់ ៨០ គីឡូម៉ែត្រក្នុងមួយម៉ោងនៅក្នុងប្រទេសចិន ប៉ុន្តែមានតែប្រហែល ៤៥ គីឡូម៉ែត្រក្នុងមួយម៉ោងប៉ុណ្ណោះនៅក្នុងប្រទេសកូរ៉េខាងជើង។

លោក គីម ក៏បានប្រើប្រាស់រថភ្លើងទាំងនេះសម្រាប់ការធ្វើដំណើរក្នុងស្រុកទៅទីតាំងមានចម្ងាយឆ្ងាយ ទស្សនាកសិដ្ឋាន និងទីប្រជុំជន ដើម្បីផ្សព្វផ្សាយគំនិតរបស់លោកអំពី «របបកុម្មុយនិស្ត» ។ សម្រាប់លោក គីម រថភ្លើងមិនមែនគ្រាន់តែជាផ្លូវសម្រាប់ធ្វើដំណើរនោះទេ វាគឺជាវិមានដែលសុវត្ថិភាព អនុញ្ញាតឱ្យលោកធ្វើការ រស់នៅ និងផ្ដល់ថាមពលនៅពេលកំពុងធ្វើដំណើរ៕

អត្ថបទ៖ ប៊ុន សុភាព