ព័ត៌មានអន្ដរជាតិ

សិង្ហបុរីបញ្ជាឱ្យ Meta ចេញវិធានការ «ប្រឆាំងការឆបោក» បើមិនដូច្នោះទេ អាចរងពិន័យ

បានផុស

៨ ខែ មុន

នៅ

ថ្ងៃពុធ ៣ កញ្ញា ២០២៥

ដោយ

ប៉ូលិសសិង្ហបុរីបានបញ្ជាឱ្យក្រុមហ៊ុន Meta ដែលជាក្រុមហ៊ុនមេរបស់ Facebook អនុវត្ត «វិធានការប្រឆាំងនឹងការឆបោក» ក្នុងការផ្សាយពាណិជ្ជកម្ម គណនី ប្រូហ្វាល់ និងទំព័រអាជីវកម្មដែលក្លែងបន្លំមន្រ្តីរដ្ឋាភិបាលសំខាន់ៗ នៅលើបណ្តាញទំនាក់ទំនងសង្គម Facebook ដើម្បីប្រយុទ្ធប្រឆាំងនឹងការបោកប្រាស់។ នេះបើតាមការឱ្យដឹងរបស់រដ្ឋមន្ត្រីក្រសួងកិច្ចការផ្ទៃក្នុង លោក Goh Pei Ming។

ក្នុងសុន្ទរកថានាថ្ងៃពុធនេះ លោករដ្ឋដដែលបានឱ្យដឹងយ៉ាងដូច្នេះថា ប្រសិនបើ Meta មិនធ្វើដូចការទាមទារ ក្រុមហ៊ុនអាចនឹងត្រូវពិន័យជាប្រាក់រហូតដល់ ១ លានដុល្លារសិង្ហបុរី (៧៧៥ ៦៩៨ ដុល្លារអាមេរិក)។ បទបញ្ជាដដែលធ្វើឡើងក្រោមច្បាប់ស្តីពីឧក្រិដ្ឋកម្មលើអ៊ិនធឺណិតថ្មីរបស់សិង្ហបុរី ដែលបានចូលជាធរមាននៅក្នុងខែកុម្ភៈ ឆ្នាំ ២០២៤។

លោក Goh Pei Ming បាននិយាយបន្តយ៉ាងដូច្នេះថា៖ «យើងកំពុងចេញ (បញ្ជា) ទៅ Meta ពីព្រោះ Facebook គឺជាវេទិកាកំពូល ដែលជនបោកប្រាស់ប្រើសម្រាប់ក្លែងបន្លំការបោកប្រាស់ ហើយប៉ូលិសបានវាយតម្លៃថា ត្រូវតែមានវិធានការច្បាស់លាស់បន្ថែមទៀតដើម្បីទប់ស្កាត់ការបោកប្រាស់»។

មកទល់ពេលនេះ Meta មិនទាន់បានចេញការឆ្លើយតបភ្លាមៗយ៉ាងណាទេ។

គួររំឭកថា កាលពីខែសីហា ក្រសួងកិច្ចការផ្ទៃក្នុងសិង្ហបុរីបានរកឃើញថា ជាង ១/៣ នៃការបោកប្រាស់ពាណិជ្ជកម្មអេឡិចត្រូនិកទាំងអស់ ដែលបានកត់ត្រាក្នុងឆ្នាំ ២០២៤ ត្រូវបានប្រព្រឹត្តនៅលើ Facebook ។ ក្រសួងក៏បានវាយតម្លៃផងដែរថា ពាណិជ្ជកម្មអេឡិចត្រូនិក «Marketplace» របស់ Facebook ថា មានភាពខ្សោយជាងគេ ក្នុងចំណោមវេទិកាពាណិជ្ជកម្មអេឡិចត្រូនិកចំនួន ៥ បើនិយាយអំពីមុខងារប្រឆាំងការបោកប្រាស់៕