ត្រាំ រិះគន់ក្បួនដង្ហែចិន ចំពោះការមិនអើពើនឹងការជួយរបស់អាមេរិកក្នុងសង្រ្គាមលោកលើកទី២

យោងតាមការចេញផ្សាយរបស់ទីភ្នាក់ងារព័ត៌មាន Reuters ប្រធានាធិបតីអាមេរិក លោក ដូណាល់ ត្រាំ បានសរសើរពិធីដ៏ស្រស់ស្អាត របស់ប្រទេសចិន ដែលប្រារព្ធខួបលើកទី ៨០នៃការបញ្ចប់សង្រ្គាមលោកលើកទី២ ប៉ុន្តែបានរិះគន់ទីក្រុងប៉េកាំងចំពោះការខកខានក្នុងការទទួលស្គាល់តួនាទីរបស់អាមេរិកក្នុងការជួយឲ្យជប៉ុនបរាជ័យ។

ថ្លែងពីការិយាល័យរបស់ខ្លួន លោក ត្រាំ បាននិយាយថា សហរដ្ឋអាមេរិកបានជួយប្រទេសចិនយ៉ាងខ្លាំងនិងសមនឹងទទួលបានការទទួលស្គាល់នេះ។ លោកបានកត់សម្គាល់ថា ទីក្រុងវ៉ាស៊ីនតោនបានផ្តល់ការគាំទ្រយ៉ាងសំខាន់ដល់ប្រទេសចិនក្នុងអំឡុងសង្រ្គាម ការផ្គត់ផ្គង់អាវុធ ការបណ្តុះបណ្តាលយោធា និងជំនួយផ្លូវអាកាសដល់កងកម្លាំងចិនដែលកំពុងប្រយុទ្ធនឹងការកាន់កាប់របស់ជប៉ុន ដែលទីបំផុតជប៉ុនបានចុះចាញ់នៅឆ្នាំ ១៩៤៥ ។

ព្រឹត្តិការណ៍ដែលដឹកនាំដោយប្រធានាធិបតីចិន ស៊ី ជីនពីង នៅប៉េកាំងនេះ បានបង្ហាញពីភាពរឹងមាំខាងយោធារបស់ចិន និងបានគូសបញ្ជាក់ពីសម្ព័ន្ធភាពរបស់ចិនជាមួយរុស្ស៊ី និងកូរ៉េខាងជើង។ លោក ប្រធានាធិបតីចិន ស៊ី ជីនពីង​ បានសរសើររដ្ឋាភិបាលបរទេស និងមិត្តភ័ក្តិដែលបានជួយដល់ប្រទេសចិន ប៉ុន្តែមិនបាននិយាយជាក់លាក់ណាមួយអំពីសហរដ្ឋអាមេរិក ពិធីនេះកើតឡើងចំពេលដែលទំនាក់ទំនងរវាងសហរដ្ឋអាមេរិក និងចិនមានភាពតានតឹងលើបញ្ហាពាណិជ្ជកម្ម សន្តិសុខ និងជម្លោះពិភពលោក ទោះបីជាលោក ត្រាំ បានសង្កត់ធ្ងន់លើមិត្តភាពផ្ទាល់ខ្លួនរបស់លោកជាមួយលោក ស៊ី ក៏ដោយ។

លោក ត្រាំ បាននិយាយថាលោក ខកចិត្តចំពោះរឿងនេះ។ លើសពីនេះនៅលើប្រព័ន្ធផ្សព្វផ្សាយសង្គម លោក ត្រាំ បាននិយាយលេងសើចថែមទៀតថា« មេដឹកនាំបរទេសនៅទីក្រុងប៉េកាំង ប្រហែលជាកំពុងរៀបចំផែនការប្រឆាំងនឹងសហរដ្ឋអាមេរិក» ៕

អត្ថបទ៖ ប៊ុន សុភាព