ព័ត៌មានជាតិ

អភិបាលខណ្ឌឫស្សីកែវ ចុះពិនិត្យការងារស្ដារឡើងវិញ ចិញ្ចើមផ្លូវ ចំណតរថយន្តក្រុង និងសម្អាតបរិស្ថាន

បានផុស

៨ ខែ មុន

នៅ

ថ្ងៃសុក្រ ៥ កញ្ញា ២០២៥

ដោយ

កាលពីរសៀលថ្ងៃទី ៤ ខែកញ្ញា ឆ្នាំ ២០២៥ លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំមន្ត្រីពាក់ព័ន្ធ ចុះពិនិត្យ និងរៀបចំឡើងវិញចំពោះដីចំណីផ្លូវសាធារណៈដែលមានប្រជាពលរដ្ឋមួយចំនួនតូចធ្លាប់រំលោភយកធ្វើជាប្រយោជន៍ផ្ទាល់ខ្លួន ក៏ដូចជាការដាក់តាំងលក់ដូរលើចិញ្ចើមផ្លូវ បណ្ដាលឲ្យបាត់បង់សោភ័ណភាព និងកកស្ទះចរាចរណ៍។

នាឱកាសចុះពិនិត្យនោះ លោក ជិន ប៊ុនធឿន បានអំពាវនាវប្រជាពលរដ្ឋទាំងអស់ សហការជាមួយអាជ្ញាធរ ដើម្បីរក្សាចិញ្ចើមផ្លូវសាធារណៈ និងចូលរួមសម្អាតអនាម័យបរិស្ថាននៅមុខផ្ទះរបស់ខ្លួនឯងឲ្យបានស្អាតស្អំជាប្រចាំ។

ជាមួយនេះ លោក គន់ សោភា ប្រធានការិយាល័យសាធារណការខណ្ឌ បានប្រាប់កម្ពុជាថ្មីឲ្យដឹងថា ក្នុងឱកាសនោះ បានណែនាំឲ្យមន្ត្រីជំនាញពាក់ព័ន្ធ សិក្សាស្តារឡើងវិញនូវការ៉ូឡាដែលខូចខាតតាមបណ្ដោយផ្លូវជាតិ ៥ និងបណ្ដោយផ្លូវសំខាន់ៗ ក្នុងមូលដ្ឋានឫស្សីកែវ។

លោក គន់ សោភា បានបញ្ជាក់ថា តាមប្រសាសន៍ដឹកនាំរបស់លោកអភិបាលខណ្ឌឫស្សីកែវ បានឲ្យរៀបចំសម្អាតស្មៅ និងសំរាម តាមបណ្ដោយផ្លូវជាតិ ៥ និងបណ្ដោយផ្លូវសំខាន់ៗ និងនៅតាមចំណតរថយន្តក្រុង រៀបចំគាស់ការ៉ូឡាចាស់ៗ ខូចៗ ដោយឲ្យចាក់បេតុងជំនួសវិញ។

ចំណែក លោក សំ អឿន ជាប្រជាពលរដ្ឋរស់នៅសង្កាត់ទួលសង្កែទី ១ បានយល់ឃើញថា ការរៀបចំឡើងវិញនេះ ជួយឲ្យផ្លូវរដ្ឋកាន់តែទូលាយ ងាយស្រួលសម្រាប់ការធ្វើដំណើរ។ លោក សង្ឃឹមថា ពលរដ្ឋទាំងអស់ នឹងគោរពតាម និងសហការជាមួយអាជ្ញាធរ។

ដោយឡែក អ្នកស្រី ណៃ រស់ អ្នកលក់តាមចិញ្ចើមផ្លូវម្នាក់ បានប្រាប់ដែរថា ពេលដំបូង មានការលំបាក ខ្លាចថាមិនមានកន្លែងលក់ ប៉ុន្តែបើគោរពច្បាប់ និងអាជ្ញាធរជួយរៀបចំកន្លែងលក់ឲ្យសមរម្យ ក៏អាចទាំងរកចំណូលបាន ទាំងរក្សាសោភ័ណភាពបានផងដែរ។

អ្នកស្រី បន្ថែមថា ការចូលរួមរបស់ប្រជាពលរដ្ឋក្នុងការថែរក្សាចិញ្ចើមផ្លូវ មិនត្រឹមតែជួយឲ្យទីក្រុងកាន់តែស្អាតទេ ប៉ុន្តែជាកត្តាសំខាន់កាត់បន្ថយការកកស្ទះចរាចរណ៍ និងបង្កើនសុវត្ថិភាពផងដែរ៕

អត្ថបទ ៖ សំណាង