អភិបាលខណ្ឌឬស្សីកែវ ណែនាំពលរដ្ឋនៅតាមបណ្តោយ​ទន្លេសាប បង្កើនការប្រុងប្រយ័ត្នខណៈទឹកកំពុងហក់ឡើង

កាលពីរសៀលទី១១ ខែកញ្ញា ឆ្នាំ២០២៥ លោក ជិន ប៊ុនធឿន អភិបាលនៃអណៈអភិបាលខណ្ឌឬស្សីកែវ បានចុះពិនិត្យស្ថានភាពទឹកទន្លេសាប ដែលកំពុងហក់ឡើងជាបន្តបន្ទាប់។ ក្នុងឱកាសនេះ លោកអភិបាលបានណែនាំ និងអំពាវនាវឲ្យប្រជាពលរដ្ឋដែលរស់នៅតាមបណ្តោយមាត់ទន្លេ បង្កើនការប្រុងប្រយ័ត្នខ្ពស់ជាងមុន ចំពោះគ្រោះថ្នាក់អាចកើតមានដោយឱ្យគ្រួសារ និងកូនចៅឲ្យមានការយកចិត្តទុកដាក់ និងត្រៀមរកទីទួលសុវត្ថិភាពឆាប់រហ័ស នៅពេលមានស្ថានភាពបន្ទាន់។

ក្រៅពីណែនាំឲ្យពលរដ្ឋប្រុងប្រយ័ត្នពីទឹកទន្លេហក់ឡើង លោក ជិន ប៊ុនធឿន ក៏បានស្នើឲ្យប្រជាពលរដ្ឋទាំងអស់ចូលរួមថែរក្សាអនាម័យបរិស្ថាន ត្រូវចោលសំរាមក្នុងធុងឲ្យបានត្រឹមត្រូវ មិនត្រូវបោះចូលក្នុងទន្លេ ឬតាមវាលសាធារណៈនោះទេ ដើម្បីការពារបរិស្ថានឲ្យមានភាពស្អាត និងល្អប្រសើរជានិច្ច។

លោក សុវណ្ណារ៉ា ប្រជាពលរដ្ឋម្នាក់ដែលរស់នៅតាមបណ្តោយទន្លេសាប បានលើកឡើងពីអារម្មណ៍សប្បាយរីករាយនៅពេលដែលលោកអភិបាលខណ្ឌមកពិនិត្យផ្ទាល់ និងផ្តល់ការណែនាំជាក់ស្តែង។ ពួកគាត់ក៏កំពុងបង្កើនការប្រុងប្រយ័ត្ន និងព្យាយាមរកទីសុវត្ថិភាពសម្រាប់កូនចៅផងដែរ។

បន្ទាប់ពីចុះពិនិត្យនៅតាមមាត់ទន្លេ លោកអភិបាលខណ្ឌបានបន្តចុះពិនិត្យផ្លូវ 200R (ស្ពានវត្តទួលសន្តិវ័ន ឬវត្តទួលអស់លោក) ដើម្បីរៀបចំដាក់គ្រឿងចក្រឈូសដី និងបាញ់លាងសម្អាតផ្លូវ ក្នុងរយៈពេលខាងមុខដ៏ខ្លី ដើម្បីធានាការទៅមករបស់ប្រជាពលរដ្ឋមានភាពងាយស្រួល និងសុវត្ថិភាពកាន់តែប្រសើរ៕

អត្ថបទ៖ សំណាង