ព័ត៌មានអន្ដរជាតិ

នាយករដ្ឋមន្ត្រីអ៊ីស្រាអែលដឹងខ្លួនថា «ខ្លួននឹងកាន់តែឯកោ» និង ប្តេជ្ញាផលិតអាវុធដោយខ្លួនឯង

បានផុស

៩ ខែ មុន

នៅ

ថ្ងៃអង្គារ ១៦ កញ្ញា ២០២៥

ដោយ

ខណៈពេលដែលបណ្តារដ្ឋអារ៉ាប់ និងក្រុមមេដឹកនាំប្រទេសមូស្លីមប្រមូលផ្តុំគ្នាកាន់តែខ្លាំងប្រឆាំងអ៊ីស្រាអែល និងការព្រងើយកន្តើយជាមួយការអំពាវនាវរបសបណ្តាមេដឹកនាំអឺរ៉ុប នាយករដ្ឋមន្ត្រីអ៊ីស្រាអែល លោក បេនចាមីន ណេតាន់ញ៉ាហ៊ូ (Benjamin Netanyahu) បានសារភាពកាលពីថ្ងៃចន្ទថា អ៊ីស្រាអែលកំពុងប្រឈមមុខនឹងភាពឯកោកាន់តែខ្លាំងឡើងនៅលើឆាកពិភពលោក។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់ញ៉ាហ៊ូ ក្នុងសន្និសីទកាសែត។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយរបស់លោកនាយករដ្ឋមន្ត្រីអ៊ីស្រាអែល បានធ្វើឡើង ចំពេលដែលបណ្តាប្រទេសនៅអឺរ៉ុបបានអំពាវនាវឱ្យមានការបញ្ឈប់ការលក់អាវុធ និងទណ្ឌកម្មប្រឆាំងនឹងអ៊ីស្រាអែល ក្នុងអំឡុងពេលសង្រ្គាមដែលកំពុងបន្តនៅតំបន់ហ្គាហ្សា។ ជាមួយគ្នានេះ មេដឹកនាំបណ្តារដ្ឋអារ៉ាប បានអំពាវនាវឲ្យផ្តាច់ទំនាក់ទំនងជាមួយអ៊ីស្រាអែលបន្ទាប់ពីនាយករដ្ឋមន្ត្រីអ៊ីស្រាអែលបញ្ជាឲ្យមានការវាយប្រហារលើប្រទេសកាតាកាលថ្ងៃទី៩ខែកញ្ញា ដើម្បីសម្លាប់មេដឹកនាំក្រុមហាម៉ាស ដែលជ្រកកោននៅប្រទេសកាតា។

ការធ្វើអត្ថាធិប្បាយដ៏កម្រអំពីភាពខ្សោយរបស់ខ្លួនរបស់នាយករដ្ឋមន្ត្រីអ៊ីស្រាអែល ត្រូវបានចាប់បានដោយគូប្រជែងនយោបាយ និងក្រុមឧស្សាហកម្មបច្ចេកវិទ្យាខ្ពស់ ដែលបានស្តីបន្ទោសនាយករដ្ឋមន្ត្រីចំពោះស្ថានភាពមានបញ្ហារបស់អ៊ីស្រាអែលនៅលើឆាកពិភពលោក។ នេះបើយោងតាមការចុះផ្សាយរបស់ Times of Israel។

លោក ណេតាន់ញ៉ាហ៊ូ ដែលត្រូវបានស្រង់សម្តី បានទទួលស្គាល់នៅក្នុងសន្និសីទមួយរបស់អគ្គគណនេយ្យករនៃក្រសួងហិរញ្ញវត្ថុនៅទីក្រុងហ្សេរុយសាឡឹមថា «អ៊ីស្រាអែលស្ថិតក្នុងភាពឯកោមួយ»។

លោកបានបន្តថា៖«យើងនឹងត្រូវការកាន់តែខ្លាំងឡើងដើម្បីសម្របខ្លួនទៅនឹងសេដ្ឋកិច្ចដែលមានលក្ខណៈស្វយ័ត» បើទោះបីជានាយករដ្ឋមន្ត្រីអ៊ីស្រាអែល បានពិពណ៌នាខ្លួនឯង ចំពោះការមិនពេញចិត្ត លើពាក្យ «ភាពគ្រប់គ្រាន់ខ្លួនឯងផ្នែកសេដ្ឋកិច្ច» ដែលបានបិទពីពាណិជ្ជកម្មពិភពនោះ។

លោក ណេតាន់ញ៉ាហ៊ូ បាននិយាយថា៖«ខ្ញុំជាអ្នកជឿលើទីផ្សារសេរី ប៉ុន្តែយើងអាចរកឃើញថាខ្លួនយើងនៅក្នុងស្ថានភាពដែលឧស្សាហកម្មអាវុធរបស់យើងត្រូវបានរារាំង។ យើងនឹងត្រូវអភិវឌ្ឍឧស្សាហកម្មអាវុធនៅទីនេះ មិនត្រឹមតែការស្រាវជ្រាវ និងការអភិវឌ្ឍប៉ុណ្ណោះទេ ប៉ុន្តែក៏មានសមត្ថភាពក្នុងការផលិតនូវអ្វីដែលយើងត្រូវការផងដែរ»។

ដោយសារតែមិនបានធ្វើតាមការអំពាវនាវរបស់សហគមន៍អន្តរជាតិដែលអំពាវនាវឲ្យបញ្ចប់សង្គ្រាមនៅហ្គាហ្សាដែលរហូតដល់ពេលនេះសម្លាប់មនុស្សជាង៦០០០០នាក់ទៅហើយក្នុងរយៈពេលជិត២ឆ្នាំ នាយករដ្ឋមន្ត្រីអ៊ីស្រាអែល លោក ណេតាន់ញ៉ាហ៊ូ បានប្តេជ្ញាតាមកម្ទេចក្រុមមានដឹកនាំហាម៉ាសទោះនៅទីណា ឬក្នុងប្រទេសណា។

ការវាយប្រហារចុងក្រោយរបស់អ៊ីស្រាអែលលើប្រទេសកាតាដែលជាប្រទេសមានអធិបតេយ្យភាព និងជាសម្ព័ន្ធមិត្តសហរដ្ឋអាមេរិក ខណៈកាតាជាប្រទេសក្នុងសម្ព័ន្ធរដ្ឋអារ៉ាប់ស្រាប់ បានធ្វើឲ្យមានប្រតិកម្មកាន់តែខ្លាំងពីអន្តរជាតិ ជាពិសេសបំផុត គឺបណ្តារដ្ឋអារ៉ាប់ ដែលបង្ហាញសញ្ញារួបរួមគ្នា និងចេញវិធានការសងសឹកអ៊ីស្រាអែល៕

រ៉ាន់ រើយ