ទេសរដ្ឋមន្រ្តី គន់ គីម ណែនាំពលរដ្ឋរស់នៅតំបន់​រងគ្រោះដោយទឹកជំនន់ ត្រូវរៀបចំខ្លួនឲ្យរួចជាស្រេចក្នុងពេលមានគ្រោះអាសន្ន

លោកទេសរដ្ឋមន្រ្តី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ នៅរសៀលថ្ងៃទី០១ ខែ តុលា ឆ្នាំ២០២៥នេះ បានអញ្ជើញចុះសួរសុខទុក្ខពលរដ្ឋ និងពិនិត្យស្ថានភាពទីទួលសុវត្ថិភាពពលរដ្ឋ នៅឃុំជីរោទិ៍ និងឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។ លោកទេសរដ្ឋមន្រ្តី គន់ គីម បានណែនាំឲ្យពលរដ្ឋរស់នៅតំបន់រងគ្រោះដោយទឹកជំនន់ ត្រូវរៀបចំខ្លួនឱ្យរួចជាស្រេចក្នុងពេលមានគ្រោះអាសន្ន។

ការចុះពិនិត្យស្ថានភាពទឹក និងទីទួលសុវត្ថិភាព ដែលអមដំណើរដោយលោក ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ លោក គន់ រ័ត្នមុនី អភិបាលរងខេត្ត និងមន្ទីរអង្គភាពជុំនាញជុំវិញខេត្ត ការចុះសួរសុខទុក្ខពលរដ្ឋនេះ ក្នុងគោលបំណងពិនិត្យមើលស្ថានភាពជាក់ស្តែងក្នុងតំបន់ដែលប្រឈមដោយទឹកជំនន់ ក៏ដូចជាបង្ហាញពីការយកចិត្តទុកដាក់របស់រាជរដ្ឋាភិបាលជាមួយប្រជាពលរដ្ឋផងដែរ។

លោកទេសរដ្ឋមន្រ្តី គន់ គីម ក៏បានផ្តាំផ្ញើដល់ពលរដ្ឋទាំងអស់ដែលរស់នៅក្នុងតំបន់រងគ្រោះទឹកជំនន់ឱ្យតាមដានស្ថានភាពទឹក និងធ្វើការរៀបចំខ្លួនឱ្យបានរួចជាស្រេចក្នុងពេលគ្រោះអាសន្នដើម្បីជម្លៀសមកកាន់ទីទួលសុវត្ថិភាព មួយវិញទៀតប្រជាពលរដ្ឋដែលរស់នៅលើទីទួលសុវត្ថិភាពទាំង២ទីតាំងក្នុងខេត្តត្បូងឃ្មុំ ត្រូវយកចិត្តទុកដាក់រក្សាអនាម័យ សុខភាព បរិស្ថាន ដើម្បីបង្ការជំងឺដង្កាត់ផ្សេងៗ។

តាមរបាយការណ៍របស់មន្ទីរធនធានទឹក និងឧតុនិយមខេត្តត្បូងឃ្មុំ ព្រឹកថ្ងៃទី០១ ខែតុលា ឆ្នាំ២០២៥នេះ កម្ពស់ទឹកទន្លេមេគង្គមានកម្ពស់ ១៤,២៦ ម៉ែត្រ ធៀបព្រឹកថ្ងៃទី៣០ ខែកញ្ញា ទឹកឡើង ០,១៦ ម៉ែត្រ ធៀបឆ្នាំមុនខ្ពស់ជាង ០,៩៤ម៉ែត្រ ។ សម្រាប់កម្ពស់ទឹកប្រកាសឲ្យមានការប្រុងប្រយ័ត្ន ១៥,២០ម៉ែត្រ៕

អត្ថបទ៖ សាន វិឡែម