ពិព័រណ៍ THAIFEX – Anuga Asia 2024 នឹងដាក់តាំងបង្ហាញម្ហូបអាហារ និងភេសជ្ជៈដែលកំពុងពេញនិយមនៅអាស៊ី

THAIFEX – Anuga Asia 2024 ដែលជាពិព័រណ៍ម្ហូបអាហារ និងភេសជ្ជៈលំដាប់អន្តរជាតិបានត្រៀមខ្លួនរួចជាស្រេចដើម្បីបង្ហាញផលិតផលដែលកំពុងពេញនិយមនៅអាស៊ី ចាប់ពីថ្ងៃទី២៨ ខែឧសភារហូតដល់ថ្ងៃទី១ ខែមិថុនានៅក្នុងទីក្រុងបាងកកប្រទេសថៃ ជាមួយនឹងស្ដង់តាំងពិព័រណ៍ជាង ៣,០០០ ស្ដង់មកពីប្រទេស និងដែនដីចំនួន ៥០ នៅជុំវិញពិភពលោក ។

ពិព័រណ៍នេះក៏នឹងបង្ហាញពីផលិតផលផ្សេងៗទៀតដែលផលិតឡើងដើម្បីបំពេញតាមតម្រូវការអតិថិជនផងដែរ ជាពិសេសផលិតផលដែលគិតគូរដល់សុខភាព និងមានស្លាកសញ្ញាបញ្ជាក់ពីផលិតផលត្រឹមត្រូវ ខណៈព្រឹត្តិការណ៍នេះទៀតសោត ក៏មានគោលបំណងចែករំលែកបទពិសោធន៍ បង្ហាញបច្ចេកវិទ្យាថ្មីៗដល់គ្នាទៅវិញទៅមក ក៏ដូចជាឧស្សាហកម្មច្នៃប្រឌិតដើម្បីលើកស្ទួយវិស័យម្ហូបអាហារនៅទូទាំងពិភពលោក ។

នៅឆ្នាំនេះ ពិព័រណ៍ THAIFEX – Anuga Asia នឹងដាក់តាំងបង្ហាញផលិតផលដ៏អស្ចារ្យបូករួមនឹងការច្នៃប្រឌិតដ៏ល្អឥតខ្ចោះ ។ អ្នកលក់ក្នុងស្តង់ពិព័រណ៍ម្ហូបអាហារ និងភេសជ្ជៈលំដាប់អន្តរជាតិមួយនេះមិនត្រឹមតែផ្ដល់ម្ហូបអាហារដែលមានរសជាតិឆ្ងាញ់ប៉ុណ្ណោះទេ ប៉ុន្តែក៏គិតគូរទៅដល់បញ្ហាសុខភាព និងមានក្រមសីលធម៌ ជាពិសេសក៏មានការបង្ហាញ Show ជាច្រើនមុខផងដែរ ។

ទន្ទឹមនោះ THAIFEX – Anuga Asia ក៏នឹងរៀបចំកម្មវិធីប្រកួតប្រជែងរសជាតិបែបប្រូតេអ៊ីនជាលើកដំបូងផងដែរ ហើយអ្នកចូលរួមទស្សនានឹងបោះឆ្នោតសម្រាប់ផលិតផលណាដែលដ៏ល្អបំផុតដោយផ្អែកលើរសជាតិ សោភ័ណ្ឌភាព ក្លិន និងការច្នៃប្រឌិតជាដើម ហើយព្រឹត្តិការណ៍នេះមិនមែនត្រឹមតែជាពិព័រណ៍អាហារ និងភេសជ្ជៈឈានមុខគេនៅអាស៊ីប៉ុណ្ណោះទេ ប៉ុន្តែវាក៏ជាមជ្ឈមណ្ឌលមួយដែលអ្នកចូលរួមអាចពិនិត្យមើលផលិតផលចុងក្រោយបំផុតរបស់ឧស្សាហកម្មនីមួយៗតាមរយៈការធ្វើបណ្តាញ វគ្គអប់រំ ការប្រកួតប្រជែង និងអ្វីៗជាច្រើនទៀតផងដែរ ។

​លោកស្រី Lim Su Ping Stephie ប្រធាន​គ្រប់​គ្រង​ម៉ាក​យីហោ Gold Kili Trading Enterprise (S) Pte Ltd. ដែលនឹងចូលរួមក្នុងពិព័រណ៍ THAIFEX – Anuga Asia បាននិយាយថា “យើងទទួលស្គាល់នូវតម្រូវការដែលកំពុងកើនឡើងសម្រាប់ជម្រើសអាហារបួស និងអាហារសុខភាព ដូច្នេះហើយទើបផលិតផល Gold Kili បានដាក់ចេញនូវភេសជ្ជៈថ្មីដែលគ្មានជាតិទឹកដោះគោ ក្រោមប្រេន “Oat-k by Gold Kili” ។

លោកស្រីបញ្ជាក់បន្ថែមថា “ផលិតផលប្រកបដោយភាពច្នៃប្រឌិតនេះត្រូវបានបង្កើតឡើងដើម្បីឆ្លើយតបនូវអ្វីដែលអ្នកចូលរួមទទួលបានពីព្រឹត្តិការណ៍នេះ ហើយវាក៏ឆ្លុះបញ្ចាំងពីការប្តេជ្ញាចិត្តរបស់ម៉ាកប្រេនរបស់យើងចំពោះការច្នៃប្រឌិត និងគុណភាព” ។

គួរបញ្ជាក់ថា THAIFEX – Anuga Asia 2024 សន្យានឹងធ្វើការផ្លាស់ប្ដូរឆ្ពោះទៅអនាគតនៃពិព័រណ៍ម្ហូបអាហារ និងភេសជ្ជៈលំដាប់អន្តរជាតិ ហើយពាណិជ្ជករត្រូវបានអញ្ជើញឲ្យចូលរួមក្នុងបទពិសោធន៍ដ៏សម្បូរបែបដែលបង្កប់នូវរសជាតិ បទពិសោធន៍នៃការច្នៃប្រឌិត និងការបង្កើតបដិវត្តន៍ម្ហូបអាហារជាដើម ៕