អ្នកនិពន្ធ ម៉ីសន សុធារី បានចេញការជូនដំណឹងមួយដើម្បីបង្ការទប់ស្កាត់ការបោកប្រាស់

ដើម្បីទប់ស្កាត់ការបោកប្រាស់ និងការយល់ច្រឡំនានា អ្នកនិពន្ធ ម៉ីសន សុធារី បានជូនដំណឹងដល់មិត្ត​អ្នកអាន និងអ្នកតាមដានទាំងអស់ថា ក្រៅពីមានការងារជាមួយសារព័ត៌មានកម្ពុជា និងមានគេហទំព័រ Meysansotheary.com ផ្ទាល់ខ្លួន អ្នកនាងមិនមានការងារផ្សព្វផ្សាយ ឬចែករំលែក​ណាមួយជាមួយអង្គការ ស្ថាប័ន ឬក្រុមហ៊ុនណាឡើយ មិនថាវេទិកាអប់រំ មណ្ឌល​សិក្សា ឬការងារកៀរគរមនុស្ស​។

អ្នកនិពន្ធ ម៉ីសន សុធារី បានបង្ហោះសារនៅលើបណ្តាញសង្គមហ្វេសប៊ុកផ្ទាល់ខ្លួន នៅថ្ងៃទី​១៨ ខែ តុលានេះដោយបញ្ជាក់ថា៖«ប្រសិនបើបងប្អូនបានឃើញឈ្មោះ ឬរូបភាពរបស់ខ្ញុំ ស្នាដៃ និងអ្វីៗទាក់ទងនឹងខ្ញុំនៅទីណាផ្សេងៗពាក់ព័ន្ធនឹងការកៀរគរមនុស្ស​ សន្យាផ្តល់ការបណ្តុះបណ្តាលអ្វីជាដើម សូមបញ្ជាក់ថា នោះអាចជាការបោកប្រាស់ ​និងសូមមេត្តាផ្តល់ដំណឹងមកក្រុមការងាររបស់ខ្ញុំជាបន្ទាន់»។

អ្នកនិពន្ធ ម៉ីសន សុធារី សង្កត់ធ្ងន់ថា ការងាររបស់អ្នកនាងរួមមាន និពន្ធសៀវភៅ ការផលិតអត្ថបទវិដេអូ និងបទសម្ភាសន៍ និងការបង្វឹកអ្នកនិពន្ធថ្មីៗ ដែលត្រូវបានចេញផ្សាយតែនៅកាសែត KampucheaThmey និងតាមរយៈគេហទំព័រ MeysanSotheary.com ប៉ុណ្ណោះ។

គួរកត់សម្គាល់ថា អ្នកនិពន្ធជើងចាស់ ម៉ីសុន សុធារី បានទទួលការកោតសរសើរយ៉ាងទូលំទូលាយពីសាធារណជន និងអ្នកអានចំពោះការសរសេរយ៉ាងទូលំទូលាយ ដែលបាននិពន្ធរឿងជាច្រើនប្រភេទ រឿងប្រលោមលោក រឿងអប់រំ រឿងខ្លី និងរឿងភាគល្បីៗជាច្រើន៕