អ្នកនិពន្ធ ម៉ីសន​ សុធារី សម្រេចបោះពុម្ពផ្សាយរឿង “ថ្ងៃមុនស្អប់ថ្ងៃនេះស្រលាញ់” ក្នុងទម្រង់ថ្មីតូចច្រឡឹង ត្រឹម២វគ្គដដែល

ប្រលោមលោកដ៏ល្អឯកក្រោមចំណងជើងថា “ថ្ងៃមុនស្អប់ថ្ងៃនេះស្រលាញ់” (Hate & Love) ដែលជាស្នាដៃរបស់អ្នកនិពន្ធ ម៉ីសន​ សុធារី​ ពេលនេះសម្រិតសម្រាំងយ៉ាងពិសេស រាងតូចច្រឡឹងជាងមុន ​និងបានសម្រេចបោះពុម្ពផ្សាយសាជាថ្មីម្ដងទៀត។ បន្ទាប់ពីបាត់វត្តមាន អស់រយៈពេលជិត៥ឆ្នាំកន្លងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចផ្សាយនូវស្នាដៃប្រលោមលោកមនោសញ្ចេតនាមួយនេះ ស្របតាមការលើកឡើងរបស់អ្នកគាំទ្រលោកស្រី ម៉ីសន សុធារី ក្នុងពេលដែលអ្នកអានសាច់រឿង “ថ្ងៃមុនស្អប់ថ្ងៃនេះស្រលាញ់”  មានការយល់ច្រឡំថា ជាការបោះផ្សាយវគ្គទី៣​ទៅវិញ។

យ៉ាងណាក៏ដោយ ដើម្បីកុំឲ្យមានការយល់ច្រឡំ​ម្ចាស់ស្នាដៃរឿង ​“ថ្ងៃមុនស្អប់ថ្ងៃនេះស្រលាញ់” ឬ​ Hate & Love បានមានប្រសាសន៍ថា ដោយសារតែសៀវភៅចាស់មានចំនួន២ក្បាលហើយកម្រាស់ក្រាស់ពេក ដូច្នេះទើបអ្នកនិពន្ធសម្រេចបោះពុម្ពផ្សាយក្នុងទ្រង់ទ្រាយថ្មី ក្រោមការសម្រួលចេញសៀវភៅចំនួន​៣ក្បាលថ្មី ដោយមានវគ្គ១និងវគ្គ២ដដែល ប៉ុន្តែរាងតូចច្រឡឹងជាងមុន រីឯទំងន់ក៏ស្រាលខ្លាំង ដែលអ្នកអានអាចដាក់តាមខ្លួនបានយ៉ាងងាយថែមទៀត។

ថ្វីដ្បិតតែ រឿង Hate & Love បានសម្រេចបោះសាជាថ្មីក៏ពិតមែន ប៉ុន្តែអ្នកនិពន្ធបានបញ្ចាក់ថា សូមកុំឲ្យអ្នកអានមានការភ័យព្រួយ ចំពោះសាច់រឿងគឺនៅតែដដែលមិនការប្ដូរផ្លាស់ ឬបង្កើតវគ្គ៣ក្នុងប្រលោមលោក ​“ថ្ងៃមុនស្អប់ថ្ងៃនេះស្រលាញ់” ឡើយ។

អ្វីដែលកាន់តែពិសេសសម្រាប់អ្នកគាំទ្រ​ដែលស្រលាញ់ពេញចិត្តចង់បានសៀវភៅកាន់ក្នុងដៃឆាប់ៗ ក្រុមការងារ meysansotheary នឹងផ្ដល់ជូន​​ ប្រសិនអ្នកអានជាវឬកក់មួយឈុត Hate & Love (៣ក្បាល) នោះនឹងទទួលបានតម្លៃយ៉ាងពិសេសក្នុងឱកាសទិវាក្ដីស្រលាញ់នាពេលខាងមុខផងដែរ។

សូមរម្លឹកផងដែរថា កាលពីឆ្នាំ២០១៩ដដែល ស្ថានីយ៍ទូរទស្សន៍ PNN​ បានជាវនូវកម្មសិទ្ធបញ្ញានៃខ្សែរឿងដ៏ល្បីមួយនេះ ទៅផលិតក្នុងទ្រង់ទ្រាយធំមិនធ្លាប់ពីមុនមក ក្នុងន័យសម្រិតសម្រាំងសម្រាប់អ្នកគាំទ្រ Hate & Love ។កាលណោះវាទទួលបានភាពល្បីល្បាញយ៉ាងគគ្រឹកគគ្រេង ព្រមទាំងមានអ្នកគាំទ្រជាច្រើនសុទ្ធតែពោលសរសើរថា សាច់រឿងក្នុងសៀវភៅល្អណាស់ទៅហើយ ក្នុងពេលដែលយកមកផលិតជាភាពយន្ត រឹតតែធ្វើឲ្យអ្នកទស្សនាជក់ជិតដិតអារម្មណ៍យ៉ាងខ្លាំងសឹងតែមិននឹកស្មានថា​​ “ថ្ងៃមុនស្អប់ថ្ងៃនេះស្រលាញ់” អាចជាប្រលោមលោកដែលនៅតែដក់ជាប់ក្នុងក្រអៅបេះដូងមកទល់សព្វថ្ងៃនេះ៕

សួមទស្សនាឈុតឆាកខ្លះៗក្នុងប្រលោមលោក ​“ថ្ងៃមុនស្អប់ថ្ងៃនេះស្រលាញ់” ឬ​ Hate & Love ដែលបានកម្លាយជាភាពយន្តកាលពីឆ្នាំ២០១៩លើទូរទស្សន៍ PNN​ នាខាងក្រោមនេះ

អត្ថបទ៖ សាង ស្រីល័ក្ខ

ចុចអាន៖ឯកឧត្ដម ឌី វិជ្ជា ជួយជ្រោមជ្រែងការចូលអានព្រីមៀមមិនគិតថ្លៃ សម្រាប់គ្រូបង្រៀននិងកម្មករ-កម្មការិនីទូទាំងប្រទេស