ពលរដ្ឋខ្មែរជាប់សែស្រឡាយចិន នាំគ្នាកាត់ឆុង រមណីដ្ឋានវត្តភ្នំ ដើម្បីរំដោះគ្រោះចង្រៃ បួងសួងសុំសេចក្តីសុខ

ប្រជាពលរដ្ឋខ្មែរប្រុសស្រី ជាប់ខ្សែស្រឡាយកាត់ចិន បានបន្តនាំគ្នាទៅកាត់ឆុង រំដោះគ្រោះឧបទ្រប់ចង្រៃ និង អុជធូបសពះបន់ស្រន់បួងសួងសុំសេចក្តីសុខចម្រើន ដើម្បីរំដោះគ្រោះចង្រៃ បួងសួងសុំសេចក្តីសុខ។

ពលរដ្ឋប្រុសស្រីជាច្រើន សែស្រឡាយចិនលើកឡើងថា ៖ នេះជាការសែនព្រេនតាមទំនៀមទម្លាប់ ប្រពៃណីរបស់ដូនតា តាមបែបសាសនាប្រពៃណីចិន ដែលជាការសែនព្រេនកាត់ផ្តាច់នូវគ្រោះចង្រៃចោល និងតបសងមកវិញនូវរឿងល្អៗចូលមកក្នុងជីវិត ទាំងការរស់នៅ ការប្រកបកិច្ចការងារ រួមទាំងការរកស៊ីទទួលទានជាដើម។

ពួកគាត់បន្តលើកឡើងទៀតថា ក្រោយបានមកបន់ស្រន និងកាត់ឆុងរួច មានអារម្មណ៍ស្រស់ថ្លា និងសុំឲ្យខ្លួន គ្រួសារ និងសង្គមជាតិ មានសេចក្ដីសុខ ជៀសឆ្ងាយផុតពីគ្រោះចង្រៃ ជាពិសេស ជូនពរដល់វីរៈកងទ័ព សុខសប្បាយ ទាំងអស់គ្នាផងដែរ។

សូមបញ្ជាក់ថាជារៀងរាល់ឆ្នាំ ឱ្យតែគៀកចូលដល់រដូវបុណ្យចូលឆ្នាំប្រពៃណីចិន-វៀតណាម គេតែងសង្កេតឃើញមានប្រជាពលរដ្ឋខ្មែរកាត់ចិនជាច្រើន តែងបាននាំគ្នាយកគ្រឿងដង្វាយផ្សេងៗ យកទៅសែនព្រេន ដើម្បីកាត់គ្រោះ នៅទីសក្ការះ លើតំបន់រមណីដ្ឋានប្រវត្តិសាស្ត្រវត្តភ្នំ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។

បុណ្យចូលឆ្នាំប្រពៃណីចិនវៀតណាម នឹងប្រព្រឹត្តិទៅរយះពេល០៤ថ្ងៃ គិតពីថ្ងៃទី១៦ ដល់ថ្ងៃទី១៩ ខែកុម្ភៈ ឆ្នាំ២០២៦ ដែលបុណ្យនេះ គឺជាពេលវេលាដែលពលរដ្ឋកម្ពុជា មានឈាមជ័រជាប់សែស្រឡាយកាត់ចិន ក៏នឹងចូលរួមរៀបចំពិធីសែនជូនដូនតា ដើម្បីសុំសេចក្តីសុខសប្បាយ និងសុំពរជ័យឱ្យរកស៊ីទទួលទានកាន់តែរីកចម្រើន តាមបែបលក្ខណះគ្រួសាររៀងៗខ្លួន៕ អត្ថបទ ៖ សុភា